އިންޑިއާގެ ގަންގާ ކޯރުގައި ފެސްޓިވަލަކަށް ދިޔަ އުޅަނދެއް ބަނޑުންޖަހާލައި 13 ކުދިން ގެނބިގެން މަރުވެއްޖެ
ޓީއާރުޓީ އިން ރިޕޯޓުކޮށްފައިވާ ގޮތުގައި، އިންޑިއާގެ އިރުމަތީ ބިހާރު ސްޓޭޓުގެ ގަންގާ ކޯރުގައި ފެސްޓިވަލަކަށް މީހުން ގޮވައިގެން ދިޔަ އުޅަނދެއް އަންގާރަ ދުވަހުގެ ރޭގެ ވަގުތެއްގައި ބަނޑުންޖަހާލުމުގެ ސަބަބުން، އުމުރުން 15 އަހަރު ނުވަތަ އެއަށްވުރެ ހަގު މަދުވެގެން 13 ކުދިން ވަނީ މަރުވެފައެވެ.
މި އުޅަނދު ބަނޑުންޖަހާލި އިރު، އޭގައި ވައިޝާލީ ޑިސްޓްރިކްޓުގެ ކައިރީގައިވާ ރަށަކަށް ހަފްލާއެއްގައި ބައިވެރިވުމަށް ދަތުރުކުރި 15 އާއި 20 އާ ދެމެދުގެ އަދަދެއްގެ މީހުން ތިއްބެވެ. އެ ސަރަހައްދަށް ފޮނުވާފައިވާ ކުއްލި ހާލަތްތަކުގައި ސަލާމަތްކުރާ ޓީމުތަކުން ވަނީ ކޯރުގެ ތެރެއިން ހައެކާއި ހަތަކާ ދެމެދުގެ އަދަދެއްގެ މީހުން ސަލާމަތުން ނަގާފައެވެ.
ޑިސްޓްރިކްޓް މެޖިސްޓްރޭޓް ވަރްޝާ ސިންގް ނޫސްވެރިންނަށް މައުލޫމާތު ދެއްވަމުން ވިދާޅުވީ، އުޅަނދުގައި ދަތުރުކުރި މީހުންގެ ސަރީހަ އަދަދު ކަށަވަރުކުރުމަށާއި އެންމެން ހޯދައި ނިމެންދެން ހޯދުމުގެ މަސައްކަތް ކުރިއަށްދާނެ ކަމަށެވެ.
އިންޑިއާގެ ބޮޑުވަޒީރު ނަރެންދުރަ މޯދީ އެކްސްގައި ކުރެއްވި ޕޯސްޓެއްގައި މި ހާދިސާއަކީ "ވަރަށް އަސަރުން ފުރިގެންވާ ހިތާމަވެރި" ހާދިސާއެއްގެ ގޮތުގައި ސިފަކުރައްވައި، އަނިޔާވި މީހުންނަށް އަވަސް ޝިފާއަކަށް އެދިވަޑައިގެން، މަރުވި މީހުންގެ އާއިލާތަކަށް މާލީ އެހީ ދިނުމަށް ވައުދުވެވަޑައިގެންނެވިއެވެ. މީގެއިތުރުން ބިހާރުގެ ޗީފް މިނިސްޓަރު ސަމްރާތު ޗައުދަރީވެސް ވަނީ ރާގޫޕޫރުގައި ހިނގި މި ހިތާމަވެރި ހާދިސާއާ ގުޅިގެން ހިތާމަ ފާޅުކުރައްވައި، ޅަފުރާގެ ކުދިންތަކެއްގެ ފުރާނަ ގެއްލިގެން ދިއުމަކީ ހިތްކަފައިގެންދާފަދަ ކަމެއްގެ ގޮތުގައި ސިފަކުރައްވާފައެވެ.
