500 މިލިއަން ޑޮލަރުގެ ހުޅުމާލެ ޕްރޮޖެކްޓް: 5،000 ހައުސިން ޔުނިޓުގެ ފުރަތަމަ ފެނިލުން! 🏢
ޔޫއޭއީގެ އީ ގަލް ހިލްސް ކުންފުނިން ހުޅުމާލޭގެ ތިންވަނަ ފިޔަވަހީގައި ކުރިއަށް ގެންދިއުމަށް ހަމަޖެހިފައިވާ 5،000 ހައުސިން ޔުނިޓުގެ ބޮޑު މަޝްރޫއުގެ ކޮންސެޕްޓް ވީޑިއޯ ސޯޝަލް މީޑިއާގައި އާންމުކޮށްފިއެވެ. މި ވީޑިއޯ އާންމުކުރެއްވީ ހައުސިން މިނިސްޓަރު ޑރ. އަބްދުﷲ މުއްތަލިބެވެ.
އާންމުކުރި ވީޑިއޯއިން ފެންނަ ގޮތުގައި މި މަޝްރޫއުގެ ދަށުން ރެސިޑެންޝަލް ޓަވަރުތަކާއި ވޯޓާފްރަންޓް ޓައުންހޯމްތައް ތަރައްގީކުރާނެއެވެ. މީގެ އިތުރުން ކުޅިވަރު ކުޅޭނެ ވަސީލަތްތަކާއި، ކެފޭ އަދި ރެސްޓޯރަންޓްތައްވެސް މި ސަރަހައްދުގައި ގާއިމުކުރުމަށް ވަނީ ނިންމައިފައެވެ.
މި މަޝްރޫއުގެ އަމަލީ މަސައްކަތް ފެށުމަށް ތައްޔާރުވަމުންދަނީ 2027 ވަނަ އަހަރުގެ ކުރީކޮޅުގައެވެ. އީގަލް ހިލްސްގެ ޗެއާމަން މުޙައްމަދު އަލީ އަލްއައްބާރު ވިދާޅުވެފައިވަނީ، ގާތްގަނޑަކަށް 500 މިލިއަން ޑޮލަރުގެ އަގުހުރި މި ބޯހިޔާވަހިކަމުގެ ބަޔަށް ފުރަތަމަ ހަރަދުކުރާނީ އެ ކުންފުނިން ކަމަށާއި، ފަހުން މުޅި މަޝްރޫއުގެ ތެރެއިން އެ އިންވެސްޓްމަންޓް އަނބުރާ ހޯދާނެ ކަމަށެވެ.
މިއީ ރާއްޖޭގައި 20 ބިލިއަން ޑޮލަރުގެ މަޝްރޫއެއް ހިންގުމަށް މިދިޔަ ސެޕްޓެމްބަރު 21 ގައި ވެވުނު އެއްބަސްވުމުގެ ބައެކެވެ. މީގެ އިތުރުން ރަސްމާލޭގައި ވޯޓާފްރަންޓާއި، މެރީނާ، ބައިނަލްއަގުވާމީ ފެންވަރުގެ ހޮޓާތަކާއި ރިސޯޓްތައް އަދި މަތީ ފަންތީގެ ބްރޭންޑަޑް ރެޒިޑެންސްތައް ތަރައްގީކުރުމަށްވެސް ވަނީ ހަމަޖެހިފައެވެ.
ނަމަވެސް އީގަލް ހިލްސްއާއެކު ވެވިފައިވާ މި އެއްބަސްވުމުގައި ކަންބޮޑުވާންޖެހޭ ގިނަ ކަންތައްތަކެއް ހުރިކަމަށް ބުނެ އިދިކޮޅު ސިޔާސީ ފަރާތްތަކުންނާއި އާންމުންގެ ބައެއް ފަރާތްތަކުން ދަނީ ކަންބޮޑުވުން ފާޅުކުރަމުންނެވެ.
