ފްލައިދުބާއީ ހާދިސާގެ ކެޕްޓަން ބޯޓު ސަލާމަތްކުރި ގޮތުގެ ތަފްސީލު ކިޔައިދީފި
ދުބާއީން ތެލް އަވީވަށް ދަތުރުކުރި ފްލައިދުބާއީ ފްލައިޓް FZ1073 ގެ ކޮކްޕިޓް ތެރޭގައި ހިނގި ނުރައްކާތެރި ހާދިސާގައި، ޒަޚަމްވެފައި ހުރެގެންވެސް ބޯޓާއި ފަސިންޖަރުން ސަލާމަތްކުރުމަށް ކުރި މަސައްކަތުގެ ތަފްސީލު އެ ފްލައިޓުގެ ކެޕްޓަން ސްމިޓް މަޗާރު ކިޔައިދީފިއެވެ.
އަބޫދާބީގެ ހޮސްޕިޓަލުގައި އޮންނަވައިގެން ބައިނަލްއަގުވާމީ މީޑިއާތަކަށާއި އިންޑިއާގެ ބޮޑުވަޒީރު ނަރެންދުރަ މޯދީއާ ފޯނުން ދެއްކެވި ވާހަކަފުޅުގައި ކެޕްޓަން މަޗާރު ވިދާޅުވީ، ކޮކްޕިޓް ތެރޭގައި ހަމަލާދިނުމާ ގުޅިގެން ބޯޓު ކުއްލިއަކަށް 14,000 ފޫޓަށް ތިރިއަށް ވެއްޓެމުންދިޔަ ވަގުތު، އޭނާއަށް ބޮޑެތި އަނިޔާތަކެއް ވެފައިވާ ކަމަށެވެ. އަދި ލޭފޭބުމުގެ ސަބަބުން ޚަބަރުހުސްވާން އުޅުނު ނަމަވެސް، އެންމެ ފަހު ހިތްވަރާއެކު ކޮކްޕިޓުގެ ދޮރު ހުޅުވާލުމުން، ބޯޓުގައި ތިބި އިސްރާއީލު ފަސިންޖަރުންނާއި ކްރޫއިން އެތެރެއަށް ވަދެ ހަމަލާދިން މީހާ ހިފެހެއްޓި ކަމަށް އޭނާ ކިޔައިދިނެވެ.
މީގެއިތުރުން، ސޯޝަލް މީޑިއާގައި އާންމުވެފައިވާ އޭނާގެ ކުރީގެ އިންޓަވިއުއެއްގައި ކެޕްޓަން މަޗާރު ވަނީ ވައިގެ ތެރޭގައި ނުރައްކާތެރި ކަމެއް ދިމާވެއްޖެނަމަ ހާސްނުވެ، އިމަރޖެންސީ އުސޫލުތަކަށް އަމަލުކުރުމުގެ މުހިންމުކަމުގެ މައްޗަށް އަލިއަޅުވާލާފައެވެ. އޭނާގެ ރަހުމަތްތެރިން ސިފަކުރާ ގޮތުގައި، ކެޕްޓަން މަޗާރަކީ އަބަދުވެސް ކަންކަމުގައި ކެތްތެރި، ހާސްވުމެއްނެތި ނިންމުންތައް ނިންމާ ގާބިލު ޕައިލެޓެކެވެ.
މި ހާދިސާގައި ލިބުނު އަނިޔާތަކަށް ކެޕްޓަން މަޗާރަށް މިހާރު ފަރުވާދެމުންދާއިރު، އޭނާ ދެއްކެވި ހިތްވަރަށް އިންޑިއާއާއި އިސްރާއީލުގެ އިތުރުން ބައިނަލްއަގުވާމީ ފެންވަރުގައި ވަނީ ތައުރީފުކޮށްފައެވެ. މައްސަލައިގެ މައިގަނޑު ސަބަބު ދެނެގަތުމަށް ޔޫއޭއީއާއި ސައޫދީ އޮތޯރިޓީތަކުން ކުރިއަށްގެންދާ ރަސްމީ ތަހުގީގު އަދިވެސް ދަނީ ކުރިއަށެވެ.
