ދަރިންނަށް ފޯނު ގެންގުޅުމާއި ޔޫޓިއުބް ބޭނުންކުރުން ޝަކީރާ މަނާކޮށްފި
ދުނިޔޭގެ މަޝްހޫރު ލަވަކިޔުންތެރިޔާ ޝަކީރާ، އޭނާގެ ދެ ފިރިހެން ދަރިން ކަމަށްވާ މިލާން އަދި ސާޝާ ޓެކްނޮލޮޖީ ބޭނުންކުރުމުގައި ވަރަށް ހަރުކަށި އުސޫލުތަކެއް ގެންގުޅޭކަން ހާމަކޮށްފިއެވެ. އެގޮތުން އެ ދެ ކުދިންނަށް އަމިއްލަ ފޯނެއް ގެންގުޅުމާއި، ޔޫޓިއުބް ބޭނުންކުރުން މުޅިން މަނާކޮށްފައިވާ ކަމަށް އޭނާ ވަނީ ބުނެފައެވެ.
ޝަކީރާ ހާމަކުރި ގޮތުގައި އެ ދެ ކުދިންނަށް އިންޓަރނެޓް ބޭނުންކުރެވެނީ ވަރަށް ބޮޑަށް ބަލައި ކޮންޓްރޯލް ކުރެވިގެންނެވެ. އެ ކުދިންނަށް އައިޕެޑް ބޭނުންކުރުމުގެ ހުއްދަ ލިބެނީ ހަމައެކަނި ކޮންމެ ހޮނިހިރު ދުވަހެއްގެ ހެނދުނު، ގާތްގަނޑަކަށް އެއްގަޑިއިރުގެ ވަގުތަކަށެވެ. މީގެ އިތުރުން އިންޓަރނެޓުން އެ ކުދިންގެ އަމިއްލަ ނަމުން ނުވަތަ މައިންބަފައިންގެ ނަމުން ސާޗް ނުކުރުމަށާއި، އިންޓަރނެޓުން ފެންނަ ކޮންމެ މައުލޫމާތަކީ ހަގީގަތަކަށް ނުވެދާނެކަން އޭނާ އަބަދުވެސް އެ ކުދިންނަށް ވިސްނައިދެއެވެ.
މިފަދަ ހަރުކަށި އުސޫލުތަކެއް ކަނޑައެޅުމުގެ މައިގަނޑު މަގުސަދަކީ، އުފާވެރިކަމަކީ ހަމައެކަނި ސްކްރީންތަކުންނާއި ސޯޝަލް މީޑިއާއިން ލިބޭ އެއްޗެއް ނޫންކަން ދަސްކޮށްދިނުން ކަމަށް ޝަކީރާ ފާހަގަކުރިއެވެ. އަދި އޭނާ ބޭނުންވަނީ ދިރިއުޅުމުގެ އާދައިގެ ކަންކަމުން އުފާވެރިކަން ހޯދުމަށާއި، އިންޓަރނެޓުން ފެންނަ ކަންކަމާމެދު ފުންކޮށް ވިސްނުމުގެ ގާބިލުކަން އެ ކުދިންގެ ކިބައިގައި އަށަގެންނެވުމަށެވެ.
ސްމާޓްފޯނާއި ޓެބްލެޓްތަކަކީ ކުޑަކުދިންގެ އާންމު ދިރިއުޅުމުގެ ބައެއްގެ ގޮތުގައި ބެލެވޭ މި ޒަމާނުގައި މި ފިޔަވަޅުތަކަކީ އާދަޔާ ހިލާފު ހަރުކަށި ކަންތައްތަކަކަށް ވީނަމަވެސް، އެފަދަ ހިފޭހެއްޓުންތަކެއް ގެންގުޅޭ ސަބަބު ދަރިންނަށް ފަހުމްވާ ކަމަށް އޭނާ ބުންޏެވެ. ޝަކީރާގެ އެންމެ ބޮޑު އުންމީދަކީ ސޯޝަލް މީޑިއާގެ ތައުރީފާއި ރުހުމަށް ބަރޯސާނުވެ، ފުރިހަމަ މިނިވަންކަމާއެކު އެ ކުދިން ބޮޑުވުމެވެ.
