"Massive protests underway in France and Italy against the rising cost of living!

ތަކެތީގެ އަގުބޮޑުވުމާއި ދިރިއުޅުމުގެ ޚަރަދުތައް އުފުލެމުންދާތީ އެކަމާ ދެކޮޅަށް އަޑުއުފުލުމުގެ ގޮތުން ފްރާންސާއި އިޓަލީގެ ބޮޑެތި ސިޓީތަކުގައި ހައްދުފަހަނައެޅި ބޮޑެތި އިޙްތިޖާޖުތަކެއް ކުރިއަށްދާކަން ބައިނަލްއަޤްވާމީ މީޑިއާތަކުން ރިޕޯޓުކޮށްފިއެވެ.

ފްރާންސްގެ ދާޚިލީ މިނިސްޓްރީއާއި ޓްރޭޑް ޔޫނިއަންތަކުގެ މަޢުލޫމާތުތަކަށް ބަލާއިރު، ޕެރިސް، މާސޭ، އަދި ލިޔޯން ފަދަ 100 އަށްވުރެ ގިނަ ސިޓީގައި 550,000 އާއި 800,000 އާ ދެމެދުގެ އަދަދަކަށް މީހުން ވަނީ މަގުތަކަށް ނުކުމެފައެވެ. މި މުޒާހަރާތަކުގެ ތެރެއިން ބައެއް ސަރަޙައްދުތަކުގައި ހަމަނުޖެހުން އުފެދި، ފިހާރަތަކާއި ސަރުކާރުގެ އިމާރާތްތަކަށް ގެއްލުންދީފައިވާއިރު، ފުލުހުންނާއި މުޒާހަރާގެ ބައިވެރިންނާ ދެމެދު ހިނގި ކުރިމަތިލުންތަކުގައި 1,200 އަށްވުރެ ގިނަ މީހުން ވަނީ ހައްޔަރުކޮށްފައެވެ.

މީގެ އިތުރުން އިޓަލީގެ މިލާން، ބޮލޯނިއާ އަދި ޓިއުރިން ފަދަ ސިޓީތަކުގައިވެސް އިޤްތިޞާދީ ދަތިތަކާ ދެކޮޅަށް ޒުވާނުންނާއި މަސައްކަތްތެރިން އިޙްތިޖާޖުކޮށްފައިވެއެވެ. މިލާންގެ ސެންޓްރަލް ސްކުއާ ސަރަޙައްދުގައި މުޒާހަރާގެ ބައިވެރިން ބެރިކޭޑްތައް ހަދައި، ފުލުހުންނަށް ޙަމަލާދިނުމުން، ސަރުކާރުން ވަނީ ރިއޮޓް ފުލުހުންނާއި އިތުރު ސެކިއުރިޓީ ބާރުތައް ނެރެ ކަރުނަގޭހާއި ވޯޓާ ކެނަން ބޭނުންކޮށްގެން ސަރަޙައްދު ކޮންޓްރޯލްކޮށްފައެވެ.

ފްރާންސްގެ މުޒާހަރާތަކާއި ހަމަނުޖެހުންތައް

ފްރާންސްގައި އާންމުން މަގުތަކަށް ނުކުމެ މުޒާހަރާކުރަނީ ދިރިއުޅުމުގެ ތަކެތީގެ އަގުތައް އިންތިހާއަށް އުފުލި، ތެލުގެ އަގު ބޮޑުވުމާއި، އާންމު ޚިދުމަތްތަކުން ޚަރަދު ކުޑަކުރުމަށް ސަރުކާރުން ނިންމާފައިވާ ނިންމުންތަކާ ދެކޮޅަށެވެ. މީގެ އިތުރުން ތަޢުލީމީ ދާއިރާގެ ހާލަތު ދަށްވުމާ ގުޅިގެން ސްކޫލް ކުދިންނާއި ޔުނިވަރސިޓީ ދަރިވަރުންވެސް ވަނީ މުޒާހަރާގައި ބައިވެރިވެފައެވެ.

މުޒާހަރާގެ ބައިވެރިން ވަނީ މަގުތައް ބަންދުކޮށް، ކުނިގޮނޑުތަކާއި އިލެކްޓްރިކް ސައިކަލްތަކުގައި ރޯކޮށް، ސިޓީ ހޯލްތަކަށާއި ފުލުހުންގެ މަރުކަޒުތަކަށް ޙަމަލާދީފައެވެ. ލިމޯޖް އަދި ލިޔޯން ފަދަ ސިޓީތަކުގައި ހުރި އާންމު އިމާރާތްތަކާއި ފިހާރަތަކަށް ބޮޑެތި ގެއްލުންތަކެއް ދީ، ލޫޓުވާފައިވެއެވެ. ފުލުހުން ވަނީ ކަރުނަގޭހާއި، ވޯޓާ ކެނަން އަދި ސްޓަން ގްރެނޭޑް ބޭނުންކޮށްގެން މުޒާހަރާގެ ބައިވެރިން ރޫޅާލުމަށް މަސައްކަތްކޮށްފައެވެ.

