އިންޑިޔާގެ ވެރިރަށް ނިއުދިއްލީގައި ނުރައްކާތެރި މިންވަރަކަށް ވައި ނުސާފުވެއްޖެ
އިންޑިއާގެ ވެރިރަށް ނިއުދިއްލީގެ ވައިގެ ނުސާފުކަން (އެއާ ޕޮލިއުޝަން) މީގެ ކުރިން ނުދެކޭހާ ނުރައްކާތެރި މިންވަރަކަށް މައްޗަށް ގޮސް، އާންމު ދިރިއުޅުމަށާއި ސިއްހީ ނިޒާމަށް ބޮޑެތި ގޮންޖެހުންތަކަކާ ކުރިމަތިލާންޖެހިއްޖެއެވެ.
ވެރިރަށާއި ވަށައިގެންވާ ސަރަހައްދުތަކުގައި ވައިގެ ފެންވަރު ދައްވެގެން ގޮސް، ވައިގެ ނުސާފުކަން އިންތިހާއަށް އިތުރުވެފައިވާއިރު، މިއީ ކޮންމެ އަހަރެއްގެވެސް މި ދުވަސްވަރަށް ދިމާވާ ކަންބޮޑުވާންޖެހޭ މައްސަލައެކެވެ.
ދިއްލީގެ ވައި ނުސާފުވުމުގެ ފަހަތުގައި އެއް ސަބަބަށްވުރެ ގިނަ ސަބަބުތައް އެކުލެވިގެންވެއެވެ. އޭގެ ތެރޭގައި ހިމެނެނީ:
ކައިރި ރަށްރަށުގައި ދަނޑުވެރިކަމުގެ ކުނި އަންދާލުން އަހަރުގެ މި ދުވަސްވަރު، އަވަށްޓެރި ޕަންޖާބާއި ހަރިޔާނާ ފަދަ ސްޓޭޓްތަކުގައި ދަނޑުވެރިން ބާކީވާ ބައިތައް އަންދާލުމުގެ ސަބަބުން އުފެދޭ ދުންތައް ވެރިރަށާ ދިމާލަށް ޖަމާވުން.
ވެހިކަލްތަކުން ދުން އެރުމާއި އާބާދީ ބޮޑުވެ، މަގުތަކުގައި ދުއްވާ އުޅަނދުތަކުން ބޭރުވާ ދުމާއި، ސިނާއީ ސަރަހައްދުތަކުން ނުކުންނަ ނުސާފު ގޭސްތައް މާހައުލަށް ދޫވުން.
މިދުވަސްވަރު ފިނި މޫސުން ފެށެމުން އަންނާތީ، ވައިގެ ބާރުމިން ދަށްވެ، ވިހަ މާއްދާތަކާއި ދުންތައް ވައިގެ ތެރޭގައި ތާށިވެފައި ހުރުން.
މިކަމުގެ ސަބަބުން ސިއްހީ ގޮތުން ކުރިމަތިވާ ނުރައްކާތަކުގެ ތެރޭގައި :
ވައިގެ ނުސާފުކަން އެންމެ މަތީ ދަރަޖާގައި ހުރުމުގެ ސަބަބުން އާންމުންނަށް ސީދާ ނޭދެވޭ އަސަރުތަކެއް ކުރަމުންދެއެވެ. މީގެތެރޭގައި ނޭވާހިއްލުމުގެ ބަލި ހުންނަ މީހުންނާއި ފުއްޕާމޭގެ މައްސަލަ ހުންނަ މީހުންނަށް ނޭވާލާން އުނދަގޫވެ، ހޮސްޕިޓަލްތަކަށް ދައްކާ މީހުންގެ އަދަދު ވަނީ އިތުރުވެފައެވެ.
މަގުމައްޗަށް ނުކުމެ އުޅޭއިރު ލޯ ހިރުވުމާއި، ކަރުން ދިލަ ނެގުމުގެ އިތުރުން ބޯއެނބުރުން ފަދަ އާންމު އުނދަގޫތައް ވަނީ ކުރިމަތިވެފައެވެ.
މިހާލަތުގައި ސަރުކާރުން އަޅާފައިވާ ފިޔަވަޅުތަކުގެ ތެރޭގައި ވައި ނުސާފުވުމުގެ ސަބަބުން ކުޑަކުދިންގެ ސިއްހަތަށް ރައްކާތެރިވުމުގެ ގޮތުން ބައެއް ސްކޫލްތައް ބަންދުކޮށް، އޮންލައިންކޮށް ކިޔައިދޭން ވަނީ ފަށާފައެވެ. އަދި ވައިގެ ތެރެއަށް ހިރަފުސް އެރުން މަދުކުރުމުގެ ގޮތުން ވެރިރަށުގައި ހިންގާ ބޮޑެތި އިމާރާތްކުރުމުގެ މަސައްކަތްތައް ވަނީ ވަގުތީގޮތުން މެދުކަނޑާލާފައެވެ. މީގެ އިތުރުން ވައި ނުސާފުކުރާ ބާވަތުގެ ބައެއް އުޅަނދުތައް މަގުތަކުގައި ދުއްވުން މަނާކޮށް، ޕަބްލިކް ޓްރާންސްޕޯޓް ބޭނުންކުރުމަށް ވަނީ އިރުޝާދު ދީފައިވެއެވެ.
