ރަސްމާލެއަކީ އިންވެސްޓްމަންޓެއް ނޫން، އެއީ ބޮޑު އޮޅުވާލުމެއް": ރަސްމާލެ ދެކޮޅަށް އިމްރާން އިސްވެ ބޮޑު ހަރަކާތެއް ފައްޓަވައިފި!
ސަރުކާރުން ކުރިއަށްގެންދާ ރަސްމާލެ (ފުޝިދިއްގަރުފަޅު) ހިއްކުމާއި އެ ބިން ބޭރުގެ ކުންފުންޏަކަށް ދިގު މުއްދަތަކަށް ދިނުމުގެ މަޝްރޫއަކީ ޤައުމީ މަސްލަހަތާ ޚިލާފު، އަދި އެއްވެސް ޙަޤީޤީ އިންވެސްޓްމަންޓެއް ނެތް ބޮޑު "ސްކޭމެއް" ކަމަށް ކުރީގެ ހޯމް މިނިސްޓަރު އަދި އަދާލަތު ޕާޓީގެ ރައީސް ޝެއިޚް އިމްރާން އަބްދުއްﷲ ތުހުމަތު ކުރައްވައިފިއެވެ.
"ދިވެހީންގެ ބިން ދިވެހީންނަށް" މި ނަމުގައި އިދިކޮޅު ސިޔާސީ ޕާޓީތަކާއި، ޖަމިއްޔާތަކާއި އަދި އާންމު ރައްޔިތުން ގުޅިގެން ފެށި ޤައުމީ ހަރަކާތް އިފްތިތާޙު ކުރުމުގެ ހަފްލާގައި ވާހަކަދައްކަވަމުން އިމްރާން ވިދާޅުވީ، ރަސްމާލެއިން ބޭރުގެ ކުންފުންޏަކަށް ބޮޑު ބިމެއް ދޭން ނިންމާފައިވާ ނިންމުމަކީ ދިވެހިރާއްޖޭގެ އިސްތިޤްލާލަށާއި ސަރުހައްދީ ރައްކާތެރިކަމަށް އޮތް ބޮޑު ނުރައްކަލެއް ކަމަށެވެ. އަދި މި މަޝްރޫއުގެ ދަށުން ޤައުމަށް ލިބޭނެ މާލީ ނުވަތަ އިޤްތިޞާދީ ފައިދާއެއް ނެތްއިރު، މިއީ ރައްޔިތުންގެ ލޮލުގައި އަނދުން އަޅުވައިގެން ހިންގާ އޮޅުވާލުމެއް ކަމަށް އޭނާ ސިފަކުރެއްވިއެވެ.
މި ހަރަކާތުގެ މައިގަނޑު މަޤްޞަދަކީ ރަސްމާލެ މަޝްރޫއުގެ ދަށުން ބޭރުގެ ފަރާތްތަކަށް ބިން ދިނުމަށް ވެވިފައިވާ އެއްބަސްވުންތައް ބާތިލުކުރުވުމެވެ. އިމްރާން ވަނީ ޤައުމީ މަސްލަހަތު އިސްކުރައްވާ ހުރިހާ ސިޔާސީ ޕާޓީތަކުންނާއި، ޖަމިއްޔާތަކުން އަދި އާންމު ރައްޔިތުން މި ހަރަކާތުގައި ބައިވެރިވުމަށް ގޮވާލައްވާފައެވެ.
އެކި މަސްދަރުތަކުން އެނގޭގޮތުގައި، ރަސްމާލެ މަޝްރޫއާ ގުޅޭގޮތުން ޔޫއޭއީގެ އީގަލް ހިލްސް (Eagle Hills) ކުންފުންޏާއެކު ވެވިފައިވާ އެއްބަސްވުމުގެ ތަފްސީލުތައް ސަރުކާރުން ހާމަނުކުރާތީ އިދިކޮޅު މައި ޕާޓީ އެމްޑީޕީ އާއި އެހެނިހެން ސިޔާސީ ފަރާތްތަކުން އަންނަނީ ނުރުހުން ފާޅުކުރަމުންނެވެ. ނަމަވެސް، ސަރުކާރުން ބުނަމުންދަނީ މި މަޝްރޫއުގެ ސަބަބުން ރާއްޖޭގެ އިޤްތިޞާދަށް އެކި ދާއިރާތަކުން ބޮޑެތި ކުރިއެރުންތަކެއް ލިބިގެންދާނެ ކަމަށެވެ.
