ހޮރްމުޒް ކަނޑުއޮޅިން ހުއްދަނެތި ދަތުރުކުރި ތެޔޮ އުފުލާ ނަވެއްގައި އަލިފާންރޯވެއްޖެ؛ އީރާނުން ބުނީ ކަނޑުމީނުގައި ޖެހުނީ ކަމަށް!
ހޮރްމުޒް ކަނޑުއޮޅީގެ އިރުމަތީ ސަރަޙައްދުން ހުއްދަނެތި ދަތުރުކުރި ތެޔޮ އުފުލާ ބޮޑު ނަވެއް، ކަނޑުގައި އިންދާފައިވާ މީނު (Naval Mines) ތަކެއްގައި ޖެހި، ބޮޑެތި ގެއްލުންތަކާއެކު އަލިފާންރޯވެއްޖެއެވެ. އީރާނުގެ ސިފައިންގެ ނޭވީއިން ނެރުނު ބަޔާނެއްގައި ބުނެފައިވަނީ، މި ހާދިސާ ހިނގާފައިވަނީ އެ ތެޔޮ ނަވުން އޭގެ ޓްރެކިންގ ސިސްޓަމްތައް ނިއްވާލުމަށްފަހު، ދަތުރުކުރުން މަނާކޮށްފައިވާ ނުރައްކާތެރި ސަރަޙައްދަކުން ދަތުރުކުރަން އުޅުމުގެ ތެރޭގައި ކަމަށެވެ.
ބައިނަލްއަޤްވާމީ ޚަބަރުފަތުރާ ވަސީލަތްތަކުން ހާމަކޮށްފައިވާ ގޮތުގައި، އީރާނުގެ އަސްކަރިއްޔާއިން ވަނީ ހޮރްމުޒް ކަނޑުއޮޅިއަކީ ޤަވާއިދާ ޚިލާފަށް ދަތުރުކުރާ އުޅަނދުފަހަރަށް ނުރައްކާތެރި އަދި ބަންދު ކުރެވިފައިވާ ސަރަޙައްދެއްގެ ގޮތުގައި އަލުން ހަނދާންކޮށްދީފައެވެ. އަދި އެ ސަރަޙައްދުން ރައްކާތެރިކަމާއެކު ދަތުރުކުރެވޭނީ އީރާނުގެ އަސްކަރީ އިދާރާތަކާ އިސްވެ ސިލްސިލާކޮށް ހުއްދަ ހޯދައިގެން ކަމަށް ވެސް އީރާނުން ބުނެފައިވެއެވެ.
މި ހާދިސާއާ ގުޅިގެން މެދުއިރުމަތީގެ ކަނޑުގެ ސަރަޙައްދުތަކުގައި ތެޔޮ އުފުލާ އުޅަނދުފަހަރަށް ދެވޭ އިންޝުއަރެންސްގެ އަގުތައް އިންތިހާއަށް އުފުލި، ތެޔޮ ބާޒާރަށް ބޮޑު ލޮޅުމެއް ވަނީ އައިސްފައެވެ. އެމެރިކާގެ ނޭވީގެ ފިފްތު ފްލީޓުން ބުނެފައިވަނީ، ގެއްލުންވި ނަވަށް އެހީތެރިކަން ފޯރުކޮށްދިނުމަށް ކައިރީގައި ހުރި ހަނގުރާމަމަތީ އުޅަނދުތައް ހަރަކާތްތެރިވި ކަމަށާއި، ނަމަވެސް އީރާނުގެ އަސްކަރީ ބޯޓުތަކުން އެ ސަރަޙައްދަށް ކައިރިވުމަށް ހުރަސްއެޅި ކަމަށެވެ. އަދި ބައިނަލްއަޤްވާމީ ހަކަތައާ ބެހޭ އިދާރާތަކުން ވަނީ، ދުނިޔޭގެ ތެލުގެ ވިޔަފާރީގެ ވިހި ޕަސެންޓް (20%) ހިއްސާކުރާ ހޮރްމުޒް ކަނޑުއޮޅީގައި މީނު އިންދައިގެން ކަނޑުގެ ދަތުރުފަތުރަށް ހުރަސްއެޅުމަކީ މުޅި ދުނިޔޭގެ އިޤްތިޞާދަށް ނުރައްކާވާނެ ކަމެއް ކަމަށް ބުނެ ކަންބޮޑުވުން ފާޅުކޮށްފައެވެ.
މި ހާދިސާގައި ގެއްލުންވި ނަވުގެ ނަމާއި، އެއީ ކޮން ޤައުމަކަށް ނިސްބަތްވާ ނަވެއްކަން އަދި ފަޅުވެރިންނަށް ލިބުނު ގެއްލުންތަކުގެ ތަފްޞީލެއް އީރާނުގެ އިދާރާތަކުން ހާމަކޮށްފައެއް ނުވެއެވެ. މި ހާދިސާ ހިނގާފައިވަނީ ހޮރްމުޒް ކަނޑުއޮޅީގެ ކަނޑުގެ ދަތުރުފަތުރާ ގުޅޭގޮތުން ބައިނަލްއަޤްވާމީ ފެންވަރުގައި މަޝްވަރާތައް ކުރިއަށްދާ، އަދި ސަރަޙައްދީ ނުހަނު ހޫނުވެފައިވާ ދަނޑިވަޅެއްގައެވެ.
