ދުވާލަކު 6 ގަޑިއިރަށްވުރެ މަދުން ނިދުން: ސިއްހީ ބޮޑެތި ނުރައްކާތަކަކާ ގުޅިފައިވާ ކަމެއް!
ދުވާލަކު 6 ގަޑިއިރަށްވުރެ މަދުން ނިދުމަކީ ހަމައެކަނި ވަރުބަލިކަމާއި ކަންނެތްކަން އިހުސާސްކުރުވާ ކަމެއް ނޫނެވެ. މިއީ ހިތުގެ ބަލިތަކާއި، ހަކުރުބަލި، މާޔޫސްކަން (ޑިޕްރެޝަން) އަދި ހަށިގަނޑުގެ އޯގަންތައް އަވަހަށް އުމުރުން ދުވަސްވުމަށް މަގުފަހިކުރުވާ ސިއްހީ ބޮޑު ނުރައްކަލެއްކަން ސައިންސްވެރިންގެ ބައިނަލްއަގުވާމީ ގިނަ ދިރާސާތަކަކުން ދައްކައެވެ.
ހާވަޑް މެޑިކަލް ސުކޫލާއި، ކޮލަމްބިއާ އުނިވަރސިޓީ އަދި ޔޫކޭ ބަޔޯބޭންކް ފަދަ ދުނިޔޭގެ މަޝްހޫރު އިދާރާތަކުން ކުރިއަށްގެންދިޔަ ދިރާސާތަކުން ދައްކާ ގޮތުގައި، އިންސާނާގެ ހަށިގަނޑު އެންމެ ފުރިހަމައަށް މަސައްކަތްކުރުމަށްޓަކައި ސިކުނޑިއާއި ހަށިގަނޑަށް 6.4 އާއި 7.8 ގަޑިއިރާ ދެމެދުގެ ނިދިއެއް ކޮންމެ ރޭގަނޑަކު ބޭނުންވެއެވެ.
މަދުން ނިދުމުން ހަށިގަނޑަށް ކުރާ މައިގަނޑު ނޭދެވޭ އަސަރުތައް
- ހިތުގެ ބަލިތަކާއި ލޭމައްޗަށް ދިއުން:
ދުވާލަކު 6 ގަޑިއިރަށްވުރެ މަދުން ނިދާ މީހުންގެ ހަށިގަނޑުގައި ސްޓްރެސް ހޯމޯންތައް އިތުރުވެ، ލޭހޫނުވުމާއި ލޭގެ ނާރުތަކަށް ނުބައި އަސަރުކުރެއެވެ. ސައިންޓިފިކް ދިރާސާތަކުން ދައްކާ ގޮތުގައި މިފަދަ މީހުންނަށް ހިތުގެ ބަލި ޖެހުމާއި، ސްޓްރޯކް ޖެހުމުގެ ފުރުސަތު އާދައިގެ މީހުންނަށްވުރެ ބޮޑުތަނުން އިތުރުވެގެންދެއެވެ.
- ޓައިޕް-2 ހަކުރުބައްޔާއި ފަލަވުން:
ނިދި މަދުވުމުގެ ސަބަބުން ހަށިގަނޑުގައި ކާނާގެ ކެލޮރީއާއި އިންސިއުލިން ކޮންޓްރޯލްކުރާ ހޯމޯންތަކުގެ ބެލެންސް ގެއްލިގެންދެއެވެ. ދުވާލަކު 5 އާއި 6 ގަނޑި އިރަށްވުރެ މަދުން ނިދާ މީހުންނަށް ޓައިޕް-2 ހަކުރުބަލި ޖެހުމުގެ ނުރައްކާ ދެގުނައަށް އިތުރުވާކަމަށް ރިޕޯޓުތަކުން ދައްކައެވެ.
- ނަފްސާނީ ހާލަތާއި ޑިޕްރެޝަން:
ނިދި ހަމަނުވުމަކީ ސިކުނޑީގެ އިހުސާސްތައް ކޮންޓްރޯލްކުރާ ބަޔަށް ސީދާ ނޭދެވޭ އަސަރުކުރުވާ ކަމެކެވެ. ގަވާއިދުން 6 ގަޑިއިރަށްވުރެ މަދުން ނިދާ ނަމަ، މާޔޫސްވުމާއި (Depression) އަދި އާދަޔާޚިލާފަށް ކަންބޮޑުވުން (Anxiety) ކުރިމަތިވުމުގެ ފުރުސަތު ހަތަރުގުނައަށް އިތުރުވެއެވެ.
- ހަށިގަނޑުގެ އޯގަންތައް އަވަހަށް އުމުރުން ދުވަސްވުން (Accelerated Biological Aging):
ކޮލަމްބިއާ އުނިވަރސިޓީން ކުރި ދިރާސާއަކުން ދެއްކި ގޮތުގައި، 6 ގަޑިއިރަށްވުރެ މަދުން ނިދާ މީހުންގެ ފުރަމޭ، ހިތް، އަދި ފުއްޕާމޭ ފަދަ މުހިންމު ގުނަވަންތަކުގެ ސެލްތައް، އެމީހުންގެ ހަގީގީ އުމުރަށްވުރެ އަވަހަށް ބާރުދެރަވެ، އޯގަންތަކުގެ މަސައްކަތް ދަށްވާންށެވެ.
އަވަހަށް އަރައިގަތުމަށް ސިއްހީ މާހިރުންގެ އިރުޝާދު
- ނިދުމުގެ ތާވަލެއް އެކުލަވާލުން: ކޮންމެ ދުވަހަކުވެސް އެއް ވަގުތެއްގައި ނިދައި، އެއް ވަގުތެއްގައި ތެދުވުމަށް އާދަކުރުން.
- ނިދުމުގެ ކުރިން ސްކްރީންތަކާ ދުރުވުން: ނިދަން އޮށޯތުމުގެ 1 ގަޑިއިރު ކުރިން ފޯނާއި، ޓީވީ އަދި ކޮމްޕިއުޓަރުގެ ސްކްރީންނަށް ބެލުން ހުއްޓާލުން.
- ކެފެއިން ކޮންޓްރޯލްކުރުން: އިރުއޮއްސޭފަހުން ސައި ނުވަތަ ކޮފީ ފަދަ ކެފެއިން ހުންނަ ބުއިންތައް ބޭނުންނުކުރުން.
ސިއްހީ މާހިރުން އިރުޝާދު ދެއްވަނީ ނިދުމަކީ ކަންނެތްކަމެއްގެ ގޮތުގައި ދެކުމުގެ ބަދަލުގައި، އެއީ އަމިއްލަ ސިއްހަތާއި އުމުރު ދިގުކުރުމަށްޓަކައި ކޮންމެހެން ކުރަންޖެހޭ އަސާސީ އިންވެސްޓްމަންޓެއްގެ ގޮތުގައި ދެކުމަށެވެ.
