ވިލުންވެރި މުސްތަގުބަލަކަށް ރާއްޖެއިން އަމާޒު ހިފާއިރު، ބޭނުންވަނީ އިންސާފުވެރި ހިލޭ އެހީ: ރައީސް މުއިއްޒު
މޫސުމަށް އަންނަ ބަދަލުތަކުގެ ކާރިސާއަށް ހޭނި، ރެޒިލިއެންޓް މުސްތަގުބަލެއް ބިނާކުރުމަށް ދިވެހިރާއްޖެއިން އަޒުމް ކަނޑައަޅާފައިވާ ކަމަށާއި، އެކަން ހާސިލުކުރުމަށްޓަކައި ތަރައްގީވެފައިވާ ގައުމުތަކުން ދަރަނީގެ ބަދަލުގައި ހިލޭ އެހީ ފޯރުކޮށްދޭން ޖެހޭ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ތުރުކީގެ އަންތާލިއާގައި މިހާރު ކުރިއަށްދާ "ކޮޕް 31" ސަމިޓުގައި ތަގުރީރު ކުރައްވަމުން ރައީސް ވިދާޅުވީ، ދުނިޔޭގެ ފިނިހޫނުމިން 1.5 ޑިގްރީ ސެލްސިއަސްއަށް ވުރެ މައްޗަށް ގޮސް ކުރިމަތިވާ ނުރައްކާތަކުން އަރައިގަތުމަށް، ބައިނަލްއަގުވާމީ މުޖުތަމައުން ގުޅިގެން އަވަސް ފިޔަވަޅުތަކެއް އަޅަންޖެހޭ މައިގަނޑު ތިން ދާއިރާއެއް އެބައޮތް ކަމަށެވެ.
1. މާލީ އިލްތިޒާމްތައް އަދާކުރުން ފުރަތަމަ ކަމެއްގެ ގޮތުގައި ރައީސް ފާހަގަކުރެއްވީ ތަރައްގީވެފައިވާ ގައުމުތަކުން ވެފައިވާ މާލީ ވައުދުތައް ފުއްދުމެވެ. އެގޮތުން، ގްރީން ކްލައިމެޓް ފަންޑް އަލުން މުއްސަނދިކޮށް، އެޑަޕްޓޭޝަން ފަންޑަށް ރައުސްމާލް ދިނުމުގެ އިތުރުން، ގެއްލުމަށް ބަދަލުދޭ ފަންޑަށް (ލޮސް އެންޑް ޑެމޭޖް ފަންޑަށް) އެކަށީގެންވާ ވަސީލަތްތައް ހަމަޖައްސައިދޭން ޖެހޭ ކަމަށް އެ މަނިކުފާނު ވިދާޅުވިއެވެ. މޫސުމީ ބަދަލުތަކަށް މަގުފަހިވުމުގައި އެއްވެސް ހިއްސާއެއް ނެތް ރާއްޖެ ފަދަ ކުދި ގައުމުތައް، އެ ހާލަތަށް ހޭނުމަށްޓަކައި ނުއުފުލޭ ވަރުގެ ދަރަނިތަކެއްގެ ތެރެއަށް ވެއްޓެން ޖެހޭނެ ކަމަށް ގަބޫލުނުކުރެއްވޭ ކަމަށާއި، ފޯރުކޮށްދޭ އެހީއަކީ އަލަށް ދޭ، އިތުރަށް ދޭ އަދި ހިލޭ ދޭ އެހީއަކަށް ވާންޖެހޭނެ ކަމަށް ރައީސް ވިދާޅުވިއެވެ.
2. ބައިނަލްއަގުވާމީ މާލީ ނިޒާމުތައް އިސްލާހުކުރުން ދެވަނަ ކަމެއްގެ ގޮތުގައި ރައީސް ގޮވާލެއްވީ މޫސުމީ ބަދަލުތަކާ ގުޅޭ މާލީ އެހީތެރިކަން ފޯރުކޮށްދޭ ނިޒާމުތައް އިސްލާހުކުރުމަށެވެ. ބައިނަލްއަގުވާމީ މާލީ އިދާރާތަކުން، މޫސުމަށް އަންނަ ބަދަލުތަކަށް ހޭނުމަށް ކުރާ އިންވެސްޓްމަންޓްތައް ވަޒަންކޮށް ރޭޓްކުރާ އުސޫލުތައް ބަދަލުކުރަން ޖެހޭ ކަމަށް އެ މަނިކުފާނު ވިދާޅުވިއެވެ. އަދި ރެޒިލިއެންސް ބިނާކުރުމަށް ކުރާ މަސައްކަތްތަކަކީ މާލީ ބުރައެއްގެ ގޮތުގައި ދެކުމުގެ ބަދަލުގައި، އެއީ މުޅި ދުނިޔޭގެ މުސްތަގުބަލަށް ކުރެވޭ އިންވެސްޓްމަންޓެއްގެ ގޮތުގައި ބަލައިގަންނަން ޖެހޭ ކަމަށް ރައީސް ފާހަގަކުރެއްވިއެވެ.
