Ad #8Advertise hereSize: 728 × 90 pxSize: 800 × 200 px Call 768 2001 WhatsApp
News Featured

ހަމަލާތައް މެދުކަނޑާލުމުގެ އެއްބަސްވުމާ ހިލާފަށް އިޒްރޭލުން ގާޒާއަށް ދިން ހަމަލާތަކެއްގައި ހަތަރު މީހުން ޝަހީދުވެއްޖެ

ހަމަލާތައް މެދުކަނޑާލުމުގެ އެއްބަސްވުމާ ހިލާފަށް އިޒްރޭލުން ގާޒާއަށް ދިން ހަމަލާތަކެއްގައި ހަތަރު މީހުން ޝަހީދުވެއްޖެ
Photo: Sky Sports
ތަފްޞީލް

ގާޒާއަށް ކުރަމުންދާ ފިނި މޫސުމުގެ ވިއްސާރައިގައި ފެންބޮޑުވެ އިންސާނީ ހާލަތު އިންތިހާއަށް ގޯސްވެފައިވާ ދަނޑިވަޅެއްގައި، ހަމަލާތައް މެދުކަނޑާލުމުގެ އެއްބަސްވުމާ ހިލާފަށް އިޒްރޭލުން ދިން ހަމަލާތަކެއްގައި ފަލަސްތީނުގެ މަދުވެގެން ހަތަރު މީހުން ޝަހީދުވެއްޖެއެވެ. އަލްޖަޒީރާއިން ރިޕޯޓުކޮށްފައިވާ ގޮތުގައި މި ހަމަލާތައް އަމާޒުކޮށްފައިވަނީ މިދިޔަ އަހަރު އަމަލުކުރަން ފެށި އެއްބަސްވުމަށް ބެލުމެއް ނެތިއެވެ.


މި ހާދިސާގައި ތިން މީހުން ޝަހީދުވެފައިވަނީ ގާޒާ ސިޓީގެ ތަލް އަލްހަވާ ސަރަހައްދުގައި ގެދޮރު ގެއްލިފައިވާ އާއިލާތަކަށް ކާބޯތަކެތީގެ އެހީ ބަހަން އުޅުނު ވޭނަކަށް އިޒްރޭލުގެ ޑްރޯނަކުން ދިން މިސައިލް ހަމަލާއެއްގައެވެ. މަންޒަރު ދުށް ފަރާތްތަކާ ހަވާލާދީ ރޮއިޓާސްއިން ބުނި ގޮތުގައި، ހަމަލާ އަމާޒުވި ވޭނުގައި ހުރި ލިޔެކިޔުންތަކުގައި ވޯލްޑް ސެންޓްރަލް ކިޗަން (ޑަބްލިއުސީކޭ) ގެ ލޯގޯ ޖަހާފައި ހުރި ނަމަވެސް، އެ ޖަމިއްޔާއިން ވަނީ އެއީ އެ ފަރާތުގެ އުޅަނދެއް ނޫންކަމަށް ބުނެފައެވެ.


މި ހަމަލާ ދިން މަންޒަރު ދުށް އަބޫ ޒެއިން އަލްދާޔާ ކިޔައިދިން ގޮތުގައި، ޓެންޓުތަކުގައި ދިރިއުޅޭ ފަގީރުންނާއި ގެދޮރު ގެއްލިފައިވާ ކުޑަކުދިންނަށް ކާބޯތަކެއްޗާއި ބުއިންތައް ބެހުމަށް އެ ބަސް މަޑުކޮށްލި ވަގުތު މިސައިލް ހަމަލާ އަމާޒުވުމުން އެ ސަރަހައްދުގައި ތިބި މީހުންނަށް ބޮޑު ސިހުމެއް ލިބިގެންދިޔައެވެ. އަދި އާންމު ރައްޔިތުންނަށް ކާބޯތަކެތި ފޯރުކޮށްދޭ ކޮންމެ މީހަކީ އިޒްރޭލުގެ ހަމަލާތަކުގެ އަމާޒަކަށް ވެފައިވާ ކަމަށް އޭނާ ފާހަގަކުރިއެވެ.

Photo: thepress


މީގެ އިތުރުން، ގާޒާގެ އުތުރުގެ ޖަބަލިއާ ރެފިއުޖީ ކޭމްޕްގެ އިރުމަތީގައި އޮންނަ ހަލާވާ ކޭމްޕްގައި އިޒްރޭލު ސިފައިން ބަޑިޖަހައި ފަލަސްތީނުގެ ފިރިހެނަކު ވަނީ ޝަހީދުކޮށްލާފައެވެ. ގާޒާ ސިޓީން ރިޕޯޓުކުރާ ނޫސްވެރިޔާ އިބްރާހީމް އަލްހަލީލީ މައުލޫމާތު ދިން ގޮތުގައި، އެ މީހާގެ ހަށިގަނޑު މިހާރު ވަނީ އަލްޝިފާ ހޮސްޕިޓަލަށް ގެންގޮސްފައެވެ. ހަމައެއާއެކު، ދެކުނުގެ ހާން ޔޫނިސްގެ އަލްމަވާސީ ސަރަހައްދުގައި ކަރަންޓު ބައިސްކަލެއްގައި ދަތުރުކުރި ޒުވާނަކަށް އަމާޒުކޮށް ދިން ހަމަލާއެއްގައި ތިން މީހަކު ޒަހަމްވެ، ފަރުވާދިނުމަށް ނާސިރު މެޑިކަލް ކޮމްޕްލެކްސްއަށް ވަނީ ގެންގޮސްފައެވެ.


