ސާފު ޗެންޕިއަންޝިޕްގެ ތާރީޚްގައި ރާއްޖެއަށް ލަނޑެއްވެސް ނުޖެހި މުބާރާތުން ކަޓައިފި
އެންމެ ފަހުގެ ޗެމްޕިއަން އިންޑިއާ އަތުން 1-0 އިން ބަލިވެ ރާއްޖެއަށް މުބާރާތް ނިމިއްޖެ އެވެ.
ބަންގްލަދޭޝްގައި މިހާރު ކުރިއަށްދާ ސާފް ޗެމްޕިއަންޝިޕްގައި މިހާތަނަށް ރާއްޖޭން ހޯދި އެންމެ ދަށް ނަތީޖާއާ އެކު މުބާރާތުން ރާއްޖެ ކަޓައިފިއެވެ. ދިވެހި ޓީމަށް އެންމެ ލަނޑެއް ވެސް ނުޖެހެ އެވެ. މިއީ ސާފް ޗެމްޕިއަންޝިޕްގެ ތާރީހުގައި ރާއްޖެ އަށް ލަނޑެއް ވެސް ނުޖެހުނު ފުރަތަމަ ފަހަރެވެ.
ޑާކާގެ ގައުމީ ސްޓޭޑިއަމްގައި ކުޅުނު މެޗުގައި އިންޑިއާގެ ލަނޑަކީ ލިބުނު ޕެނަލްޓީއަކުން ޖެހި ލަނޑެކެވެ. މޮޅާ އެކު އިންޑިއާ ވަނީ ހަ ޕޮއިންޓް ހޯދައި ގުރޫޕްގެ އެއްވަނައިގައި ސެމީ ފައިނަލަށް ދަތުރުކޮށްފަ އެވެ. ގުރޫޕްގެ ދެވަނަ ހޯދީ ޕާކިސްތާނެވެ.
ތޭވިސް އަހަރުންދަށުގެ ކުޅުންތެރިން ބައިވެރި ކުރުވި އިންޑިއާގެ ޓީމުވަނީ ކޯޗު ނައުޝާދު މޫސާގެ އިރުޝާދުގެދަށުން، ކުޅުނު ދެ މެޗު ވެސް ކޮންޓްރޯލް ހޯދައިގެން ނަތީޖާ ނެރެފަ އެވެ.
ރާއްޖެއާ ދެކޮޅަށް އިންޑިއާއިން މެޗުގެ ކުރިހޯދީ 38 ވަނަ މިނެޓުގައި ލިބުނު ޕެނަލްޓީއަކުންނެވެ. މިއީ އިންޑިއާގެ ވިންގާ އަބްދުލް ރަބީހަށް ރާއްޖޭގެ ޑިފެންޑަރު ހުސައިން ސިފާއު ޔޫސުފް (ކުރޯ) އޭރިއާ ތެރެއިން ކުރި ފައުލަކަށް ލިބުނު ޕެނަލްޓީއެކެވެ.
މި ޕެނަލްޓީ ކާމިޔާބުކުރީ ޒުވާން ފޯވާޑް ސުހޭލް އަހުމަދު ބަޓްއެވެ. މިއީ އޭނާ މި މުބާރާތުގައި ޖެހި ތިންވަނަ ލަނޑެވެ.
ރާއްޖޭގެ ފުރަތަމަ މެޗުގައި ޕާކިސްތާން އަތުން 3-0 އިން ބަލިވުމުން މުބާރާތުގައި ދެމިއޮތުމަށް މޮޅެއް ހޯދަން މަޖުބޫރުވެފައިވާ ދިވެހި ޓީމުން ވަނީ ދެވަނަ ހާފުގައި ކުޅުން ރަނގަޅު ވެސް ކުރިއެވެ.
ޒުވާން ފޯވާޑް އީތަން އިބްރާހިމް ޒަކީ ވަނީ އިންޑިއާގެ ޑިފެންސަށް ބާރުބޮޑުކޮށްފަ އެވެ. މެޗުގެ އެންމެ ފަހު ވަގުތުކޮޅު ރާއްޖެއިން ލަނޑެއް ޖެހުމާ ވަރަށް ގާތަށް ދިޔަ އެވެ. އިންޑިއާގެ ގޯލްކީޕަރު ޕްރިޔާންޝް ދުބޭ ވަނީ ނުރައްކާތެރި ހަމަލާއެއް ދިފާއުކޮށްފަ އެވެ.
އަންނަ ހޮނިހިރު ދުވަހު ކުޅޭ ސެމީ ފައިނަލަކީ އިންޑިއާއިން 10 ވަނަ ފަހަރަށް ސާފް ޗެމްޕިއަންޝިޕްގެ ތަށި ހޯދުމަށް ކުރާ ދަތުރުގެ ދެން އޮތް މެޗެވެ. ގުރޫޕްގެ އެއްވަނަ ހޯދުމުން އިންޑިއާއިން ވާދަކުރަން ޖެހޭނީ ގުރޫޕް އޭގެ ދެވަނަ ހޯދާ ޓީމަކާ ދެކޮޅަށެވެ. އެ ގުރޫޕުން ސެމީގެ ޖާގަ އަދި ލިބުނީ ބަންގްލަދޭޝްއަށެވެ. ލަންކާ އޮތީ ދެވަނައިގަ އެވެ.

