ހުޅުމާލޭގައި މެޑިކަލް ކޮލެޖަކާއި ޓީޗިން ހޮސްޕިޓަލެއް އެޅުމާ ގުޅޭގޮތުން ރާއްޖެއާއި ޕާކިސްތާނުން މަޝްވަރާކުރަނީ
ޕާކިސްތާނުން ދިވެހިރާއްޖެއަށް ކަނޑައަޅުއްވާފައި ހުންނަވާ ހައިކޮމިޝަނަރު، ވައިސް އެޑްމިރަލް (ރިޓަޔަރޑް) ފައިސަލް ރަސޫލް ލޯދީއާ ހަވާލާދީ "ސަން އޮންލައިން" އިން ރިޕޯޓުކޮށްފައިވާ ގޮތުގައި، ހުޅުމާލޭގައި ފުރިހަމަ މެޑިކަލް ކޮލެޖަކާއި ޓީޗިން ހޮސްޕިޓަލެއް ގާއިމުކުރުމާ ގުޅޭގޮތުން ދިވެހި ސަރުކާރާއި ޕާކިސްތާނާ ދެމެދު ދަނީ މަޝްވަރާ ކުރެވެމުންނެވެ.
ސަން އޮންލައިންގެ "ޑިޕްލޮމެޓިކް ފޯކަސް" ޕްރޮގްރާމްގައި ވާހަކަދައްކަވަމުން ހައިކޮމިޝަނަރު ލޯދީ ފާހަގަކުރެއްވި ގޮތުގައި، ރާއްޖޭގެ ރަށްތައް ތަފާތު ސަރަހައްދުތަކަށް ބެހިފައިވުމުގެ ސަބަބުން ސިއްހީ ދާއިރާގެ ފަންނީ ބޭފުޅުންނަށް އޮތް ބޭނުންތެރިކަން ބޮޑެވެ. އަދި މި ބޭނުންތެރިކަމަށް ހައްލެއް ހޯދުމަށްޓަކައި ދިވެހި ސަރުކާރާއި، ދިވެހިރާއްޖޭގެ ގައުމީ ޔުނިވަސިޓީ އަދި ޕާކިސްތާނުގެ މަސްއޫލުވެރިންގެ މެދުގައި މަޝްވަރާތައް ކުރިއަށްދާކަމަށް އޭނާ ވިދާޅުވިއެވެ.
ލޯދީ ވިދާޅުވި ގޮތުގައި، މި މަޝްރޫއަށް ދިހައަކުން ގުނާލެވޭ މިލިއަން ޑޮލަރު ހަރަދުވާނެ ކަމަށް ލަފާކުރެެވެއެވެ. އަދި މިކަމަށް ބޭނުންވާ ފަންޑު ހަމަޖައްސާނީ ދެ ގައުމުގެ ސަރުކާރާއި އަމިއްލަ ފަރާތްތަކުގެ އެހީތެރިކަމާއެކު ކަމަށް ބެލެވޭކަމަށްވެސް އޭނާ ވިދާޅުވިއެވެ.
މާޒީގައި ދެ ގައުމުގެ ދެމެދުގައި އޮތް ގުޅުމަށް އަލިއަޅުއްވާލައްވަމުން ލޯދީ ވަނީ 2017 ވަނަ އަހަރު ރާއްޖޭގެ ފުރަތަމަ މެޑިކަލް ސުކޫލް ގާއިމުކުރުމުގައި ޕާކިސްތާނުން ވެދިން އެހީތެރިކަން ފާހަގަކުރައްވާފައެވެ. އަދި އެ ތަނުން މިހާތަނަށް ތިން ބެޗަކުން 80 ނުވަތަ 90 އަށްވުރެ ގިނަ ދިވެހި ޑޮކްޓަރުން ތަމްރީނުކޮށްފައިވާކަން އޭނާ ފާހަގަކުރެއްވިއެވެ.
ސިއްހީ ދާއިރާގެ އިތުރުން، ދެ ގައުމުގެ ދެމެދުގައި ތައުލީމީ ދާއިރާއިން އޮތް ގުޅުންވެސް ދަނީ ފުޅާވަމުންނެވެ. ހައިކޮމިޝަނަރު ހާމަކުރެއްވި ގޮތުގައި، ދިވެހި ދަރިވަރުންނަށް އަހަރަކު ދެމުންއައި 4 ނުވަތަ 5 ސްކޮލަޝިޕްގެ އަދަދު މި އަހަރު ވަނީ 12 އާއި 15 އާ ދެމެދުގެ އަދަދަކަށް އިތުރުވެފައެވެ. މީގެ އިތުރުން، އަންނަ ނޮވެމްބަރު މަހު ބާއްވާ "ވަރާ އެކްސްޕޯ" ގައި ތަފާތު ދާއިރާތަކުން ފުރިހަމަ އަދި އަންޝީ ސްކޮލަޝިޕްތައް ދިނުމަށް ޕާކިސްތާނުގެ 20 ވަރަކަށް ޔުނިވަސިޓީން ރާވަމުންދާކަމަށްވެސް އޭނާ ވިދާޅުވިއެވެ.
