އަންހެން ކުއްޖެއްގެ ފުރާނަ ސަލާމަތްކުރަން ކުރީގެ ބޮކްސިން ތަރިއަކު އަމިއްލައަށް ރަހީނަކަށްވެއްޖެ!
ކަޒަކިސްތާނުގެ އަލްމާތީ ބައިނަލްއަޤްވާމީ އެއާޕޯޓުގައި ހިނގި ނުރައްކާތެރި ހާދިސާއެއްގައި، ވަޅިއަކުން ބިރުދައްކައި ރަހީނުކުރި އެއާޕޯޓުގެ ޒުވާން މުވައްޒަފެއްގެ ފުރާނަ ސަލާމަތްކުރުމަށް، ކުރީގެ މަޝްހޫރު ބޮކްސިން ކުޅުންތެރިއެއް ކަމަށްވާ އުމުރުން 52 އަހަރުގެ މޫސާ އަބްދްރައިމް ނަމޫނާ ދައްކައިފިއެވެ.
އެތަނުގައި ހުރި ފިރިހެނަކު ކުއްލިއަކަށް ވަޅިއެއް ނަގައި އެއާޕޯޓުގެ އަންހެން މުވައްޒަފެއްގެ ކަރަށް ޖައްސައި ބިރުދައްކަން ފެށުމާއެކު، އެވަގުތު އެ ތަނުގައި ހުރި މޫސާ ވަނީ ވަގުތުުުން އެކަމަށް ހުރަސްއަޅާފައެވެ. ފުލުހުން އެ މީހާއާ ވާހަކަދައްކައި ކިޔަމަންކުރުވަން އުޅުމުގެ ތެރޭގައި، ހަމަލާދިން މީހާ ބުނެފައިވަނީ ފުލުހުންގެ ބަދަލުގައި އެހެން މީހަކު ރަހީނަކަށް ދިނުމަށެވެ.
އެ ހިނދު، އެ އަންހެން ކުއްޖާގެ ފުރާނައަށް ނުރައްކާވެދާނެ ކަމުގެ ބިރަށް، މޫސާ ވަނީ "އޭގެ ބަދަލުގައި އަހަރެން ރަހީނަކަށް ނަގާ" ކަމަށް ބުނެ ކުރިއަށް ނުކުމެފައެވެ.
ހަމަލާދިން މީހާ އެކަމަށް އެއްބަސްވެ އަންހެން ކުއްޖާ ދޫކޮށްލުމާއެކު، މޫސާގެ ކުރީގެ ބޮކްސިން ތަޖުރިބާއާއި ހުށިޔާރުކަން ބޭނުންކޮށްގެން، އެ މީހާ އަތުލައިގަނެ އެއާޕޯޓުގެ ސެކިއުރިޓީންނާ ވަނީ ހަވާލުކޮށްފައެވެ. މި ނުރައްކާތެރި ހާދިސާގައި އެއްވެސް މީހަކަށް ގެއްލުމެއް ލިބިފައިނުވާއިރު، މޫސާގެ މި ކާރިސާ އިންސާނިއްޔަތުކަމާއި ހިތްވަރުގަދަކަން ފާހަގަކޮށް ކަޒަކިސްތާނުގެ ރައީސް ވަނީ އޭނާއަށް ޤައުމީ ފެންވަރުގެ ޝަރަފާއި މެޑެލް އަރުވާފައެވެ.