މުޅި ފްރާންސްއިން 2,400 އަށްވުރެ ގިނަ މީހުން ހައްޔަރުކޮށްފައިވާއިރު، އޭގެ ތެރެއިން 855 އަށްވުރެ ގިނަ މީހުން ހައްޔަރުކުރީ ވެރިކަންކުރާ ޕެރިސްއިންނެވެ.

ރައީސް އެމެނުއަލް މެކްރޮން ވަނީ ޤައުމުގައި ހިންގި ހަމަނުޖެހުންތަކާއި ލޫޓުވުންތަކަކީ "ބަލައިގަނެވޭނެ ކަމެއް ނޫން" ކަމަށް ވިދާޅުވެ، އެކަން ހަރުކަށި އިބާރާތުން ކުށްވެރިކުރައްވާފައެވެ. އަދި އިޙްތިޖާޖު ކުރުމަކީ ޤާނޫނީ ޙައްޤެއް ނަމަވެސް، ޤައުމުގެ އަބުރާއި މުދަލަށް ގެއްލުންދީ ސަރުކާރު ވައްޓާލަން މަސައްކަތްކުރި ފަރާތްތަކަށް ޤާނޫނީ ފިޔަވަޅު އަޅައި ޖަވާބުދާރީ ކުރުވާނެ ކަމަށް މެކްރޮން ވިދާޅުވިއެވެ.

އިޓަލީގެ މުޒާހަރާތަކާއި ހަމަނުޖެހުންތައް

އިޓަލީގައި ކުރިއަށްދާ މި މުޒާހަރާތަކުގައި އާންމުން އަޑުއުފުލަނީ ތެލުގެ އަގު އުފުލުމާއި، ކުލިތައް ބޮޑުވުމާއި، ތަޢުލީމީ ދާއިރާގެ ޚަރަދުތައް ކުޑަކުރުމާ ދެކޮޅަށެވެ. އަދި ބޮޑުވަޒީރު ޖޯޖިއާ މެލޯނީގެ ސަރުކާރުގެ އިޤްތިޞާދީ އަދި ޚާރިޖީ ސިޔާސަތުތަކަށް ނުރުހުން ފާޅުކުރުމުގެ ގޮތުންވެސް މުޒާހަރާތައް ކުރިއަށްދެއެވެ.

މިލާން، ޓިއުރިން އަދި ބޮލޯނިއާ ފަދަ ސިޓީތަކުގައި މުޒާހަރާގެ ބައިވެރިން ވަނީ މަގުތަކުގައި ބެރިކޭޑްތައް ހަދައި، ފުލުހުންނަށް ގަލާއި ބޮމުގެ އެތިކޮޅުތައް އުކާފައެވެ. ސިޓީތަކުގެ ފިހާރަތަކުގެ ބިއްލޫރިތައް ތައްޔާރުކޮށް ގެއްލުންދީފައިވާއިރު، ފުލުހުން ވަނީ ކަރުނަގޭހާއި ވޯޓާ ކެނަން ބޭނުންކޮށްގެން މަގުތައް ހުސްކޮށްފައެވެ. ޙަރަކާތްތަކުގެ ތެރޭގައި 140 އަށްވުރެ ގިނަ ފުލުހުންނަށް ވަނީ އެކިވަރުގެ އަނިޔާތައް ލިބިފައެވެ.

މުޒާހަރާތަކާ ގުޅިގެން 200 އަށްވުރެ ގިނަ މީހުން ހައްޔަރުކޮށް، 370 އަށްވުރެ ގިނަ މީހުން ފުލުހުންގެ ބެލުމުގެ ދަށަށް ގެންގޮސްފައިވެއެވެ. މީގެ ތެރޭގައި ގިނަ އަދަދެއްގެ ކުޑަކުދިންނާއި ޒުވާނުން ހިމެނެއެވެ.

އިޓަލީގެ ބޮޑުވަޒީރު ޖޯޖިއާ މެލޯނީ ވަނީ މުޒާހަރާގެ ތެރޭގައި ހަމަނުޖެހުން ހިންގި މީހުންނަކީ "ސިޓީތައް ރަހީނުކޮށް ސުލްޙަ ނަގާލަން މަސައްކަތްކުރާ ފަރާތްތަކެއް" ކަމަށް ސިފަކުރައްވާފައެވެ. ސުލްޙަވެރިކަމާއެކު މުޒާހަރާކުރުމަކީ ކޮންމެ މީހަކަށްވެސް ލިބިގެންވާ ޙައްޤެއް ކަމަށާއި، ނަމަވެސް ޤާނޫނާ ޚިލާފަށް ހިންގާ ޖަރީމާތަކަށް ޖާގަ ނުދެވޭނެ ކަމަށް ވިދާޅުވެ، ސެކިއުރިޓީ ކަންކަން ވަރުގަދަކުރުމަށް ޚާއްޞަ ކެބިނެޓް ބައްދަލުވުމެއް ވަނީ ބާއްވާފައެވެ.