މެދުއަރަބިކަރައިގެ މަސްރަޙު ހޫނުވެ، ރިޔާޟަށް ދިން މިސައިލް ޙަމަލާއެއް ނާކާމިޔާބުކޮށްލައިފި!
އެމެރިކާއާއި އީރާނާ ދެމެދު އުފެދިފައިވާ އަސްކަރީ ނުތަނަވަސްކަން އިންތިހާއަށް ބޮޑުވެ، މުޅި މެދުއަރަބިކަރައިގެ މަސްރަޙު ވަނީ ނުރައްކާތެރި ފިޔަވަޅަކަށް ވާޞިލުވެފައެވެ. އެމެރިކާއިން އީރާނުގެ އަސްކަރީ މަރުކަޒުތަކަށް އަމާޒުކޮށް އައު ޙަމަލާތަކެއް ދީފާނެކަމުގެ ނިޝާންތައް ފެންނަން ފެށުމާއެކު، އީރާނުގެ އިސް މަސްއޫލުވެރިން ވަނީ ރައްދުގައި ޢަރަބި ގަލްފުގެ ކަނޑުއަޑީގެ މުވާޞަލާތީ ކޭބަލްތަކަށާއި، ޑޭޓާ ސެންޓަރުތަކުގެ އިތުރުން މާލީ އިންފްރާސްޓްރަކްޗަރަށް ޙަމަލާދީ ފާލުންނައްޓުވާލާނެކަމުގެ އިންޒާރު ދީފައެވެ.
މި ނު ތަނަވަސްކަމުގެ ތެރެއިން، ޔަމަނުގެ ހޫތީ ޖަމާޢަތުން ވަނީ ސަޢޫދީ ޢަރަބިއްޔާގެ ވެރިރަށް ރިޔާޟަށް އަމާޒުކޮށް ބެލިސްޓިކް މިސައިލެއް ފޮނުވާލާފައެވެ. އެހެންނަމަވެސް، ސަޢޫދީ އެއާ ޑިފެންސް ނިޒާމުން ވަނީ އެ މިސައިލް ރިޔާޟާ ހަމައަށް ފޯރުމުގެ ކުރިން ވައިގެ ތެރޭގައި ދެނެގަނެ، ގޮއްވާލައިގެން ނާކާމިޔާބުކޮށްލާފައެވެ.
މި މަސްރަޙާ ގުޅޭގޮތުން އިތުރަށް ލިބިފައިވާ ތަފްސީލުތަކަށް ބަލާއިރު، ހޯމުޒް ކަނޑުއޮޅީގައި ދަތުރުކުރާ ތެޔޮ އުފުލާ ބޯޓުފަހަރަށް އަމާޒުކޮށް ކަނޑުއަޑީގައި މައިން ބަހައްޓައިގެންނާއި އިންތިޚާބީ ޙަމަލާތައް ދީގެން ގެއްލުންދެމުންދާތީ، ދުނިޔޭގެ ބާޒާރުގައި ސާމް މުދަލާއި ސޫދާ ކަމަށްވާ ތެލުގެ އަގު ވަނީ ފީފާއެއް 120 ޑޮލަރަށްވުރެ މައްޗަށް އުފުލިފައެވެ.
މީގެ އިތުރުން ސަޢޫދީ އެއާޕޯޓްތަކަށާއި އާންމު ސަރަޙައްދުތަކަށް އަމާޒުކޮށް ހޫތީން ދެމުންދާ ޙަމަލާތަކުގެ ނުރައްކާ ބޮޑުވުމާ ގުޅިގެން، އެމެރިކާއިން ވަނީ ސަޢޫދީގައި ތިބި އެޤައުމުގެ ބައެއް ސިފާރުޝީ މުވައްޒަފުން އެނބުރި ޤައުމަށް ގެންދިއުމުގެ މަސައްކަތް ފަށާފައެވެ. މި ނުތަނަވަސްކަން ކުޑަކޮށް، މަޝްވަރާގެ މަގުން މައްސަލަ ހައްލުކުރުމަށް އިސްތަންބޫލްގައި ވިލާތުގެ އަދި މެދުއަރަބިކަރައިގެ ޚާރިޖީ ވަޒީރުންގެ ބައްދަލުވުންތަކެއް ބާއްވަމުންދިޔަ ނަމަވެސް، އެމެރިކާއާއި އިސްރާއީލުން އައު އަސްކަރީ ފިޔަވަޅުތަކެއް އަޅައިފާނެކަމުގެ އިންޒާރުތައް ވަނީ ދީފައެވެ.
ބައިނަލްއަޤްވާމީ ޚަބަރުފަތުރާ އިދާރާތަކުން ރިޕޯޓުކުރާ ގޮތުގައި، ހޯމުޒް ކަނޑުއޮޅި ސަރަޙައްދުގައިވެސް ތެޔޮ އުފުލާ ބޯޓުފަހަރަށް ގެއްލުން ލިބެމުންދާއިރު، މަސްރަޙު އިތުރަށް ގޯސްވިޔަނުދީ ހިފެހެއްޓުމަށް ބައިނަލްއަޤްވާމީ ފަރާތްތަކުން ދަނީ މަސައްކަތްކުރަމުންނެވެ.
