🎞️ރަޝިޔާގައި ނުރައްކާތެރި ބައްޔެއް ފެތުރެނީ؟ ލެބް ރިސާޗަރު މަރުވެ، ސަތޭކައިން ކަރަންޓީނަށް—ދުނިޔޭގެ ރޯގާއަކަށް ވެދާނެތަ؟ 🎞️
ރަޝިޔާގެ ސައިބީރިއާ ސަރަޙައްދުގައި ހުންނަ ނުރައްކާތެރި ބަލިތަކަށް ރިސާޗްކުރާ 'އިރްކުތުސްކް އެންޓި-ޕްލޭގް އިންސްޓިޓިއުޓް' ގައި މަސައްކަތްކުރި 28 އަހަރުގެ ސައިންސްވެރިއަކު ކުއްލި ގޮތަކަށް މަރުވުމާ ގުޅިގެން ނާމާންކަމާއި ބިރުވެރިކަން އިންތިހާއަށް ބޮޑުވެއްޖެއެވެ. ދާރިޔާ ޝިޕިލޯވާ މަރުވީ "ސަބަބު ނޭނގޭ ނިއުމޯނިއާ" އެއްގައި ކަމަށް ރަޝިޔާގެ ނޭޝަނަލް ހެލްތު ވޮޗްޑޯގް (Rospotrebnadzor) އިން ބުނި ނަމަވެސް، އަދި އޭނާގެ ހަށިގަނޑުން ނުވަތަ ލެބޯޓްރީއިން އެއްވެސް ނުރައްކާތެރި ޖަރާސީމެއް ނުފެންނަ ކަމަށް ބުނަމުންދާއިރު، ސަރުކާރުން އަޅަމުންދާ ކުއްލި ވަރުގަދަ ސިއްރު ފިޔަވަޅުތަކުގެ ސަބަބުން އާންމުންގެ މެދުގައި ވަނީ ބޮޑު ސުވާލުތަކެއް އުފެދިފައެވެ. ކްރެމްލިންގެ ތަރުޖަމާނު ދިމީތުރީ ޕެސްކޯވް ވަނީ ހަމައެކަނި Rospotrebnadzor ގެ ރަސްމީ ބަހަށް އިތުބާރުކުރުމަށް އަންގަވާފައެވެ.
މުޅި ސަރަޙައްދު ސިއްސައިގެން ދިޔައީ ޝިޕިލޯވާ މަރުވުމާއެކު އޭނާއާ އެކި ގޮތްގޮތުން ބައްދަލުވި 189 އާއި 197 އާ ދެމެދުގެ އަދަދަކަށް މީހުން ވަގުތުން ކަރަންޓީނުކޮށް، މެޑިކަލް އޮބްޒަވޭޝަނަށް ގެންދިއުމުންނެވެ. މީގެ އިތުރުން އޭނާ މަސައްކަތްކުރި އިންސްޓިޓިއުޓްގެ 60 އަށްވުރެ ގިނަ މުވައްޒަފުން ވަނީ އިދާރާގެ ތެރޭގައި ބަންދުކޮށް، ސަރަޙައްދީ ހޮސްޕިޓަލްތަކާއި މެޓާނިޓީ ވޯޑުތަކަށް ވަދެނުކުމެވޭ ގޮތް ހަދާފައެވެ. ހޮސްޕިޓަލުގައި ތިބި ބައެއް ޕޭޝަންޓުން ބުނެފައިވާ ގޮތުގައި ޑޮކްޓަރުން ސިއްރުން ބުނެފައިވަނީ މިއީ "ޕްލޭގް" (Plague / ތާޢޫން) ބަލީގެ ނުރައްކާ އޮތުމުން އަޅާފައިވާ ފިޔަވަޅުތަކެއް ކަމަށެވެ.
މި ހާދިސާގައި ރަޝިޔާ ސަރުކާރުގެ ސިއްރުވެރިކަން ވަނީ އިތުރަށް ހާމަވެފައެވެ. އަވަށްޓެރި ބުރިއާތިޔާ ސަރަޙައްދުގެ ވެރިޔާ އަލެކްސީ ސިދެނޯވް ފުރަތަމަ ވިދާޅުވީ ޝިޕިލޯވާ މަރުވީ "ޕްލޭގް" ޖެހިގެން ކަމަށެވެ. ނަމަވެސް ފަހުން އެ މެސެޖު "ބެލެވެނީ ޕްލޭގް ކަމަށް" ބަދަލުކުރުމަށްފަހު، ސަރުކާރުގެ އިދާރާތަކުން ކުރި ބައެއް ސޯޝަލް މީޑިއާ މެސެޖުތަކާއި ޝެލެޚޯވް އަވަށަށް ނުދިއުމަށް އެދި ކުރި އިއުލާންތައް ވަނީ ކުއްލިއަކަށް ޑިލީޓްކޮށްފައެވެ. އިރްކުތުސްކްގެ ގަވަރނަރު އިގޯރ ކޮބްޒެވްވެސް ފަހުން ވިދާޅުވީ މިއީ "ސަބަބު ނޭނގޭ ނިއުމޯނިއާ" އެއް ކަމަށެވެ.
މިއީ މުޅި ދުނިޔެއަށް ފެތުރޭނެ އާ ނުރައްކާތެރި ބަލިމަޑުކަމެއްތޯ (World Pandemic)ނުވަތަ ނޫންތޯ ބައިނަލްއަޤްވާމީ އިދާރާތަކުން ދަނީ ވަރަށް ކައިރިން ބަލަމުންނެވެ. ދުނިޔޭގެ ސިއްހަތު ޖަމްއިއްޔާ (WHO) އިން ވަނީ މި ހާދިސާއިން އިރްކުތުސްކް ސަރަޙައްދަށް އޮތް ނުރައްކާ "ކުޑަ ނުވަތަ މެދުCategory" އެއްގައި ކަމަށާއި، މުޅި ރަޝިޔާއަށް "ކުޑަ" ކަމަށާއި، ޔޫރަޕް ސަރަޙައްދަށް "ވަރަށް ކުޑަ" ރިސްކެއްއޮތް ކަމެއް ކަމަށް އަންދާސާކޮށްފައެވެ. އަދި ޔޫރަޕިއަން ސެންޓަރ ފޯ ޑިޒީޒް ޕްރިވެންޝަން (ECDC) އިންވެސް ބުނީ "ޕްލޭގް" ކަމަށް ކުރެވޭ ތުހުމަތުތައް އަދި ކަށަވަރުނުވާ ކަމަށެވެ. މިވަގުތުގެ މައުލޫމާތުތަކަށް ބަލާއިރު މިއީ ދުނިޔޭގެ އާ ބަލިމަޑުކަމަކަށް ވުމުގެ ފުރުސަތު ވަރަށް ކުޑަ ނަމަވެސް، ރަޝިޔާގެ ސިއްރުވެރިކަމުގެ ސަބަބުން ދުނިޔޭގެ ސިއްހީ އިދާރާތަކުން ތިބީ އިންތިހާއަށް ފާރަވެރިވެ މިކަންގާތުން ބަލަބަލައެވެ.
