Ad #8Advertise hereSize: 728 × 90 pxSize: 800 × 200 px Call 768 2001 WhatsApp
News Featured

ކުޑަކުދިންނަށް ޖިންސީ ގޯނާކުރާ މީހުންގެ ދަފުތަރުގައި ހިމެނޭ 20 މީހަކު ގޭބަންދުގައި ތިބި ސަބަބު ސާފުކުރަން އިދާރާތައް ކޮމިޓީއަށް ހާޒިރުކުރަން އެދިއްޖެ

ކުޑަކުދިންނަށް ޖިންސީ ގޯނާކުރާ މީހުންގެ ދަފުތަރުގައި ހިމެނޭ 20 މީހަކު ގޭބަންދުގައި ތިބި ސަބަބު ސާފުކުރަން އިދާރާތައް ކޮމިޓީއަށް ހާޒިރުކުރަން އެދިއްޖެ
Photo: President's Office
ތަފްޞީލް

ޗައިލްޑް އެންޑް ފެމިލީ ޕްރޮޓެކްޝަން ސާވިސް (ސީއެފްޕީއެސް) އިން އާންމުކުރާ ކުޑަކުދިންނަށް ޖިންސީ ގޯނާކުރާ މީހުންގެ ދަފުތަރުގައި ހިމެނޭ 20 މީހަކު ގޭބަންދުގައި ތިބި މައްސަލައިގެ ތަފްސީލު ހޯދުމަށް، ކަމާގުޅުންހުރި އިދާރާތައް ރައްޔިތުންގެ މަޖިލީހުގެ ކޮމިޓީއަށް ހާޒިރުކޮށްދިނުމަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) އެދިވަޑައިގެންފިއެވެ.


ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲއަށް ކުޑޫ ފޮނުއްވި ސިޓީއެއްގައި ފާހަގަކުރައްވާފައިވަނީ، އެ ދަފުތަރުގައި ތިބި 20 މީހަކު މިހާރުވެސް ތިބީ ގޭބަންދުގައި ކަމަށެވެ. މިއީ ކުޑަކުދިންގެ ރައްކާތެރިކަމާ ސީދާ ގުޅިފައިވާ އަދި އާންމު ރައްޔިތުންގެ ބޮޑު ކަންބޮޑުވުމެއް އޮތް ނާޒުކު މައްސަލައެއް ކަމަށްވާތީ، މަޖިލީހުން މިކަމުގެ ހަގީގަތް ބަލައި، އަޅަންޖެހޭ ފިޔަވަޅުތައް އެޅުމަކީ މުހިންމު ކަމެއް ކަމަށް އޭނާ ވިދާޅުވިއެވެ.


މީގެ އިތުރުން، ކުޑަކުދިންނަށް ޖިންސީ ގޯނާކުރާ މީހުންނާ މެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގެ ދަށުން ބަންދުކުރެވޭ މީހުންނަށް ކަފާލާތު ނުވަތަ ޕެރޯލްގެ ފުރުސަތު ނުލިބޭނެކަން ގާނޫނުގައި ސާފުކޮށް ބަޔާންކޮށްފައިވާކަން ކުޑޫ ފާހަގަކުރެއްވިއެވެ. އެ ގާނޫނުގެ މައިގަނޑު މަގުސަދަކީ އެފަދަ ކުށްވެރިންގެ ހުކުމް ތަންފީޒުކޮށް ނިމެންދެން ޖަލުގައި ބައިތިއްބައިގެން ކުޑަކުދިންނަށް ރައްކާތެރިކަން ކަށަވަރުކޮށްދިނުން ކަމަށްވާއިރު، ހުކުމުގެ މުއްދަތުގައި އެ މީހުން ޖަލުން ގޭބަންދަށް ބަދަލުކުރީ ކޮން އުސޫލަކުންތޯ ސާފުކުރަން ޖެހޭ ކަމަށް އޭނާ ވިދާޅުވިއެވެ.


މި މައްސަލައިގައި ގާނޫނީ ޒިންމާ އުފުލަންޖެހޭ ފަރާތްތައް ދެނެގަނެ، ކަމާބެހޭ ކޮމިޓީއަށް ހާޒިރުކޮށްގެން ސާފުކުރުމަށް ކުޑޫ ހުށަހެޅުއްވި މުހިންމު ކަންތައްތަކުގެ ތެރޭގައި ހިމެނެނީ:

  • ގާނޫނީ ހައިސިއްޔަތު: ދަފުތަރުގައި ހިމެނޭ މީހުން ޖަލުން ގޭބަންދަށް ބަދަލުކުރީ ކޮން ގާނޫނެއް ނުވަތަ ގަވާއިދެއްގެ ދަށުން، ކޮން ފަރާތެއްގެ ނިންމުމަކުންތޯ ބެލުން.
  • ޝަރުތުތަކާއި މޮނިޓަރިންގ: ގޭބަންދުގައި ތިބުމަށް ކަނޑައަޅާފައިވާ ޝަރުތުތަކަކީ ކޮބައިކަމާއި، އެ ޝަރުތުތަކަށް އަމަލުކުރޭތޯ ބަލަހައްޓަނީ ކޮން އިދާރާއަކުންކަން އޮޅުންފިލުވުން.
  • ކައުންސިލާއި ބެލެނިވެރިންނަށް އެންގުން: އެ މީހުން ބައިތިއްބާފައިވާ ގެތަކާއި ރަށްރަށުގައި ކުޑަކުދިން ރައްކާތެރިކުރުމަށް އަޅާފައިވާ ފިޔަވަޅުތަކަކީ ކޮބައިކަމާއި، އެ ރަށްރަށުގެ ކައުންސިލްތަކަށާއި ގުޅުންހުރި ބެލެނިވެރިންނަށް އެކަން އަންގާފައިވޭތޯ ބެލުން.
  • ޓެގް އެޅުވުމުގެ ނިޒާމު: އެ މީހުން އުޅޭ ނޫޅޭ ގޮތް ބެލުމަށް ފައިގައި އިލެކްޓްރޯނިކް ޓެގް އަޅުވާފައިވޭތޯ ބެލުމާއެކު، އެކަމުގައި ކަމާބެހޭ ވުޒާރާއިން ގެންގުޅޭ ސިޔާސަތު ސާފުކުރުން.
  • އަނބުރާ ޖަލަށް ގެންދިއުން: ގޭބަންދުގައި ތިބި އެ މީހުން އަލުން ޖަލަށް ބަދަލުކުރުމަށްޓަކައި ކުރަމުންދާ މަސައްކަތްތައް އޮޅުންފިލުވުން.


ސިޓީ ނިންމަވާލައްވަމުން ކުޑޫ އެދިވަޑައިގެންފައިވަނީ، މިއީ ކުޑަކުދިންގެ ސަލާމަތާއި ރައްކާތެރިކަމާ ގުޅުންހުރި އިންތިހާއަށް ނާޒުކު މައްސަލައަކަށްވާތީ، މިކަމަށް އަވަސް އަދި ހަރުދަނާ ހައްލެއް ހޯދައިދިނުމަށް މަޖިލީހުން އިސްނަގައިގެން މަސައްކަތް ކޮށްދިނުމަށެވެ.


Topics:
Share this article: Facebook Twitter WhatsApp
Ad #9Advertise hereSize: 728 × 90 pxSize: 800 × 200 px Call 768 2001 WhatsApp
Related Articles
ގުޅުންހުރި ޚަބަރުތައް
ReelsWatch all