ހުޅުމާލެ ހިޔާ ޓަވަރު 11 ގެ އެޕާޓްމަންޓެއްގައި އަލިފާން ރޯވެ، ބަދިގެއަށް ބޮޑެތި ގެއްލުންތަކެއް ވެއްޖެ!
ހުޅުމާލެ ފޭސް 2 ގެ ހިޔާ އަވަށުގައި ހުންނަ 11 ވަނަ ޓަވަރުގެ 23 ވަނަ ފްލޯގެ އެޕާޓްމަންޓެއްގައި އިއްޔެ އަލިފާނުގެ ހާދިސާއެއް ހިނގައިފިއެވެ.
ނޭޝަނަލް ޑިސާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އާއި އެމްއެންޑީއެފް ފަޔަރ އެންޑް ރެސްކިއު ސަރވިސްއިން މައުލޫމާތު ދެއްވާގޮތުގައި، މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ލިބިފައެއް ނުވެއެވެ. ނަމަވެސް އަލިފާން ރޯވުމުގެ ސަބަބުން އެ އެޕާޓްމަންޓުގެ ބަދިގެއަށާއި އެތަނުގައި ހުރި ގޭސް އުނދުނާއި، ހިފާގެންގުޅޭ ސާމާނުގެ އިތުރުން ކަބަޑުސެޓަށް ވަނީ ބޭނުންނުކުރެވޭ ވަރަށް ބޮޑެތި ގެއްލުންތަކެއް ވެފައެވެ.
އެންޑީއެމްއޭއިން ސޯޝަލް މީޑިއާގައި އާންމުކޮށްފައިވާ ފޮޓޯތަކުން ފެންނަ ގޮތުގައި ބަދިގެ ބައި ވަނީ މުޅިން އަނދައި އަޅިއަށްވެފައެވެ. މި ހާދިސާ ހިނގަން މެދުވެރިވި ސަބަބު ކަމާބެހޭ އިދާރާތަކުން ދަނީ އިތުރަށް ތަހުގީގު ކުރަމުންނެވެ.