އިންސާނީ ހާލަތާއި ހަމަލާތަކުގެ ތަފާސްހިސާބު

ނޫސްވެރިޔާ އަލްހަލީލީ ފާހަގަކުރި ގޮތުގައި ހަމަލާތައް މެދުކަނޑާލުމުގެ އެއްބަސްވުމުގެ ސަބަބުން ގާޒާގެ ރައްޔިތުންގެ ދިރިއުޅުމަށް އަދި އެއްވެސް ލުޔެއް ލިބިފައެއް ނުވެއެވެ. ގާޒާގެ ހެލްތު މިނިސްޓްރީގެ ތަފާސްހިސާބުތަކުން ދައްކާގޮތުގައި:

  • 2025 ވަނަ އަހަރުގެ އޮކްޓޫބަރު މަހު އެއްބަސްވުމަށް އަމަލުކުރަން ފެށި ފަހުން އިޒްރޭލުން އެއްބަސްވުމާ ހިލާފަށް 600 އަށް ވުރެ ގިނަ ހަމަލާ ދީ، 1،671 މީހުން ވަނީ ޝަހީދުކޮށްލާފައެވެ.
  • މީގެ ތިން އަހަރު ކުރިން އިޒްރޭލުން ފެށި ނަސްލު ނައްތާލުމުގެ ހަނގުރާމައިގައި މިހާތަނަށް ޖުމްލަ 74،736 ފަލަސްތީނު ރައްޔިތުން ވަނީ ޝަހީދުވެފައެވެ.


ފިނި މޫސުމާއި އެހީގެ ސާމާނު ވެއްދުމަށް ހުރި ހުރަސްތައް

ފިނި މޫސުމުގެ ސަބަބުން ގާޒާގެ ހާލަތު އިތުރަށް ގޯސްވެފައިވާއިރު، ދުނިޔޭގެ ކާބޯތަކެތީގެ ޕްރޮގްރާމް (ޑަބްލިއުއެފްޕީ) އިން ވަނީ ކާބޯތަކެތި ކެއްކުމަށްޓަކައި ފަލަސްތީނު ރައްޔިތުންނަށް ކުނި އެންދުމަށް މަޖުބޫރުވެފައިވާ ކަމުގެ އިންޒާރު ދީފައެވެ. ފަލަސްތީނަށް ކަނޑައަޅާފައި ހުންނަވާ ޑަބްލިއުއެފްޕީގެ ކަންޓްރީ ޑިރެކްޓަރު ޝޯން ހިއުސް ވިދާޅުވި ގޮތުގައި ވިއްސާރައިގެ ސަބަބުން މިހާރު އެ ކުނިތައްވެސް ވަނީ ތެމިފައެވެ.


އަނެއްކޮޅުން، އިންޓަނޭޝަނަލް އޯގަނައިޒޭޝަން ފޯ މައިގްރޭޝަން (އައިއޯއެމް) އިން ހާމަކުރި ގޮތުގައި ޓެންޓުތަކުގެ މެދު ތަނބުގެ ފުޅާމިނަށް ކަނޑައަޅާފައިވާ މިންގަނޑުތައް ފަދަ އިޒްރޭލުގެ ހަރުކަށި ޝަރުތުތަކުގެ ސަބަބުން، މިސްރުގައި ހުރި 1 ލައްކައަށް ވުރެ ގިނަ ޓެންޓު ގާޒާއަށް އެތެރެކުރެވޭ ގޮތް ވަނީ ނުވެފައެވެ. ޝޯން ހިއުސް ވިދާޅުވީ އާންމުކޮށް އެތެރެކުރުމުގެ ހުއްދަ ލިބެނީ 38 މިލިމީޓަރަށް ވުރެ ކުޑަ ތަކެއްޗަށް ކަމަށާއި، އެއަށްވުރެ ބޮޑު ނަމަ ގަބޫލުނުކުރާ ކަމަށެވެ.


މިކަމާ ގުޅޭގޮތުން އައިއޯއެމްގެ ގާޒާ ޕްރޮގްރާމްގެ ވެރިޔާ ކާލް ބޭކާ ވިދާޅުވީ، އެ ޓެންޓުތަކަކީ ދެ ބޭނުމަކަށް ބޭނުންކުރެވިދާނެ ތަކެތި ކަމަށް ބުނެ އެއްވެސް ތަފްސީލެއް ނުދީ، ހަމައެކަނި އަންގަނީ އެ ވަގުތު އެ ތަކެތި ވެއްދުމުގެ ހުއްދަ ނެތް ކަމަށް އެކަނި ކަމަށެވެ. އަސާސީ ތަކެތި ނުލިބުމުގެ ބިރު އިންތިހާއަށް ބޮޑުވެފައިވާއިރު، ކުރިއަށް އޮތް ދުވަސްތަކަކީ ގާޒާގެ ރައްޔިތުންނަށް ޔަގީންކަމެއް ނެތް ދަތި ދުވަސްތަކަކަށް ވާނެ ކަމަށް ނޫސްވެރިޔާ އަލްހަލީލީ ބުންޏެވެ.

Topics:
Share this article: Facebook Twitter WhatsApp
Ad #92027 Registration Open!Robotics · Python · AI · Design & 3D · Digital marketing
  • Robotics for kids & teens
  • Python programming
  • Artificial intelligence
  • Design, 3D & multimedia
☎ 777 4147Register now →
Related Articles
ގުޅުންހުރި ޚަބަރުތައް
ReelsWatch all