3. ސިޔާސަތުތައް އަމަލީ ގޮތުން ތަންފީޒުކުރުން ތިންވަނަ ދާއިރާއެއްގެ ގޮތުގައި ރައީސް ފާހަގަކުރެއްވީ ކަނޑައަޅާފައިވާ ސިޔާސަތުތައް ތަންފީޒުކުރުމެވެ. އަމަލީ ސިފައެއް ނާންނަ އުއްމީދުތަކަކީ ހަމައެކަނި ވައުދުތަކެއް ކަމަށް ވިދާޅުވެ، އެ ކަންކަން ހަގީގަތަކަށް ހެދުމަށް ފައިސާއާއި ޓެކްނޮލޮޖީގެ އިތުރުން، ބައިނަލްއަގުވާމީ މުއާހަދާތަކުން ލާޒިމުކުރާ ޒިންމާތައް އަދާކުރުން މުހިންމުކަމަށް ވިދާޅުވިއެވެ. މި މޭރުމުން ވާހަކަފުޅު ދައްކަވަމުން ރައީސް ވިދާޅުވީ، ކާނާގެ ކަށަވަރުކަމާއި، ފެނާއި، އިޔާދަކުރަނިވި ހަކަތައިގެ ދާއިރާއިން ރާއްޖެއިން ކަނޑައަޅާފައިވާ ލަނޑުދަނޑިތައް މިހާރު އަމަލީ މަސައްކަތަށް ބަދަލުކުރަމުން އަންނަ ކަމަށެވެ.
މި ތަގުރީރުގައި ރައީސް ވަނީ ރާއްޖެއަށް ލިބުނު ތާރީހީ ކާމިޔާބީއެއްވެސް ހިއްސާކުރައްވާފައެވެ. އެގޮތުން، މިދިޔަ މަހު ރާއްޖޭގެ މުއައްސަސާއަކަށް ގްރީން ކްލައިމެޓް ފަންޑުގެ އެކްރިޑިޓޭޝަން ލިބިފައިވާ ކަމަށާއި، މިއީ އޭޝިއާގެ ތަރައްގީވަމުން އަންނަ ކުދި ޖަޒީރާ ގައުމަކަށް (ސިޑްސް) މި ޝަރަފު ލިބުނު ފުރަތަމަ ފަހަރުކަން ފާހަގަކުރެއްވިއެވެ. މިކަމުން ދޭހަވަނީ ކްލައިމެޓް ފައިނޭންސް ހޯދައި، އެ ފައިސާ ހިންގުމަށް އިދާރީ ގޮތުން ރާއްޖެ ތައްޔާރުވެފައިވާ މިންވަރު ކަމަށް ރައީސް ވިދާޅުވިއެވެ.
"އިންސާފަށާއި، ޒިންމާ އަދާކުރުމަށާއި، އަމަލީ ފިޔަވަޅުތަކަށް" ގޮވާލައްވަމުން ރައީސް ވިދާޅުވީ އިޔާދަކުރަނިވި ހަކަތައިގެ އަމާޒުތަކަށް ވާސިލުވުމަށް ރާއްޖެ އޮތީ ރަނގަޅު މިސްރާބެއްގައި ކަމަށެވެ. ރާއްޖޭގައި ބޭނުންކުރާ ކަރަންޓުގެ 33 އިންސައްތަ އިޔާދަކުރަނިވި ހަކަތައަށް ބަދަލުކުރުމަށް ސަރުކާރުން އަމާޒު ހިފާފައިވާއިރު، 2023 ވަނަ އަހަރާ ހަމައަށް ރާއްޖޭގައި އިޔާދަކުރަނިވި ހަކަތައިން އުފެއްދުނީ 53 މެގަވޮޓްގެ ކަރަންޓެވެ. ނަމަވެސް، އެކި ސަރަހައްދުތަކުގައި ހިންގި މަޝްރޫއުތަކާއެކު އެ އަދަދު މިހާރު 126 މެގަވޮޓަށް އިތުރުކުރެވި، ދެގުނައަށް ވުރެ މައްޗަށް ޖެހިފައިވާ ކަމަށް އެންވަޔަރަންމަންޓް މިނިސްޓަރު އަލީ ޝަރީފު ވަނީ މިދިޔަ ސެޕްޓެމްބަރު މަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވިދާޅުވެފައެވެ.
