ގޯލާން ހައިޓްސް އަކީ އަދިވެސް ސޫރިޔާގެ ބިމެއް؛ އިޒްރޭލު އެސަރަހައްދުން ފޭބުމަށް ސޫރިޔާ ރައީސް ގޮވާލައްވައިފި

ސޫރިޔާގެ އަޙްމަދު އަލް ޝަރާ ވިދާޅުވެފައިވަނީ އިޒްރޭލުން ގޯލާން ހައިޓްސް އެނެކްސް ކޮށްގެން އުޅުނު ނަމަވެސް، އެ ސަރަހައްދަކީ އަދިވެސް ސޫރިޔާގެ ބިމެއް ކަމަށެވެ. އދ.ގެ 81 ވަނަ އާންމު ޖަލްސާގައި ވާހަކަފުޅު ދައްކަވަމުން، ރައީސް ވިދާޅުވީ ސޫރިޔާގެ ސިޔާދަތާއި ބެހޭ އިންޓަރނޭޝަނަލް ޤާނޫނު ހިމާޔަތްކުރުމަކީ ސޫރިޔާގެ އަސާސީ މަޤްޞަދު ކަމަށެވެ.

އަލް ޝަރާ ވިދާޅުވީ، ގޯލަން ހައިޓްސް އަކީ ސޫރިޔާއާ ވަކިނުވާނެ ބައެއް ކަމަށާއި، އެ ސަރަހައްދުގެ މަތިން ސޫރިޔާގެ ޙައްޤު އުވާލަދެވޭނެ ގޮތެއް ނެތް ކަމަށެވެ. އޭނާ ވިދާޅުވި ގޮތުގައި، “ގޯލަން އަކީ ސޫރިޔާގެ ބިމެއް” ނޫންކަމަށް ވާނެ އެއްވެސް ގޮތެއް ނޯންނާނެކަމަށެވެ.

ރައީސްގެ ބަސްފުޅުތަކުގައި، އޭނާ އިޒްރޭލުން ސޫރިޔާގައި ހިންގާފައިވާ ވައިގެ ހަމަލާތަކާއި ބިމުގެ ހަރަކާތްތަކަށް ވެސް ދެކޮޅު ހަދާފައިވެއެވެ. އޭނާގެ ބުނުމުގައި، އޭނާ ވެރިކަމާއި ހަވާލުވިފަހުން ފާއިތުވި ދެއަހަރު ތެރޭގައި 500 އަށް ވުރެ ގިނަ ވައިގެ އަދި އާޓިލަރީ ހަމަލާތައް ސޫރިޔާއަށް ހިންގައިފައިވާއިރު، 1,200 އަށް ވުރެ ގިނަ ލޭންޑް އިންކާޝަން ހިންގައި، 300 އަށް ވުރެ ގިނަ މީހުން ހައްޔަރުކުރުމުގެ ޙާދިޘާތައް ވެސް އިޒްރޭލުން ހިންގި ކަމަށް ރިކޯޑުވެފައިވާ ކަމަށެވެ.

ގޯލަން ހައިޓްސް އަކީ 1967 ގެ މިޑްލް އީސްޓް ހަނގުރާމައިގައި އިޒްރޭލުން ހިފި ސީރިޔާގެ ސަރަހައްދެކެވެ. 1981 ވަނަ އަހަރު އިޒްރޭލުން އެ ބިން އެނެކްސް ކުރިނަމަވެސް، އދ. އަދި ގިނަ އިންޓަރނޭޝަނަލް ފަރާތްތަކުން އެ ސަރަހައްދަކީ އަދިވެސް ސޫރިޔާގެ ބިމެއް ކަމުގައި ބަލައެވެ.

ނަމަވެސް އަލް ޝަރާ ވިދާޅުވީ ދަތި ވާހަކަފުޅުތަކާއެކު ސުލްހަވެރި މަގެއް ހޯދުމަށް ވެސް އުންމީދު އޮތް ކަމަށެވެ. އޭނާ ވިދާޅުވީ، އަމާން އަދި އިންސާފުވެރި ސުލްހައަކީ އަދިވެސް ހޯދެވިދާނެ ހައްލެއް ކަމަށެވެ.