ސްޕޭނުގައި 3 ދުވަހުގެ ޤައުމީ ހިތާމަ އިއުލާނުކޮށްފި!
ސްޕޭނުގެ ވެރިރަށް މެޑްރިޑުން ސެވިއްޔާއަށް ދަތުރުކުރި ދެ ހައި-ސްޕީޑް ރޭލު ޖެހި ހިނގި ނުރައްކާތެރި އެކްސިޑެންޓެއްގައި މަދުވެގެން 68 މީހުން ނިޔާވެ، އެތައް ބަޔަކަށް ބޮޑެތި އަނިޔާތަކެއް ވުމާ ގުޅިގެން ސްޕޭނު ސަރުކާރުން މުޅި ޤައުމުގައި 3 ދުވަހުގެ ޤައުމީ ހިތާމަ އިއުލާނުކޮށްފިއެވެ!
މި ހާދިސާ ހިނގާފައިވަނީ ޓޮލެޑޯ ޕްރޮވިންސްގެ އުރުޑާ އަދި ލޮސް ޔެބެނެސް ސަރަޙައްދުގެ ރޭލު މަގުގައެވެ. ހުއްޓިފައި އޮތް 'އައިރިއޯ' (Iryo) ކުންފުނީގެ ރޭލެއްގެ ފަހަތުގައި، ފަހަތުން އައި 'އޭވީއީ' (AVE) ހައި-ސްޕީޑް ރޭލު ވަރަށް ބާރު މިނުގައި ގޮސް ޖެހުމުގެ ސަބަބުން، ރޭލުގެ ބައެއް ފޮށިތައް ވަނީ މަގުން ނެއްޓި ފުރޮޅާލާފައެވެ.
އެކްސިޑެންޓުގައި 68 މީހުން ނިޔާވެފައިވާކަން ކަށަވަރުވެފައިވާއިރު، 170 އަށްވުރެ ގިނަ މީހުންނަށް އަނިޔާވެ، އޭގެ ތެރެއިން 15 މީހަކަށް ހޮސްޕިޓަލްތަކުގައި ސީރިއަސް ހާލަތެއްގައި އަންނަނީ ފަރުވާދެމުންނެވެ. ސްޕޭނުގެ ބޮޑުވަޒީރު ޕެޑްރޯ ސަންޗޭޒް ވަނީ އޮކްޓޫބަރު 29 އިން އޮކްޓޫބަރު 31 ގެ ނިޔަލަށް ޤައުމީ ހިތާމައިގެ 3 ދުވަސް އިއުލާނު ކުރައްވާފައެވެ. އޮޓޮމެޓިކް ސިގްނަލް ސިސްޓަމް ހުއްޓުމާ ގުޅިގެން މެނުއަލްކޮށް ކޮންޓްރޯލް ކުރަނިކޮށް ހިނގި މި އެކްސިޑެންޓަކީ އިންސާނީ އޮޅުމަކުން (Human Error) ދިމާވި ކަމެއްތޯ ބެލުމަށް ސްޕޭނުގެ ރޭލު އިދާރާތަކުން ވަނީ ފުޅާ ތަހުގީގެއް ފަށާފައެވެ.
މިއީ ފާއިތުވި ގިނަ އަހަރުތަކެއްގެ ތެރޭގައި ވިލާތުގެ ޤައުމެއްގައި ހިނގި ރޭލު އެކްސިޑެންޓުތަކުގެ ތެރެއިން އެންމެ ހިތާމަވެރި އަދި އެންމެ ގިނަ މީހުން ނިޔާވި އެއް ހާދިސާއެވެ.
