ތަކެތީގެ އަގުބޮޑުވުމާ ދެކޮޅަށް ފްރާންސްގައި ކުރި މުޒާހަރާތައް ބޮޑު ހަމަނުޖެހުމަކަށް ބަދަލުވެ، ނުރައްކާ މުޅި ޔޫރަޕަށް

ތަކެތީގެ އަގުބޮޑުވުމާއި ދިރިއުޅުމުގެ ހަރަދުތައް އަތްނުފޯރާ ފަށަށް ދިއުމާ ގުޅިގެން ފްރާންސްގެ އެކި ކަންކޮޅުތަކުގައި ފެށި މުޒާހަރާތައް ބޮޑެތި ހަމަނުޖެހުންތަކަކަށް ބަދަލުވެ، މުޅި ގައުމުގެ މަގުތައް ވަނީ ނާމާންކަމުގެ ތެރެއަށް ވެއްޓިފައެވެ. ޕެރިސް، މާސޭ އަދި ލިޔޯން ފަދަ ބޮޑެތި ރަށްތަކުގައި އާންމުން ކުރި ސުލްހަވެރި މުޒާހަރާތަކުގެ ތެރެއަށް ހައްދުފަހަނައެޅި ގުރޫޕުތަކުން ވަދެ، ތަންތަނުގައި ރޯކޮށް، ފިހާރަތައް ފުރާޅައި، ސަރުކާރުގެ އިމާރާތްތަކަށް ވަނީ ބޮޑެތި ގެއްލުންތަކެއް ދީފައެވެ.

މުޒާހަރާގެ ފުޅާމިނާއި ލިބުނު ގެއްލުންތައް:

• ހައްޔަރުކުރި މީހުން: ބައިނަލްއަގުވާމީ މީޑިއާތަކުން ( Reuters, AP, AFP, BBC) ރިޕޯޓްކުރާ ގޮތުގައި ހަމަނުޖެހުންތަކާ ގުޅިގެން މިހާތަނަށް 2,300 އަށްވުރެ ގިނަ މީހުން ވަނީ ހައްޔަރުކޮށްފައެވެ.

• އަނިޔާވި މީހުން: ހަމަނުޖެހުންތަކުގައި މަދުވެގެން ދެ މީހަކު މަރުވެފައިވާއިރު، 1,000 އަށްވުރެ ގިނަ ފުލުހުންނާއި އާންމުންނަށް ވަނީ ތަފާތު އަނިޔާތައް ލިބިފައެވެ.

• އިގްތިސާދީ އަސަރު: ފްރާންސްގެ ހަމަނުޖެހުންތަކުގެ ސަބަބުން ޔޫރަޕުގެ މާލީ ބާޒާރުތަކަށް ވަނީ ބޮޑު ލޮޅުމެއް އައިސްފައެވެ. އެގޮތުން ޔޫރޯގެ އަގު ވެއްޓި، ފްރާންސްގެ ހިއްސާގެ ބާޒާރު ވަނީ ވަރަށް ބޮޑަށް ދަށަށް ގޮސްފައެވެ.

ޔޫރަޕުގެ އިތުރު ގައުމުތަކަށް އަސަރުކުރުން:

މި ހަމަނުޖެހުންތަކުގެ އަސަރު ފްރާންސްގެ އިމުން ބޭރަށް ފެތުރި، އިރާން ހަނގުރާމައާ ގުޅިގެން ތެލުގެ އަގު ބޮޑުވުމުގެ ނުރުހުމުގައި އިޓަލީ، ބެލްޖިއަމް އަދި އަލްބޭނިއާ ފަދަ ގައުމުތަކުގައިވެސް ވަނީ ވަރުގަދަ މުޒާހަރާތަކެއް ބާއްވާފައެވެ.

ސަރުކާރުގެ ރައްދު:

ފްރާންސްގެ ރައީސް އެމަނުއެލް މެކްރޮން ވަނީ މަގުތަކުގައި ހިންގި އުދަނގޫ އަދި އަނިޔާވެރި އަމަލުތައް ހައްދުފަހަނައެޅި ކަމަށް ވިދާޅުވެ، އެކަން ހަރުކަށި އިބާރާތުން ކުށްވެރިކުރައްވާފައެވެ. އަދި ތަންތަނަށް ގެއްލުންދީ، ވައްކަންކުރި މީހުންނަށް ގާނޫނީ ގޮތުން ހައްގު އަދަބު ދެވޭނެ ކަމަށް މެކްރޮން ވިދާޅުވިއެވެ. ނަމަވެސް، ކުރިއަށް އޮތް ރިޔާސީ އިންތިހާބަށް ކައިރިވެފައިވަނިކޮށް ސަރުކާރަށް އިދިކޮޅު ފަރާތްތަކުގެ ބޮޑެތި ފާޑުކިޔުންތަކެއް ވަނީ އަމާޒުވެފައެވެ.