ގިނަސް ރެކޯޑަކަށް ވާވަރުގެ ނުރައްކާތެރި ހާދިސާއެއް: ގޭސް އަޅަން އޮތް ކާރެއް ކުއްލިއަކަށް ގޮވައި ބިންދައިގެން ހިނގައްޖެ!
އާންމުކޮށް ކާރަށް ތެޔޮ ނުވަތަ ގޭސް އަޅަން މަޑުކޮށްލާ ވަގުތަކީ އެއްވެސް ނުރައްކަލެއް ކުރިމަތިވެދާނެ ކަމަށް މީހުން ހީކުރާ ވަގުތެއް ނޫނެވެ. ނަމަވެސް، ކުއްލިއަކަށް މުޅި ސަރަހައްދު ސިއްސައިގެން ދިޔައީ ބާރުގަދަ އަޑުފައްޗަކާއެކު ގޭސް އަޅަން އޮތް ކާރެއްގެ ގޭސް ޓޭންކު ގޮވައި، މުޅި އުޅަނދު އެއްކޮށް ކުދިކުދިވެގެން ދިޔުމުންނެވެ. މި ބާރުގަދަ ގޮވުމާއެކު ކާރުގެ ބައިތަކާއި ބިއްލޫރިތައް އެތައް މީޓަރެއް ދުރަށް ބުރައިގެން ގޮސް، މުޅި ސަރަހައްދުގައި ބޮޑު ބިރުވެރިކަމެއް އުފެދިގެން ދިޔައެވެ.
މި ނުރައްކާތެރި ހާދިސާ ހިނގާފައިވަނީ އިންޑިއާގެ ގުޖުރާތު ނެޝަނަލް ހައިވޭ 48 (އެންއެޗް-48) ގައި އޮންނަ ކަރްޖަން ކައިރީގައި ހުންނަ ސީއެންޖީ (CNG) ގޭސް ސްޓޭޝަނެއްގައެވެ. އޮކްޓޯބަރު 1 ވަނަ ދުވަހުގެ މެންދުރުގެ ވަގުތެއްގައި ހިނގި މި ހާދިސާގައި، ގޭސް އަޅަން އޮތް ކާރުގެ ޓޭންކު ގޮވައި، ކައިރީގައި މަޑުކޮށްފައި އޮތް އެހެން ދެ އުޅަނދަކަށްވެސް ވަނީ ބޮޑެތި ގެއްލުންތަކެއް ލިބިފައެވެ.
މިފަދަ ބާރުގަދަ ގޮވުމެއް ގޮވިނަމަވެސް، އިލާހީ ރަހުމަތްފުޅުން މި ހާދިސާގައި އެއްވެސް މީހެއްގެ ފުރާނައަށް ގެއްލުމެއް ނުވެއެވެ. ސަބަބަކީ ގޭސް އަޅަމުންދިޔަ ވަގުތު ކާރުގެ އެތެރޭގައި އެއްވެސް މީހަކު ނެތުމެވެ. ހާދިސާ ހިނގުމާއެކު ކަރްޖަންގެ ފަޔާ މެރިން ޓީމާއި ފުލުހުން ވަނީ ވަގުތުން އެ ސަރަހައްދަށް ގޮސް، އިތުރު ނުރައްކަލެއް ނުވާނެހެން ރައްކާތެރިކަމުގެ ފިޔަވަޅުތައް އަޅާފައެވެ.
