އިސްރާއީލަށް އެމެރިކާއިން ދޭ 4 ބިލިއަން ޑޮލަރުގެ އެހީ މި އަހަރު ނިމުމާއެކު ހުއްޓާލާނެކަމަށް ޓްރަމްޕް އިޢުލާނުކޮށްފި
އެމެރިކާއިން އިސްރާއީލަށް ކޮންމެ އަހަރަކު ދެމުންގެންދާ ގާތްގަނޑަކަށް 4 ބިލިއަން ޑޮލަރުގެ އަސްކަރީ އެހީ، މި އަހަރު ނިމުމާއެކު ހުއްޓާލުމަށް ނިންމާފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް އިޢުލާނުކުރައްވައިފިއެވެ.
އެމެރިކާގެ މެދުމުއްދަތުގެ އިންތިޚާބު އޮތް ދުވަހު، ފޮކްސް ނިއުސްގެ "ފޮކްސް އެންޑް ފްރެންޑްސް" ޕްރޮގްރާމްގައި ވާހަކަދައްކަވަމުން ޓްރަމްޕް ވިދާޅުވީ، އިސްރާއީލަށް ދޭ އެހީ ކަނޑާލުމާ ގުޅޭގޮތުން އިސްރާއީލުގެ ބޮޑުވަޒީރު ބެންޔަމިން ނެތަންޔާހޫއާއެކު މީގެ މަސްތަކެއް ކުރިން އެއްބަސްވުމަކަށް އާދެވިފައިވާ ކަމަށެވެ . އަދި މި ޚިޔާލަކީ ނެތަންޔާހޫގެ އަމިއްލަ އިސްނެންގެވުމެއް ކަމަށާއި، އިސްރާއީލަކީ އިޤްތިޞާދީ ގޮތުން ކުރިއަރާފައިވާ، ވަރުގަދަ ޤައުމަކަށް ވާތީ އެފަދަ ހިލޭ މާލީ އެހީއަކަށް އެ ޤައުމު މިހާރު ބޭނުންނުވާ ކަމަށް ޓްރަމްޕް ވިދާޅުވިއެވެ .
މާލީ އެހީގެ ދަށުން ދޭ ފައިސާ ހުއްޓާލި ނަމަވެސް، ދެ ޤައުމުގެ ދެމެދުގައި އޮތް އަސްކަރީ ގުޅުމަށް އެއްވެސް ބަދަލެއް ނާންނާނެ ކަމަށް ޓްރަމްޕް ފާހަގަކުރެއްވިއެވެ. އެގޮތުން އިސްރާއީލުން އަމިއްލަ ޚަރަދުގައި އެމެރިކާގެ އެންމެ ޒަމާނީ ހަތިޔާރުތައް ގަތުމުގެ ފުރުޞަތު ކުރިއެކޭ އެއްފަދައިން އޮންނާނެ ކަމަށް އެމަނިކުފާނު ވިދާޅުވިއެވެ . މި ނިންމުމުގެ ސިޔާސީ ބޭނުމާ ބެހޭގޮތުން ވާހަކަދައްކަވަމުން ޓްރަމްޕް ވަނީ، އިސްރާއީލަށް އެހީ ދިނުމާ ދެކޮޅަށް ޑިމޮކްރެޓިކް ޕާޓީގެ ވާތުފިޔައިގެ މެންބަރުން ދައްކަމުންދާ ސިޔާސީ ވާހަކަތަކަށް މިއާއެކު ނިމުމެއް އަންނާނެ ކަމަށް ވިދާޅުވެފައެވެ.
ނަމަވެސް، 2016 ވަނަ އަހަރު ބަރަކް އޮބާމާގެ ވެރިކަމުގައި ސޮއިކުރެވުނު 10 އަހަރުގެ އެއްބަސްވުމެއްގެ ދަށުން، އެމެރިކާއިން އިސްރާއީލަށް އަހަރަކު 3.8 ބިލިއަން ޑޮލަރުގެ އަސްކަރީ އެހީ ފޯރުކޮށްދިނުމަށް ވަނީ ކަނޑައަޅާފައެވެ. އެ އެއްބަސްވުން ނިމުމަކަށް އަންނަނީ 2028 ވަނަ އަހަރުގެ މާލީ އަހަރު ނިމޭއިރު ކަމަށްވާއިރު، އެ މުއްދަތު ހަމަވުމުގެ ދެ އަހަރު ކުރިން އެހީ ހުއްޓާލުމަށް ޢަމަލީ ގޮތުން ފިޔަވަޅު އަޅާނެ ގޮތެއްގެ ތަފްޞީލެއް ޓްރަމްޕް ހާމައެއް ނުކުރައްވައެވެ . އަދި 10 އަހަރުގެ މުއްދަތަކަށް ބަހާލައިގެން އެމެރިކާގެ އެހީ މަދުކުރުމުގެ ޚިޔާލު މީގެ ކުރިން ނެތަންޔާހޫ ދެއްކެވި ނަމަވެސް، ޓްރަމްޕް އިޢުލާނުކުރެއްވި ކުއްލި ނިންމުމާ ގުޅޭގޮތުން ނެތަންޔާހޫގެ އޮފީހުން އެއްވެސް ބަހެއް ބުނަން ވަނީ ދެކޮޅު ހަދާފައެވެ .
މީގެ އިތުރުން، އެމެރިކާގެ ޤާނޫނުއަސާސީ އޮންނަ ގޮތުން ބޭރު ޤައުމުތަކަށް ދޭ މާލީ އެހީތައް ފާސްކުރުމާއި ކަނޑައެޅުމުގެ ފުރިހަމަ ބާރު އޮންނަނީ ކޮންގްރެސްއަށް ކަމަށްވުމާއެކު، ކޮންގްރެސްގެ ފާސްކުރުމަކާ ނުލައި ރައީސަށް އަމިއްލަފުޅަށް މި ފައިސާ ކަނޑާލެވިދާނެތޯ ޤާނޫނީ މާހިރުން ދަނީ ސުވާލު އުފައްދަމުންނެވެ . އަދި މެދުމުއްދަތުގެ އިންތިޚާބުގެ ވޯޓުލުން ކުރިއަށްދިޔަ ދުވަހު މިފަދަ ބޮޑު އިޢުލާނެއް ކުރެއްވުމަކީ ވޯޓަށް ނުފޫޒު ފޯރުވުމަށް ކުރެއްވި ކަމެއް ކަމަށް ބުނެ ސިޔާސީ މަސްރަޙު ދިރާސާކުރާ ފަރާތްތަކުން ދަނީ ފާޑުކިޔަމުންނެވެ.
