ފާޚާނާ ކަރުދާހުގައި އޮޅާފައި އޮތް ސިއްރު މައިކެއް ފެނުނު މައްސަލައެއްގައި އޯޕަންއޭއައިގެ އިންޖިނިއަރަކު ހައްޔަރުކޮށްފި!
ކޯޓު ރެކޯޑުތަކުން އެނގޭ ގޮތުގައި، އޯޕަންއޭއައިގެ ސެން ފްރެންސިސްކޯ ހެޑްކުއާޓަރުގެ އެގްޒެކެޓިވް މީޓިން ރޫމެއްގެ ތެރޭގައި ސިއްރުން އަޑުއަހާ އާލާތެއް ހަރުކުރި ކަމުގެ ތުހުމަތުގައި، އެ ކުންފުނީގެ އުމުރުން 35 އަހަރުގެ އިންޖިނިއަރަކު އެމެރިކާގެ ފެޑެރަލް ކަމާބެހޭ ފަރާތްތަކުން ވަނީ ހައްޔަރުކޮށްފައެވެ.
ޗެޓްޖީޕީޓީ އުފައްދާ ކުންފުންޏާ 2025 ވަނަ އަހަރުގެ ޖުލައި މަހު ގުޅުނު ސައޫދީ އަރަބިއްޔާގެ ރައްޔިތެއް ކަމަށްވާ ޢަބްދުއްރަޙްމާން އަލްފައުޒާން ވަޒީފާއިން ވަކިކޮށްފައިވަނީ، ސެޕްޓެމްބަރު 30 ގައި ސެކިއުރިޓީ އޮފިޝަލުންނަށް މި އަޑުއަހާ އާލާތް ފެނުމާ ގުޅިގެންނެވެ. ކުންފުނީގެ ރިސާޗާއި ވިޔަފާރި ޕްލޭންތަކާ ބެހޭ ސިއްރު މަޝްވަރާތައް ކުރާ ކޮޓަރީގައި ހުރި ޓީވީއެއްގެ ފަހަތުގައިވާ ޔޫއެސްބީ ޕޯޓަކަށް ޖަހާފައިވާ މި އާލާތް ފެނުނީ ފާޚާނާ ކަރުދާހުގައި އޮޅާފައެވެ.
އެމެރިކާގެ ޖަސްޓިސް ޑިޕާޓްމަންޓުން ބުނި ގޮތުގައި، އޯޕަންއޭއައިއިން ވަނީ އެ އާލާތް ތަހުލީލުކޮށް ތުހުމަތުކުރެވޭ މީހާ ހޯދުމަށް އެ ކުންފުނީގެ އަމިއްލަ އާޓިފިޝަލް އިންޓެލިޖެންސް މޮޑެލްތައް ބޭނުންކޮށްފައެވެ. ތަހުގީގު ކުރާ ފަރާތްތަކުން ހޯދި ހޯދުންތަކުން އެނގުނު ގޮތުގައި، އަލްފައުޒާންގެ އަނބިމީހާއާ ގުޅުންހުރި ޗެޓްބޮޓް އެކައުންޓަކުން ވަނީ ފެނުނު އާލާތާ އެއްގޮތް ރެކޯޑިން އާލާތްތަކާ ބެހޭ ފަންނީ ސުވާލުތަކެއް ކޮށްފައެވެ. އަދި އަލްފައުޒާން ވަނީ އެގްޒެކެޓިވް މީޓިންތަކުގެ ތާވަލުތައް ބެލުމަށް އޮފީހުގެ ވަސީލަތްތައް ބޭނުންކޮށްފައެވެ.
މީޓިން ރޫމްގައި ސެކިއުރިޓީ ކެމެރާ ހަރުކުރުމަށްފަހު، ޓީވީ ފަހަތް ބެލުމަށް އަލްފައުޒާން އެނބުރި އައި ތަން ސީސީޓީވީ ފޫޓޭޖުން ވަނީ ފެނިފައެވެ. މީގެ އިތުރުން، އެހެން ކޮޓަރިއެއްގައި ދޫކޮށްލާފައި ހުރި ކޮތަޅެއްގެ ތެރެއިން، އަލްފައުޒާންގެ އައިޑެންޓިޓީ ލިޔެކިޔުންތަކާއެކު ދެވަނަ ރެކޯޑިން އާލާތެއްވެސް ވަނީ ފެނިފައެވެ.
އޯޕަންއޭއައިއިން ބުނި ގޮތުގައި، މޮޑެލް ވޭޓްސް، ސޯސް ކޯޑު ނުވަތަ ކަސްޓަމަރުންގެ މައުލޫމާތު ނުވަތަ ޑޭޓާ ނުޙައްޤުން ހޯދާފައިވާ ކަމުގެ ނުވަތަ ބޭރުކޮށްފައިވާ ކަމުގެ އެއްވެސް ނިޝާނެއް ނެތެވެ. އަލްފައުޒާން ފެޑެރަލް ކޯޓަށް ހާޒިރުކޮށްފައިވަނީ ސިއްރުން އަޑުއަހަން އުޅުމުގެ ތުހުމަތުގައެވެ. ކުށް ސާބިތުވެއްޖެނަމަ މިއީ ގިނަވެގެން 5 އަހަރުގެ ޖަލު ހުކުމަކާއި $250,000 ގެ ޖޫރިމައިނާއެއް އަންނާނެ ކުށެކެވެ.
