ރާއްޖޭގެ އިސްލާމީ އައިޑެންޓިޓީއަށް އުނިކަން އަންނަ ފަދަ ކަންކަން ކުރާނަމަ ގާނޫނީ ފިޔަވަޅު އަޅާނެ ކަމުގެ އިންޒާރު އިސްލާމިކް މިނިސްޓަރު ދެއްވައިފި
ދިވެހިރާއްޖޭގެ ސައްތައިން ސައްތަ އިސްލާމީ އައިޑެންޓިޓީއާއި، ގައުމީ ޝަހުސިއްޔަތު ކިލަނބުވާ ފަދަ އެއްވެސް އަމަލެއް ހިންގައި، ދީނީ ގޮތުން ބައިބައިވުން އުފައްދަން މަސައްކަތްކުރާ ފަރާތްތަކާމެދު ގާނޫނީ ގޮތުން އަޅަންޖެހޭ އެންމެހައި ފިޔަވަޅުތައް އަޅުއްވާނެ ކަމުގެ ވަރުގަދަ އިންޒާރެއް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ދެއްވައިފިއެވެ.
މިނިސްޓަރު ޝަހީމް މިފަދައިން ވިދާޅުވެފައިވަނީ ސޯޝަލް މީޑިއާގެ ތަފާތު މަންސަތަކާއި އާންމު ތަންތަނުގައި އިސްލާމްދީނުގެ ހުރުމަތް ކެނޑޭ ގޮތަށާއި، ދިވެހިންގެ ތެރޭގައި އޮތް ބަދަހި ދީނީ އެއްބައިވަންތަކަމަށް ބުރުލޫރުވާ ގޮތަށް ބައެއް ފަރާތްތަކުން ވާހަކަދައްކައި އަމަލުކުރަމުންދާ ކަމަށް ބުނެ އާންމުންގެ ކަންބޮޑުވުންތައް އިތުރުވެފައިވާ ދަނޑިވަޅެއްގައެވެ.
އިސްލާމިކް މިނިސްޓަރު ފާހަގަކުރެއްވި ގޮތުގައި، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ އެންމެ މުހިންމު އެއް އަސާސަކީ އިސްލާމްދީން ކަމަށްވާއިރު، ގައުމުގެ އިސްލާމީ އާދަކާދަތަކާއި އަގުތައް ހިމާޔަތްކޮށް ރައްކާތެރިކުރުމަކީ ދައުލަތުގެ މުއައްސަސާތަކުގެ އިތުރުން މުޅި މުޖުތަމައުގެ މައްޗަށްވެސް އޮތް ގައުމީ އަދި ދީނީ ބޮޑު ވާޖިބެކެވެ. އަދި ޚިޔާލުފާޅުކުރުމުގެ މިނިވަންކަމުގެ ނަމުގައި ނަމަވެސް، މާތްވެގެންވާ އިސްލާމްދީނަށާއި ކީރިތި ރަސޫލާއަށް ތައުހީނުކުރުމާއި، ދީނީ ކަންކަމަށް ގޮންޖަހައި ފުރައްސާރަކުރުމަކީ ދިވެހި މުޖުތަމައުގައި އެއްވެސް ޖާގައެއް ދެވޭނެ ކަންކަމެއް ނޫން ކަމަށްވެސް އޭނާ ވިދާޅުވިއެވެ.
މީގެއިތުރުން، ދިވެހިރައްޔިތުންގެ ދީނީ އެއްބައިވަންތަކަން ހިމާޔަތްކުރުމުގެ ގާނޫނާއި ޖިނާއީ ގާނޫނުގެ ދަށުން، އިސްލާމްދީނާ ހިލާފު ޝިއާރުތައް ފެތުރުމާއި، ފިތުނަފަސާދަ އުފެދޭ ގޮތަށް ވާހަކަދެއްކުމަކީ ބޮޑެތި ކުށްތަކުގެ ތެރޭގައި ހިމެނޭ ކަންކަންކަން މިނިސްޓްރީން ހަނދާންކޮށްދެއެވެ. އެހެންކަމުން، މިފަދަ އަމަލުތައް ހިންގާ ފަރާތްތައް ހޯދައި، ކަމާބެހޭ މުއައްސަސާތަކާއި މޯލްޑިވްސް ޕޮލިސް ސާވިސްއާ ގުޅިގެން ގާނޫނީ ފިޔަވަޅު އެޅުމުގައި އިސްލާމިކް މިނިސްޓްރީން ފަސްނުޖެހޭނެ ކަމަށް ވަނީ ހާމަކުރައްވާފައެވެ.
މިނިސްޓަރު ވަނީ ދީނީ ސަހީހު މައުލޫމާތު އުނގޭނުމަށާއި، އިސްލާމީ ރީތި އަހުލާގުގެ މަތީގައި ތަރުބިއްޔަތުވުމަށާއި، ގައުމުގެ އިސްލާމީ ބަދަހިކަން ދެމެހެއްޓުމަށް އެންމެހައި ދިވެހި ރައްޔިތުންނަށް އިލްތިމާސްކުރައްވާފައެވެ.

