ސަޢޫދީ ޢަރަބިއްޔާގެ ތެޔޮ ރިފައިނަރީއަށް ހަމަލާ ދިންކަމަށް ހޫޘީންގެ ދަޢުވާ؛ ދުނިޔޭގެ ތެޔޮ އަގު މައްޗަށް
ޔަމަނުގެ ހޫޘީ ހަނގުރާމަވެރިން ސަޢޫދީ ޢަރަބިއްޔާގެ ބޮޑު ތެޔޮ ރިފައިނަރީއަކަށް މިސައިލު ހަމަލާއެއް ދިން ކަމަށް ދަޢުވާކުރުމާ ގުޅިގެން، ދުނިޔޭގެ ބާޒާރުގައި ތެލުގެ އަގު ވަރަށް ބޮޑަށް އުފުލިއްޖެއެވެ.
ހޫޘީން ބުނެފައިވަނީ އެ ޖަމާޢަތުން ހަމަލާ އަމާޒުކުރީ ދުވާލަކު 550،000 ބާރެލް ތެޔޮ ސާފުކުރުމުގެ ޤާބިލުކަން ލިބިފައިވާ ސަޢޫދީގެ މައި އެއް ތެޔޮ ބަނދަރު ކަމަށްވާ ރާސް ތަނޫރާ ރިފައިނަރީއަށް ކަމަށާއި، މި ހަމަލާއާ އެކު އެތަނުގައި ބޮޑު އަލިފާނުގެ ހާދިސާއެއް ހިނގި ކަމަށެވެ. ނަމަވެސް، މި ހަމަލާގައި އެއްވެސް ގެއްލުމެއް ލިބުނުކަން ނުވަތަ ހަމަލާ އަމާޒުވިކަން ސަޢޫދީ އަރަބިއްޔާގެ ސަރުކާރުން އަދި ރަސްމީކޮށް ކަށަވަރުކޮށްދީފައެއް ނުވެއެވެ. މީގެ އިތުރުން ސަޢޫދީ އަސްކަރިއްޔާއިން އާންމުކޮށް ބުނަމުންދަނީ އެ ޤައުމުގެ ސަރަޙައްދުތަކަށް އަމާޒުކޮށް ފޮނުވާ މިފަދަ ޑްރޯންތަކާއި މިސައިލްތައް ވައިގެ ތެރޭގައި ދިފާޢީ ބާރުތަކުން ގޮއްވާލައި ނާކާމިޔާބު ކޮށްލާފައިވާ ކަމަށެވެ.
ދުނިޔޭގެ މާލީ ބާޒާރުތަކުގެ މަޢުލޫމާތުތަކަށް ބަލާއިރު، މި ޚަބަރާއެކު ބައިނަލްއަޤްވާމީ މާކެޓުގައި ތެލުގެ އަގުތައް ވަނީ ކުއްލިއަކަށް މައްޗަށް އަރައިގެން ގޮސްފައެވެ. އެގޮތުން ބްރެންޓް ކްރޫޑް ތެޔޮ ބާރެލެއްގެ އަގު 1.8 އިންސައްތައިން މައްޗަށް ޖެހިލައި، ބާރެލެއްގެ އަގު ވަނީ 115.90 އެމެރިކާ ޑޮލަރަށް އަރާފައެވެ. އަދި އެމެރިކާގެ ވެސްޓް ޓެކްސަސް އިންޓަރމީޑިއޭޓް (WTI) ތެލުގެ އަގު 2 އިންސައްތަ އުފުލި، ބާރެލެއްގެ އަގު ވަނީ 101.91 އެމެރިކާ ޑޮލަރަށް އުފުލިފައެވެ.
ރާސް ތަނޫރާ އަކީ ދުނިޔޭގެ އެކި ކަންކޮޅުތަކަށް ސަޢޫދީން ތެޔޮ ބޭރުކުރުމުގައި މުހިންމު ދައުރެއް އަދާކުރާ އެންމެ ބޮޑު އެއް ޓާމިނަލް ކަމަށްވާތީ، އެފަދަ ނާޒުކު ތަނަކަށް ކުޑަވެސް ގެއްލުމެއް ލިބިއްޖެނަމަ ބައިނަލްއަޤްވާމީ ތެލުގެ ސަޕްލައިއަށް ބޮޑު ލޮޅުމެއް އަރާނެ ކަމަށް މާކެޓް އެނަލިސްޓުން ލަފާކުރެއެވެ. ޚާއްޞަކޮށް މެދުއިރުމަތީގެ ސަރަޙައްދީ ހަމަޖެހުން ގެއްލި، ހަނގުރާމައިގެ ނުރައްކާތެރިކަން ބޮޑުވަމުންދާ މި ދަނޑިވަޅުގައި ތެޔޮ އުފެއްދުމަށާއި އެކްސްޕޯޓްކުރުމަށް ހުރަސްއެޅިދާނެ ކަމުގެ ބިރު މާކެޓްތަކުގައި ވަނީ ބޮޑުވެފައެވެ.
ދުނިޔޭގެ ބާޒާރުގައި ތެލުގެ އަގު މިގޮތަށް މައްޗަށް ދިއުމަކީ، ރާއްޖެ ފަދަ އަމިއްލައަށް ތެޔޮ ނުއުފައްދާ އަދި އެއްކޮށް އިމްޕޯޓަށް ބަރޯސާވާ ޤައުމުތަކުގެ އިޤްތިޞާދަށް އޭގެ ނޭދެވޭ އަސަރު ވަރަށް ބޮޑަށް ފޯރާނެ ކަމެކެވެ. މީގެ ސަބަބުން ކަރަންޓު އުފެއްދުމަށާއި، ދަތުރުފަތުރަށާއި، މުދާ އުފުލުމުގެ ޚަރަދުތައް ބޮޑުވެ، ޢާންމު އިންފްލޭޝަން ނުވަތަ މުދަލާއި ޚިދުމަތްތަކުގެ އަގުތައް އިންތިހާއަށް މައްޗަށް ދިއުމުގެ ފުރުޞަތު ބޮޑުވެގެންދާނެއެވެ.
