ތިލަފުށީގެ ކުނި މައްސަލައަށް ދާއިމީ ހައްލެއް: "އިންސިނެރޭޓަރު" 2028 ގެ މެދުތެރޭގައި އޮޕަރޭޝަނަށް!
ކުރެފޯނު ސަރަޙައްދުގެ ކުނީގެ މައްސަލައަށް ދާއިމީ އަދި ތިމާވެއްޓާ ރައްޓެހި ހައްލެއް ހޯދުމަށް ސަރުކާރުން ކުރިއަށްގެންދާ "ކުނިން ހަކަތަ އުފެއްދުމުގެ" (Waste-to-Energy) މެގާ ޕްރޮޖެކްޓުގެ ދަށުން، ތިލަފުށީގައި ބަހައްޓާ ކުނި އަންދާ އިންސިނެރޭޓަރުގެ މަސައްކަތް ނިންމައި 2028 ވަނަ އަހަރުގެ މެދުތެރޭގައި ޚިދުމަތަށް ނެރުމަށް މަސައްކަތް ކުރަމުންދާކަން ސަރުކާރުން ހާމަކޮށްފިއެވެ. މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީން ހާމަކުރި ގޮތުގައި، މި އިންސިނެރޭޓަރަކީ ޚާއްސަކޮށް އާންމުކޮށް ނައްތާލަން ދަތި ނުރައްކާތެރި ކުންޏާއި، އޮޑިދޯނިފަހަރު ބަނުމުގައި ބޭނުންކުރާ ފައިބަރުގްލާސް ފަދަ ތަކެތި ތިމާވެއްޓަށް ގެއްލުން ނުލިބޭނެހެން ނައްތާލުމަށް ޤާއިމުކުރެވޭ މުހިންމު ވަސީލަތެކެވެ.
މި ޕްލާންޓް އޮޕަރޭޝަނަށް އައުމާއެކު ދުވާލަކު 500 ޓަނުގެ ކުނި އަންދައިގެން ކަރަންޓު އުފެއްދުމުގެ ޤާބިލުކަން ލިބިގެންދާނެއެވެ. މީގެއިން އުފައްދާ ހަކަތައިން ގާތްގަނޑަކަށް 5,000 ގޭބިސީއަށް ކަރަންޓު ފޯރުކޮށްދެވޭނެއެވެ. ފާއިތުވި ގިނަ އަހަރުތަކެއް ވަންދެން ތިލަފުށިން އަރަމުންދިޔަ ކުޅިދުން ހުއްޓުވައި، ޒަމާނީ ފިލްޓްރޭޝަން ނިޒާމުތަކާއެކު ޖައްވަށް ފެތުރޭ ނުރައްކާތެރި ގޭސްތައް ކަންޓްރޯލް ކުރެވޭނެއެވެ. މުޅި ރާއްޖޭގެ ކުނި މެނޭޖްކުރުމުގެ ނިޒާމު ހަރުދަނާކުރުމުގެ ގޮތުން، އައްޑޫ ސިޓީގައިވެސް ކުނިން ހަކަތަ އުފައްދާ ނިޒާމެއް ވަނީ ޤާއިމުކުރެވިފައެވެ. މި މަޝްރޫޢު މުޅިން ނިމި އޮޕަރޭޝަނަށް އައުމާއެކު، މާލެ ސަރަޙައްދާއި އަތޮޅުތަކުގެ ކުނީގެ މައްސަލައަށް އެދެވޭ ބޮޑު ހައްލެއް ލިބި، ރާއްޖޭގެ ފަތުރުވެރިކަމަށާއި ތިމާވެއްޓަށް ބޮޑު ކުރިއެރުމެއް ލިބިގެންދާނެއެވެ.
