ސްޓްރެސްފިލުވައިލަން ކަހައިދޭ "ކަހާ ސެލޫން"! – ޗައިނާގައި މަގުބޫލުވަމުންދާ އާދާޔާޚިލާފު ވިޔަފާރި
ދިރިއުޅުމުގެ ކަންކަމާ ހެދި ބޯބޮޑުވެ، ސްޓްރެސްވެގެން އުޅޭއިރު ހަށިގަނޑު ހަމައަކަށް އަޅުވާލަން ތިޔަ ކުރަނީ ކޮންކަމެއްހެއްޔެވެ؟ މަސާޖެއް ކޮށްލަނީ ހެއްޔެވެ؟ ނޫނީ މޫދަށް އެރިލަނީ ހެއްޔެވެ؟ ޗައިނާގައި މިހާރު މިކަމަށް އޮތީ މުޅިން ތަފާތު، އަދި ވަރަށް މަޖާ ހައްލެކެވެ؛ އެއީ "ކަހައިދޭ ސެލޫން" ތަކަށް ގޮސް، ލާރިދީގެން ބުރަކަށި ކަހައިލުމެވެ!
ޗައިނާގެ ޒުވާން ވިޔަފާރިވެރިއަކު ފެށި މި އާދާޔާޚިލާފު ކޮންސެޕްޓް މިއަދު ވަނީ މުޅި ގައުމުގައި ވަރަށް ބޮޑަށް ވައިގައި ހިފާފައެވެ. މި ސެލޫންތަކަށް ވަންނަ ކަސްޓަމަރުން އަރާމު އެނދުތަކުގައި އޮށޯތުމުން، ތަމްރީނުލިބިފައިވާ މުވައްޒަފުން ވަރަށް އޯގާތެރިކަމާއެކު، އަތުގެ އިނގިލިތަކުން ނުވަތަ ޚާއްޞަ މަޑު ބްރަޝްތައް ބޭނުންކޮށްގެން ކަސްޓަމަރުގެ ބުރަކަށީގައި މަޑުމަޑުން ކަހައިދޭން ފަށައެވެ.
އެކި މީޑިއާތަކުން ރިޕޯޓުކުރާ ގޮތުގައި، މި "ކަހާ ސެލޫން" ތަކުން ޚިދުމަތް ހޯދާ މީހުން ބުނަނީ، އާދައިގެ މަސާޖަކަށްވުރެ މިގޮތަށް މަޑުމަޑުން ކަހައިދިނުމުން ނާރުތަކަށް އަރާމުލިބި، ސިކުނޑި ހަމައަކަށް އެޅެން މާ ފަސޭހަވާ ކަމަށެވެ. އަދި ބައެއް ކަސްޓަމަރުންނަށް މި އަރާމުގައި ނިދޭގޮތްވެސް ވެއެވެ.
ދުވަހުގެ ވަރުބަލިކަމާއި ނުހަމަޖެހުން ފިލުވާލަން އައިސް ތިބޭ މީހުންނަށް، މި ސެލޫންތަކުގައި މަޑު މިއުޒިކާއެކު ހިތްގައިމު ވަސްދުވާ މާހައުލެއް ހަމަޖައްސައިދީފައިވެއެވެ. ސޯޝަލް މީޑިއާގައި މިކަން ބޮޑު ޓްރެންޑަކަށް ވެގެންގޮސްފައިވާއިރު، މިއީ "އެއްވެސް ތަކުލީފެއްނެތި" ސްޓްރެސްފިލުވައިލަން ލިބޭ އެންމެ މަޖާ އަދި އެންމެ އަރާމު އެއް ޚިދުމަތް ކަމަށް ގިނަ ބަޔަކު އަންނަނީ ބުނަމުންނެވެ.
