ނުރައްކާތެރި ހަމަލާއެއްގެ އިންޒާރާއެކު އިނގިރޭސިވިލާތުގައި ތިބި އެމެރިކާގެ ބޮންއަޅާ ބޯޓުތައް އަނބުރާ ގެންގޮސްފި

އިނގިރޭސިވިލާތުގެ "އާރްއޭއެފް ފެއާފޯޑް" (RAF Fairford) އެއާބޭސްއަށް ނުރައްކާތެރި ހަމަލާއެއް ދޭން އުޅޭކަމުގެ އިންޒާރާއެކު، އެ ގްލޯބަލް ބޭސްގައި ތިބި އެމެރިކާގެ އެއާފޯސްގެ ސުޕަސޮނިކް ބީ-1ބީ (B-1B Lancer) ބޮމާ ބޯޓުތައް ކުއްލި ގޮތަކަށް އަނބުރާ އެމެރިކާއަށް ގެންގޮސްފިއެވެ.

ޕެންޓަގަންއިން މި ގޮތަށް ނިންމާފައިވަނީ، އެއާބޭސްއަށް ހަމަލާދޭން އުޅުނު ކަމުގެ ތުހުމަތުގައި އިނގިރޭސި ފުލުހުން ބަޔަކު ހައްޔަރުކޮށް، ސެކިއުރިޓީ ތްރެޓް ބޮޑުވުމާ ގުޅިގެންނެވެ. ރިޕޯޓުތައް ބުނާ ގޮތުގައި، މި ހަމަލާގެ ފަހަތުގައި އީރާނާ ގުޅުންހުރި ގުރޫޕްތަކެއްވާ ކަމަށް އިނގިރޭސިވިލާތާއި އެމެރިކާގެ އިންޓެލިޖެންސް އިދާރާތަކުން ދަނީ ތުހުމަތުކުރަމުންނެވެ.

އިނގިރޭސިވިލާތުގެ ފުލުހުން ވަނީ އެއާބޭސް ކައިރިން ގޮވާތަކެތި ހުރި ކަމަށް ޝައްކުކުރެވޭ ވެހިކަލްތަކަކާއެކު ތުހުމަތުކުރެވޭ ބަޔަކު ހައްޔަރުކޮށް، ތަހުގީގު ފަށާފައެވެ.

މި ހާދިސާއާ ގުޅިގެން، ރައްކާތެރިކަމުގެ ފިޔަވަޅެއްގެ ގޮތުން އެމެރިކާއިން ވަނީ އެއާބޭސްގައި އޮތް އެކުއެކީ 12 ބޮމާ ބޯޓު އަވަސް މުއްދަތެއްގެ ތެރޭގައި އަނބުރާ އެމެރިކާގެ ހޯމް ބޭސްތަކަށް ފޮނުވާލާފައެވެ. ސައިބާ އަދި އަސްކަރީ މާހިރުން ފާހަގަކުރާ ގޮތުގައި، މިއީ ފަހުގެ ތާރީޚެއްގައި އެމެރިކާއިން އިނގިރޭސިވިލާތުގައިވާ އެމީހުންގެ އަސްކަރީ ވަސީލަތްތައް މީގެ ކުރިން މިފަދަ ކުއްލި ގޮތަކަށް އަނބުރާ ގެންދިޔަ ފުރަތަމަ ފަހަރެވެ.