1.5 ބިލިއަން ރުޕީސްގެ މަސްތުވާތަކެއްޗާއެކު ލަންކާގެ ދެކުނުން ދަތުރުކުރި މަސްބޯޓެއް އަތުލައިގެންފި
މަސްތުވާތަކެތީގެ ބޮޑު ޝިޕްމަންޓެއް ބަރުކޮށްގެން ސްރީލަންކާގެ ދެކުނުން، ރާއްޖޭގެ ސަރަހައްދާ ކައިރިން ދަތުރުކުރަމުންދިޔަ މަސްބޯޓެއް ސްރީލަންކާގެ ކަނޑުގެ ސިފައިން އަތުލައިގެންފިއެވެ.
ސްރީލަންކާ ނޭވީގެ ރަސްމީ ވެބްސައިޓުގައި ހާމަކޮށްފައިވާ ގޮތުގައި، މާކަނޑުން ދަތުރުކުރަމުންދިޔަ މި ބޯޓު ހުއްޓުވައި ބަލައިފާސްކުރިއިރު އޭގައި ފަސް މީހުން ތިއްބެވެ. މި ބޯޓަކީ ގިނަ ދުވަސްތަކެއް ވަންދެން ކަނޑުމަތީގައި މަސްވެރިކަން ކުރާ ގޮތަށް ތައްޔާރުކޮށްފައިވާ، އަދި މަސްވެރިކަމުގައި ނުކުމެ އުޅެނިކޮށް ބެހިގެން ކަމަށް ބުނެ ރާއްޖޭގެ ސަރަހައްދަށް ވެސް އާންމުކޮށް ވަދެއުޅޭ ޒާތުގެ އުޅަނދެކެވެ. ހުކުރު ދުވަހު ހެނދުނު މި ބޯޓު ވަނީ ލަންކާގެ ގޯލް ބަނދަރަށް ގެންގޮސްފައެވެ.
މި އުޅަނދުން ހަ ބަސްތާގައި ބަންދުކޮށްފައި ހުރި ޖުމްލަ 101 ކިލޯއާއި 870 ގްރާމްގެ މަސްތުވާތަކެތި ފެނިފައިވާ ކަމަށް ލަންކާގެ ކަމާބެހޭ އިދާރާތަކުން ބުނެއެވެ. މި ތަކެތީގެ މަގުމަތީ އަގު ސްރީލަންކާގެ ފައިސާއިން 1.5 ބިލިއަން ރުޕީސް (ގާތްގަނޑަކަށް 4.5 މިލިއަން އެމެރިކާ ޑޮލަރު) އަށް އަރާ ކަމަށް އަންދާޒާކުރެވެއެވެ.

ގޯލް ބަނދަރަށް ބޯޓު ގެންދިއުމަށްފަހު އިތުރަށް ބަލައިފާސްކުރިއިރު، އޭގައި 52 ޕާރުސަލްގައި ބަންދުކޮށްފައި ހުރި ގާތްގަނޑަކަށް 58 ކިލޯއާއި 736 ގްރާމްގެ ހެރޮއިންއާއި، 50 ޕާރުސަލްގައި ބަންދުކޮށްފައި ހުރި 43 ކިލޯއާއި 134 ގްރާމްގެ މެތަމްފެޓަމައިން (އައިސް) ހުރިކަން ވަނީ ކަށަވަރުވެފައެވެ. (ނޯޓު: ބައެއް ރިޕޯޓުތަކުގައި މީގެ ތެރޭގައި ކޮކެއިން ހިމެނޭ ކަމަށް ފުރަތަމަ ބުނި ނަމަވެސް، ނޭވީގެ ރަސްމީ ތަފާސްހިސާބުތަކުން ދައްކަނީ އެއީ ހެރޮއިންއާއި މެތަމްފެޓަމައިން ކަމަށެވެ).
ގޯލް ބަނދަރުގައި މި މަސްތުވާތަކެތި ބަލައިފާސްކުރުމުގެ މަސައްކަތް ކުރިއަށް ގެންގޮސްފައިވަނީ ސްރީލަންކާގެ ޑެޕިއުޓީ ޑިފެންސް މިނިސްޓަރު މޭޖާ ޖެނެރަލް (ރިޓަޔާޑް) އަރޫނާ ޖަޔަސޭކަރައާއި، ކަނޑުގެ ސިފައިންގެ ކޮމާންޑަރު ވައިސް އެޑްމިރަލް ޑަމިއަން ފެނާންޑޯގެ އިތުރުން ސަދަން ނޭވަލް އޭރިއާގެ ކޮމާންޑަރު ރިއާ އެޑްމިރަލް އެޗްއެންއެސް ޕެރޭރާއާއި ޑިރެކްޓަރ ޖެނެރަލް އޮޕަރޭޝަންސް ޗަމިންދަ ކަރުނަސޭނާގެ ހާޒިރުގައެވެ. މި ހަރަކާތުގައި ލަންކާ ސިފައިންނާއި ފުލުހުންގެ ގިނަ އަދަދެއްގެ އިސް އޮފިސަރުން ވެސް ބައިވެރިވެވަޑައިގެންނެވިއެވެ.
މި އޮޕަރޭޝަނަކީ މަސްތުވާތަކެތީގެ ވިޔަފާރި ހުއްޓުވުމަށް ލަންކާ ސަރުކާރާއި ގާނޫނު ތަންފީޒުކުރާ ހުރިހާ އިދާރާތަކެއް ގުޅިގެން "އަ ނޭޝަން ޔުނައިޓެޑް" ގެ ނަމުގައި ކުރިއަށް ގެންދާ ގައުމީ ޚާއްޞަ ކެމްޕެއިންގެ ދަށުން ހިންގި އޮޕަރޭޝަނެކެވެ.
އަތުލައިގަތް މަސްތުވާތަކެއްޗާއި، މަސްބޯޓު އަދި ބޯޓުގައި ތިބި ފަސް މީހުން އިތުރު ތަހުގީގަށާއި ގާނޫނީ ފިޔަވަޅު އެޅުމަށްޓަކައި މިހާރު ވަނީ ސްރީލަންކާ ފުލުހުންގެ ނާކޮޓިކްސް ބިއުރޯ (ޕީއެންބީ) އާ ހަވާލުކޮށްފައެވެ.

