ޝާހިދުގެ މައްޗަށް ކުރެވޭ ތުހުމަތުތަކަކީ ޙަޤީޤަތެއް ނެތް ދޮގު ވާހަކަތަކެއް: ދަރިކަލުން ޔާމީން
ކުރީގެ ޚާރިޖީ ވަޒީރު އަދި އދ. ގެ އާންމު މަޖިލީހުގެ ކުރީގެ ރައީސް ޢަބްދުﷲ ޝާހިދުގެ މައްޗަށް ކުޑަކުއްޖަކަށް ޖިންސީ ގޯނާކުރި ކަމަށް ބުނެ ކުރެވޭ ތުހުމަތުތަކަކީ މުޅިން ދޮގު އަދި އަސާސެއް ނެތް ތުހުމަތުތަކެއް ކަމަށް އެމަނިކުފާނުގެ ދަރިކަލުން ޔާމީން ޢަބްދުﷲ ވިދާޅުވެއްޖެއެވެ.
ކޯޓު އަމުރެއްގެ ދަށުން ޝާހިދު ހައްޔަރުކުރުމާ ގުޅިގެން، އެމަނިކުފާނުގެ ޢާއިލާގެ ފަރާތުން މީޑިއާތަކަށާއި ސޯޝަލް މީޑިއާގައި ޙިއްޞާކުރި މެސެޖެއްގައި ޔާމީން ވިދާޅުވީ، ޝާހިދުގެ އަބުރު ކެނޑުމަށާއި ސިޔާސީ ބޭނުމަކަށްޓަކައި ފަތުރަމުންދާ މިފަދަ ވާހަކަތައް އެންމެ ހަރުކަށި އިބާރާތުން ކުށްވެރިކުރާ ކަމަށެވެ. އަދި ހައްޔަރުކުރުމުގެ ކުރިންވެސް ޝާހިދު ވަނީ އެ ތުހުމަތުތައް އަމިއްލަފުޅަށް ދޮގުކުރައްވައި، ޙަޤީޤަތާ ޚިލާފު ވާހަކަތައް ނުފެތުރުމަށް އިލްތިމާސްކުރައްވާފައެވެ.
މޯލްޑިވްސް ޕޮލިސް ސަރވިސްއިން ބުނެފައިވަނީ 18 އަހަރުން ދަށުގެ ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ޝާހިދު ހައްޔަރުކޮށްފައިވަނީ ނޮވެމްބަރު 2 ވަނަ ދުވަހުގެ ރޭ 21:59 ހާއިރު ކަމަށެވެ. މައްސަލައިގެ ތަޙުޤީޤު ކުރިއަށްދާއިރު، އިތުރު ތަފްޞީލު ފުލުހުން އަދި ހާމަކޮށްފައެއް ނުވެއެވެ.
ޝާހިދުގެ ޢާއިލާއިން ބުނަނީ ޤާނޫނީ ގޮތުން ކުރިމަތިލައިގެން މިއީ އެއްވެސް އަސާސެއް ނެތް މައްސަލައެއްކަން ސާބިތުކޮށްދޭނެ ކަމަށެވެ
