ފޯނުގެ ފޮޓޯ ގެލަރީއަށް ހުއްދަނެތި ވަން ކަމުގެ މައްސަލައިގައި އިޓަލީން މެޓާ 805 މިލިއަން ޔޫރޯއިން ޖޫރިމަނާކޮށްފި
ފޯނުގެ ފޮޓޯއާއި ވީޑިއޯ ގެލަރީއަށް ސާފު ހުއްދައަކާ ނުލައި ފޭސްބުކް އެޕް މެދުވެރިކޮށް ވަދެފައިވާ މައްސަލައިގައި އިޓަލީން މެޓާ ކުންފުނި 805 މިލިއަން ޔޫރޯއިން ޖޫރިމަނާކޮށްފިއެވެ.
އިޓަލީގެ ޑޭޓާ ޕްރޮޓެކްޝަން އޮތޯރިޓީން ބުނާ ގޮތުގައި އެންޑްރޮއިޑް ފޯނު ބޭނުންކުރާ މީހުންގެ ފޭސްބުކް އެޕްގައި ހިމެނޭ ޚާއްޞަ ފީޗާއެއް މެދުވެރިކޮށް، ބޭނުންކުރާ ފަރާތްތަކަށް ރަނގަޅަށް އޮޅުންފިލުވައިދިނުމަކާ ނުލައި އަދި ވަކިން ހުއްދަ ހޯދުމަކާ ނުލައި ފޯނުގެ މުޅި ފޮޓޯ ލައިބްރަރީ ބެލުމުގެ ފުރުޞަތު އެ އެޕަށް ލިބިފައިވެއެވެ. އިޓަލީގައި އެންޑްރޮއިޑް ފޯނު ބޭނުންކުރާ ގާތްގަނޑަކަށް 20 މިލިއަން މީހުންގެ ފޯނުގައި މި ފީޗާ އިންނަނީ އޮޓޮމެޓިކުން އޮންވެފައި ކަމަށާއި، މިއީ އިޓަލީގެ ޕްރައިވަސީ ކޯޑުގެ 122 ވަނަ މާއްދާއާ ޚިލާފު އަމަލެއް ކަމަށް އެ އިދާރާއިން ވަނީ ކަނޑައަޅާފައެވެ.
މި ނިންމުމާއެކު އިޓަލީގެ އޮތޯރިޓީން ވަނީ ކުރިއަށް އޮތް 60 ދުވަހުގެ ތެރޭގައި އެ ފީޗާ ޑިފޯލްޓްކޮށް ނިއްވާލުމަށް މެޓާއަށް އަންގާފައެވެ. މީގެ އިތުރުން، ކުރިން މި ހުއްދަ ދެވިފައިވާ ފަރާތްތަކުގެ އެކައުންޓްތަކުންވެސް މި ފީޗާ ނިއްވާލުމަށާއި، ފޮޓޯ ގެލަރީއަށް ވަނުމުގެ ކުރިން އެއީ ކޮން ބޭނުމަކު ކުރާ ކަމެއްކަން ސާފުކޮށްދީ ވަކިން ހުއްދަ ހޯދާނެ ނިޒާމެއް ގާއިމުކުރުމަށް ވަނީ އަމުރުކޮށްފައެވެ. އަދި މި މަސައްކަތް ކުރިއަށްދާ ގޮތުގެ ރިޕޯޓެއް 30 ދުވަހުގެ ތެރޭގައި އަދި އަޅާފައިވާ ފިޔަވަޅުތަކުގެ ތަފްސީލީ ރިޕޯޓެއް 90 ދުވަހުގެ ތެރޭގައި ހުށަހެޅުމަށްވެސް ވަނީ އަންގާފައެވެ.
މިއީ އިޓަލީގެ ޑޭޓާ ޕްރޮޓެކްޝަން އޮތޯރިޓީން މިހާތަނަށް ޓެކް ކުންފުންޏަކާ މެދު އެޅި އެންމެ ބޮޑު ޖޫރިމަނާގެ ފިޔަވަޅެވެ. ތަހުގީގު ކުރިއަށްދިޔަ އިރު މެޓާގެ ފަރާތުން އެކަށީގެންވާ އެއްބާރުލުން ނުލިބޭ ކަމަށްވެސް އިޓަލީގެ އިދާރާއިން ބުނެފައިވެއެވެ. ނަމަވެސް މެޓާ ކުންފުނިން ވަނީ މި ނިންމުމާ ދެކޮޅު ހަދައި، ރެގިއުލޭޓަރުގެ ނިންމުމަކީ ހަގީގަތާ ޚިލާފު ނިންމުމެއް ކަމަށާއި، ކަނޑައަޅާފައިވަނީ އެކަށީގެންނުވާ ވަރުގެ ބޮޑު ޖޫރިމަނާއެއް ކަމަށް ބުނެ އެ މައްސަލަ ކޯޓުގައި އިސްތިއުނާފު ކުރާނެކަން އިއުލާނުކޮށްފައެވެ.
