"ކުލި ނުދެއްކިއްޔާ ބޭރަށް!": އަމާން ޓަވަރުން ފްލެޓް ހުސްކުރަން އަންގައި އެފްޑީސީން ފުރަތަމަ ފިޔަވަޅު އަޅައިފި!
ހުޅުމާލޭގެ "އަމާން ޓަވަރު" ތަކުގައި އަމާންކަމާއެކު ދިރިއުޅެމުންދިޔަ ބައެއް ފަރާތްތަކަށް މިވަނީ ކުއްލި ސޮކެއް ލިބިގެންގޮސްފައެވެ. ގަވާއިދުން ކުއްޔާއި މެއިންޓަނަންސް ފީ ނުދައްކައި އުޅުނު ދެ އެޕާޓްމަންޓެއްގެ އެއްބަސްވުން ބާޠިލުކޮށް، އެފްޑީސީން ވަނީ އެތަންތަން ހުސްކުރަން 15 ދުވަހުގެ ވަގުތެއް ދީ، "ނޯޓިސް" ދޫކޮށްފައެވެ.
އެފްޑީސީން ހާމަކުރި ގޮތުގައި، މި ނިންމުމަކީ ކޯޕަރޭޝަނާއި ރައްޔިތުންނާ ދެމެދުވެވިފައިވާ އެއްބަސްވުންތަކަށް ހުރިހާ އެންމެންވެސް އިޙްތިރާމްކޮށް، ހަމަހަމަކަމާއެކު އުޞޫލުތައް ހިންގުމުގެ ގޮތުން އެޅި ހަރުދަނާ ފިޔަވަޅެކެވެ. ކުލި ނުދައްކާ މީހުންގެ އޮންލައިން ޕޯޓަލް ޚިދުމަތްތައް ކަނޑާލުމުގެ އިތުރުން، އެޕާޓްމަންޓްތައް އަތުލުމުގެ މަސައްކަތް މިހާރު ވަނީ ފަށާފައެވެ.
"އިމާރާތްތައް ދެމެހެއްޓެނިވި ގޮތެއްގައި ބެލެހެއްޓުމަށާއި، އާންމުންނަށް ދެވޭ ޚިދުމަތުގެ ފެންވަރު ހިފެހެއްޓުމަށްޓަކައި ކޮންމެ މަހަކުވެސް ގަވާއިދުން ކުއްޔާއި މެއިންޓަނަންސް ފީ ދެއްކުމަކީ ކޮންމެހެން ބޭނުންތެރި ކަމެއް،" - އެފްޑީސީ
އެއްބަސްވުން ބާޠިލުކުރި ދެ އެޕާޓްމަންޓުގެ ވެރިންނަށް ތަން ހުސްކޮށް، ތަޅުދަނޑި ހަވާލުކުރުމަށް ދީފައިވަނީ އެންމެ 15 ދުވަހުގެ މުއްދަތެކެވެ. ހިޔާ ފްލެޓްތަކާއި އެހެނިހެން ސޯޝަލް ހައުސިންގ ތަކެކޭ އެއްފަދައިން، ކުލި ނުދެއްކުމުގެ މައްސަލައަކީ ސަރުކާރުގެ ހައުސިންގ ކުންފުނިތަކަށް ކުރިމަތިވެފައިވާ އެންމެ ބޮޑު މާލީ ގޮންޖެހުމެވެ. އެފްޑީސީގެ މި ނިންމުމާއެކު، އަމާން ޓަވަރުތަކުގައި ކުލި ނުދައްކައި ތިބި އެހެން ފަރާތްތަކަށްވެސް މިވަނީ ގަވާއިދުން ކުލި ދައްކަން ފެށުމަށް ވަރުގަދަ މެސެޖެއް ލިބިގެންގޮސްފައެވެ.
