"ވިނީ ދަ ޕޫ" ގެ 100 ވަނަ އަހަރީ ދުވަހު އަސްލު ސާރިދޯޅެއް ލައިބްރަރީއަށް ވަދެ މާމުއި ކައިފި
ކުޑަކުދިންގެ މެދުގައި ބޮޑު މަގުބޫލުކަމެއް ހޯދާފައިވާ މަޝްހޫރު ވާހަކަ "ވިނީ ދަ ޕޫ" (Winnie-the-Pooh) ދުނިޔެއަށް ތަޢާރަފްވިތާ ސީދާ 100 އަހަރު ފުރުނު ތާރީޚީ ދުވަހާ ދިމާކޮށް، ހައިރާންކުރުވަނިވި އަދި އެހާމެ މަޖާ އިއްތިފާގެއް އެމެރިކާގެ ކެލިފޯނިއާގައި ހިނގައިފިއެވެ . ކެލިފޯނިއާގެ މޯނޯ ކައުންޓީގެ މެމޮތު ލޭކްސް ލައިބްރަރީ (Mammoth Lakes Library) އަށް ވަލު ކަޅު ސާރިދޯޅެއް (black bear) ވަދެ، މުވައްޒަފުން ބަހައްޓާފައި ހުރި މާމުއި ފުޅިއެއް ހިމެނޭހެން ބައެއް ލުއިކާނާ ކައިފިއެވެ .
އޭ.އޭ. މިލްން ލިޔުއްވި "ވިނީ ދަ ޕޫ" ފޮތް އެންމެ ފުރަތަމަ ޝާއިޢުކޮށްފައިވަނީ 14 އޮކްޓޫބަރު 1926 ގައެވެ . މި އަޖައިބުވާފަދަ ހާދިސާ ހިނގާފައިވަނީ އެ ތާރީޚަށް ސީދާ 100 އަހަރު ފުރުނު 14 އޮކްޓޫބަރު 2026 ގެ ހެނދުނު، ގާތްގަނޑަކަށް 6:10 އާއި 6:20 އާ ދެމެދުގައެވެ . އެއީ ލައިބްރަރީ ޢާންމުންނަށް ހުޅުވުމުގެ މާ ކުރިއެވެ .
ލައިބްރަރީގެ ސެކިއުރިޓީ ކެމެރާތަކުގެ ފުޓޭޖުން ފެންނަ ގޮތުގައި، މި ސާރިދޯޅު ވަދެގެން ގޮސްފައިވަނީ ސީދާ މުވައްޒަފުން ސައިބޯން ބޭނުންކުރާ ސަރަޙައްދުގައި ހުރި ލުއިކާނާ ބަހައްޓާ ކަބަޑާ ދިމާއަށެވެ . އެތަނުން ސާރިދޯޅު ވަނީ މުވައްޒަފުން ބަހައްޓާފައި ހުރި ޕީނަޓް ބަޓަރާއި، ކޫކީސް އަދި ޕީޗް ކަޕްތަކުގެ އިތުރުން މާމުއި ފުޅިއެއް އެއްކޮށް ކައި ހުސްކޮށްލާފައެވެ .
ވާހަކައިގައި އުޅޭ ޕޫ އަކީވެސް މާމުއި ކެއުމަށް އާދަޔާޚިލާފު ލޯތްބެއް އޮންނަ ޖަނަވާރަކަށް ވުމުން، މި ހާދިސާ ސިފަކުރެވިގެން ދިޔައީ ވާހަކައިގެ ކެރެކްޓާ ހަގީގަތަކަށް ވެގެން އައި ފަދަ ކަމެއްގެ ގޮތުގައެވެ.
ބަނޑުފުރައި ކެއުމަށްފަހު މި ސާރިދޯޅު ވަނީ ލައިބްރަރީގެ ފޮތް ހަރުގަނޑުތަކުގެ ދެމެދުގައި މަޑުމަޑުން ހިނގާލާފައެވެ . އަދި އަލަށް ނެރުނު ފޮތްތައް ބަހައްޓާފައި ހުރި ހަރުގަނޑުތަކާއި ރެފަރެންސް ޑެސްކު ކައިރި ވަސްބަލައި ދިރާސާކުރާ މަންޒަރުވެސް ކެމެރާތަކަށް އަރާފައިވެއެވެ .
މެމޮތު ލޭކްސް ލައިބްރަރީގެ ޑިރެކްޓަރ ޖޯސެފް ބޮޕް ވިދާޅުވި ގޮތުގައި، އެއްވެސް ފޮތު ހަރުގަނޑެއް ވައްޓައެއް ނުލައެވެ . އަދި އެންމެ ފޮތަކަށްވެސް، އަދި ލައިބްރަރީގެ އެއްވެސް މުދަލަކަށްވެސް އެއްވެސް ގެއްލުމެއް ނުދީ، މުވައްޒަފުން ވަޒީފާއަށް އައުމުގެ ކުރިން ސާރިދޯޅު ވަނީ އަމިއްލައަށް ބޭރަށް ނުކުމެގެން ގޮސްފައެވެ .
މި ހާދިސާއާ ގުޅިގެން ލައިބްރަރީގެ މުވައްޒަފުން ސޯޝަލް މީޑިއާގައި ބުނެފައިވަނީ، ސާރިދޯޅު ދެއްކި "ސައްތައިގެ ޖޯޝަށް" މަރުޙަބާ ކިޔާ ނަމަވެސް، ލައިބްރަރީގެ ލުއިކާނާތަކަކީ ޢާންމުންނަށް ގެއަށް ގެންދަން ދޫކުރާ އެއްޗެހި ނޫން ކަމަށެވެ ! އަދި ސާރިދޯޅު ގެންދިޔަ މާމުއި ފުޅި އަދިވެސް އަނބުރާ ލައިބްރަރީއަށް ރައްދުނުކުރާ ކަމަށް ބުނެ ވަނީ މަޖާ ގޮތަކަށް ޕޯސްޓުކޮށްފައެވެ .
މިއީ މަޖާ އަދި އާދަޔާޚިލާފު އިއްތިފާގަކަށް ވީ ނަމަވެސް، ކަމާބެހޭ އިދާރާތަކުން ވަނީ އެ ސަރަޙައްދުގެ ވަލު ޖަނަވާރުތަކުން ރައްކާތެރިވުމަށްޓަކައި، ކާނާއާއި ކުނި ރައްކާތެރިކޮށް ބެހެއްޓުމުގެ މުހިންމުކަން ރައްޔިތުންނަށް ހަނދާންކޮށްދީފައެވެ . އެއްވެސް މީހަކަށް ގެއްލުމެއް ނުލިބި ނިމުނު މި ހާދިސާގެ ޚަބަރާއި ވީޑިއޯ މިހާރު ވަނީ މުޅި ދުނިޔޭގެ ސޯޝަލް މީޑިއާގައި ބޮޑު ސަމާލުކަމެއް ހޯދާފައެވެ .
