އީރާނުން އެމެރިކާއަށް ރައްދު ދިނުމަށް '' ބޮންތަކުގެ ބައްޕަ '' ނެރޭނެކަމަށް ބުނެފި

އީރާނުގެ ނިއުކްލިއަރ އަދި އަސްކަރީ މަރުކަޒުތަކަށް ހަމަލާދިނުމަށް އެމެރިކާއިން "މަދަރ އޮފް އޯލް ބޮމްބްސް" (ބޮންތަކުގެ މަންމަ) ގެ ނަމުން މަޝްހޫރުވެފައިވާ ޖީބީޔޫ-43/ބީ މޯބް (އެމްއޯއޭބީ) ބޭނުންކުރުމަށް ރާވަމުންދާ ކަމަށް ފެތުރިފައިވާ ރިޕޯޓްތަކާ ގުޅިގެން، އޭގެ ރައްދުގައި "ފާދަރ އޮފް އޯލް ބޮމްބްސް" (ބޮންތަކުގެ ބައްޕަ) ގެ ނަމުގައި އަމިއްލަ ހަތިޔާރެއް ދައްކާލަން ތައްޔާރުވަމުންދާ ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އިން ބުނެފިއެވެ.

އައިއާރްޖީސީގެ ތަރުޖަމާނު ޙުސައިން މުހިއްބީ ވިދާޅުވީ، އެމެރިކާގެ އިންޒާރުތަކަށް ރައްދުދިނުމުގެ ގޮތުން ތެހެރާނުން އެ މީހުންގެ އަމިއްލަ ދިފާޢީ ވަސީލަތްތައް ނެރެން ތައްޔާރުވަމުން އަންނަ ކަމަށެވެ.

މިފަދަ ބަޔާނެއް އީރާނުން ނެރުމުގެ މައިގަނޑު ބޭނުމަކީ އެ ޤައުމުގެ ފަސްގަނޑަށް އެމެރިކާއިން ނުވަތަ އެކުވެރި ބާރުތަކުން ދީފާނެ ކޮންވެންޝަނަލް ހަމަލާތައް ހުއްޓުވުމަށް ސްޓްރެޓީޖިކް ގޮތުން އިންޒާރެއް ދިނުމެވެ. 

މީގެ އިތުރުން "ބޮންތަކުގެ ބައްޕަ" މި ނަމަކީ 2007 ވަނަ އަހަރު ރަޝިޔާއިން އެމެރިކާގެ މޯބް ބޮމާ ވާދަކުރުމަށް ޓެސްޓުކުރި ތާމޯބެރިކް ބޮމަށް ދީފައިވާ ނަމާ އެއްގޮތަށް ބޭނުންކޮށްފައިވާ ނަމެކެވެ.

އީރާނުން މީގެ ކުރިން ވެސް ވަނީ އެ ޤައުމުގައި އަމިއްލައަށް އުފައްދާފައިވާ 10 ޓަނުގެ ބާރުގަދަ ކޮންވެންޝަނަލް ބޮމެއް ހުރިކަން ހާމަކޮށްފައެވެ. އެ ބޮމުގެ މަޢުލޫމާތު އެންމެ ފުރަތަމަ 2017 ވަނަ އަހަރު ޢާންމުކޮށް ހާމަކުރެއްވީ އައިއާރްޖީސީގެ އެއަރޯސްޕޭސް ފޯސްގެ ކޮމާންޑަރު އާމިރު ޢަލީ ޙާޖީޒާދާއެވެ.



އޭނާ ވިދާޅުވެފައިވަނީ އެއީ ސޯވިއެޓް ޔޫނިއަންގެ ޑިޒައިނަކަށް އުފައްދާފައިވާ އިލްޔޫޝިން މަރުކާގެ ކާގޯ މަތިންދާބޯޓުތަކުން ވައްޓާލެވޭ ގޮތަށް ތައްޔާރުކޮށްފައިވާ ބަރު ވައިގެ ބޮމެއް ކަމަށެވެ.

އެމެރިކާގެ މަޝްހޫރު ޖީބީޔޫ-43/ބީ މޯބް އަކީ ގާތްގަނޑަކަށް 21،600 ޕައުންޑް (9،800 ކިލޯގްރާމް ނުވަތަ ގާތްގަނޑަކަށް 10 ޓަނު) ގެ ބަރުދަން ހުންނަ ބޮމެކެވެ. މި ބޮމަކީ އެއްގަމުގެ ސަރަޙައްދުތަކަށް ބާރުގަދަ ގޮވުމުގެ ރާޅުތައް (ބްލާސްޓް ވޭވްސް) ފޮނުވާލުމަށް، ތުނި އެލްމިނިއަމް ބޭރުގަނޑަކާއެކު އުފައްދާފައިވާ ހަތިޔާރެކެވެ.

 ބިމުގެ ސަތާހައާ ކައިރިން ގޮވާ މި ބޮމުގެ މައިގަނޑު ބޭނުމަކީ ބިންމަތީގައިވާ އަމާޒުތަކާއި، ހޮހަޅަތަކުގެ ދޮރޯށިތަކާއި، އަދި މައިންފީލްޑްތައް ސުންނާފަތިކޮށްލުމެވެ. މިއީ އެމްސީ-130 މަރުކާގެ މަތިންދާބޯޓުތަކުން ޕެރަޝޫޓް ބޭނުންކޮށްގެން ވައްޓާލާ ބޮމެކެވެ.

އެމްއޯޕީ ބޮމަކީ ބޯ، ވަރުގަދަ ދަގަނޑު ފަށަލައަކުން ބަންދުކޮށްފައިވާ ބޮމަކަށް ވުމުން، ގޮވުމުގެ ކުރިން 200 ފޫޓު (60 މީޓަރު) ގެ ބޯ ކޮންކްރީޓް ނުވަތަ ހިލަ ފޫއަޅުވާލައި އަޑިއަށް ދިއުމުގެ ޤާބިލުކަން ލިބިފައިވެއެވެ. 

މޯބް ބޮމާ ޚިލާފަށް، އެމްއޯޕީ ބޮން އުފުލަނީ ދުޝްމަނުންގެ ވައިގެ ދިފާޢީ ނިޒާމުތަކަށް ނުފެންނަ ބީ-2 ސްޕިރިޓް އަދި ބީ-21 ރައިޑަރ ފަދަ ސްޓެލްތު ބޮމަރު މަތިންދާބޯޓުތަކުގެ އެތެރޭގައެވެ. މިއީ ދިފާޢު  ވަރުގަދަކޮށްފައިވާ ސަރަޙައްދުތަކުގެ އަޑީގައިވާ މަރުކަޒުތަކަށް އަމާޒުކޮށް ސީދާ ހަމަލާދިނުމަށް އެމެރިކާއިން ފަރުމާކޮށްފައިވާ ހަތިޔާރެކެވެ.