ހަމަނުޖެހުންތަކަށްފަހު ފްރާންސްގެ ފްރަންޓްލައިން ނުކުތީ މަގުމައްޗަށް: ޕެރިސްގެ ބައެއް ސަރަޙައްދުތަކުގައި ވަގުތީ ކާފިއު އިއުލާންކޮށްފި!

ފްރާންސްގެ ދިރިއުޅުމުގެ ޚަރަދުތައް ބޮޑުވުމާއި ތަޢުލީމީ ދާއިރާގެ ކަންކަމާ ގުޅިގެން މުޅި ޤައުމުގައި ފެށުނު މުޒާހަރާތައް ބޮޑު ހަމަނުޖެހުމަކަށް ބަދަލުވެ، އެތައް ސިޓީއެއްގައި ބޮޑެތި ގެއްލުންތަކެއް ލިބުމާ ގުޅިގެން، ވެރިރަށް ޕެރިސް ހިމެނޭހެން ބޮޑެތި ސިޓީތަކެއްގައި ވަގުތީ ކާފިއު (Curfew) ވަނީ އިއުލާންކޮށްފައެވެ.

މި ހަފުތާ ބަންދުގައި ހިންގި ބޮޑެތި ހަމަނުޖެހުންތަކުގައި ސަރުކާރުގެ އިމާރާތްތަކަށާއި، ތާރީޚީ ތަންތަނަށް އަދި ވިޔަފާރިތަކަށް ބޮޑެތި ގެއްލުންތަކެއް ދީފައިވާއިރު، ރައްކާތެރިކަމުގެ ފިޔަވަޅެއްގެ ގޮތުން ފްރާންސްގެ ބޮޑުވަޒީރު ސެބަސްޓިއަން ކޯނޫ ވަނީ ވަކިވަކި ސަރަޙައްދުތަކުގައި ކާފިއު ހިންގުމުގެ ހުއްދަ ދެއްވާފައެވެ.

ޕެރިސް ފުލުހުންގެ އެންގުމާއެކު، އިއްޔެ (19 އޮކްޓޯބަރު) ރޭގަނޑު 11:00 އިން ފެށިގެން މިއަދު ހެނދުނު 6:00 އާ ހަމައަށް ޕެރިސްގެ މަޝްހޫރު 'ޕްލޭސް ޑެ ލަ ރިޕަބްލިކް' (Place de la République) އަދި 'ލެ ހާލްސް' (Les Halles) ސަރަޙައްދުގައި ކާފިއު ވަނީ ހިންގާފައެވެ. އަދި ރޭގަނޑު 8:00 ގެ ފަހުން އެއްވުންތައް ބޭއްވުން ވަނީ މަނާކޮށްފައެވެ.

ޕެރިސްގެ އިތުރުން ، ލިޔޯން (Lyon) އަދި ލީލް (Lille) ފަދަ ސިޓީތަކުގައިވެސް ވަކި ގަޑިތަކެއްގައި ނުވަތަ ކުޑަކުދިންނަށް ޚާއްޞަކޮށްގެން ރޭގަނޑު ކާފިއު ވަނީ އިއުލާންކޮށްފައެވެ. މި މުޒާހަރާތަކަކީ ތަކެތީގެ އަގުބޮޑުވުމާއި ދިރިއުޅުމުގެ ޚަރަދުތަކާ ދެކޮޅަށް ޢާންމުންނާއި ދަރިވަރުން ފެށި ހަރަކާތްތަކެކެވެ. ނަމަވެސް ބައެއް ގްރޫޕްތަކުން ވަނީ ފިހާރަތައް ފޫއަޅުވައި، ސިޓީ ހޯލްތަކުގައި ރޯކޮށް ބޮޑެތި ގެއްލުންތަކެއް ދީފައެވެ. އެމެރިކާ ފަދަ ޤައުމުތަކުން ވަނީ ފްރާންސްގައި އުޅޭ އެ މީހުންގެ ރައްޔިތުން މުޒާހަރާކުރާ ސަރަޙައްދުތަކާ ދުރަށް ޖެހިތިބުމަށް އަންގާފައެވެ.

ފްރާންސްގެ ސަރުކާރުން ބުނެފައިވަނީ އާންމުންގެ އަމަންއަމާންކަން ނަގާލަން އުޅޭ ފަރާތްތަކަށް ފުރުޞަތު ނުދީ، ސަލާމަތީ ފިޔަވަޅުތައް އިތުރަށް ވަރުގަދަކުރާނެ ކަމަށެވެ.