ހަބަރު ނުވެގެން ބެލިއިރު އާއިލާގެ 5 މެމްބަރުންވެސް މަރުވެފައި އޮތްވާ ފެނިއްޖެ.
އިންޑިއާގެ ގްރޭޓަރ ނޯއިޑާގެ ނަގަލަ ސިރީ ޕާޑަމް ވިލެޖްގެ ރާބޫޕުރާ ސަރަހައްދުގައި ހުންނަ ގޭގައި އެއް އާއިލާއެއްގެ 5 މީހުން މަރުވެފައި އޮތްވާ ފެނުނީ ހެނދުނު އެމީހުން ބޭރަށް ނުނިކުމެގެން އަވަށްޓެރިން އެމީހުން ދިރިއުޅޭ ގެއަށް ވަނުމުންނެވެ. މަރުވެފައިވަނީ އުމުރުން 37 އަހަރުގެ މަހޭޝްއާއި، އޭނާގެ އަންހެނުން ލަލިތާ (35 އަހަރު) އަދި އެމީހުންގެ ތިން ކުދިން ކަމަށްވާ ލައްޑޫ (11 އަހަރު)، މިޝްތީ (7 އަހަރު) އަދި ސާކްޝާތު (3 އަހަރު) އެވެ. އަވަށްޓެރިންނާއި މަހޭޝްގެ މަންމަ ފުލުހުންނަށް މައުލޫމާތު ދީފައިވާ ގޮތުގައި އެ އާއިލާއިން ރޭގަނޑު ނިދަން ދިޔައީ މެގީ ނޫޑްލްސް އާއި ސައި ބުއިމަށްފަހުގައެވެ.
ފުރަތަމަ ފުލުހުންނާއި ކާބޯތަކެތީގެ ރައްކާތެރިކަމާ ބެހޭ އޮފިޝަލުން ޝައްކުކުރީ މިއީ ކާނާ ނުބައިވުމުގެ (Food Poisoning) ސަބަބުން ހިނގި ކަމެއް ކަމަށެވެ. ނަމަވެސް، ކާބޯތަކެތީގެ ރައްކާތެރިކަމާ ބެހޭ އޮފިޝަލް އޯ.ޕީ ސިންގް ވިދާޅުވި ގޮތުގައި އެގޭގައި ހުރި ކާބޯތަކެތީގެ ޕެކެޓްތައް ބެލިއިރު މުއްދަތު ހަމަވެފައިވާ ނުވަތަ ޝައްކުކުރެވޭ ފަދަ އެއްވެސް އެއްޗެއް ފެނިފައެއް ނުވެއެވެ. އަދި ކާނާ ނުބައިވުމުން އާންމުކޮށް ފެންނަ މޭނުބައިކުރުމާއި ހޮޑުލުމުގެ އަލާމާތްތަކެއްވެސް މަރުވި މީހުންގެ ހަށިގަނޑުން ފެންނަން ނެތުމުން، މިއީ އާންމު ފުޑް ޕޮއިޒަނިންއަކަށްވުރެ ބޮޑަށް ވަކިން ވިހައެއް (Poisoning) ދެވިގެން ހިނގާފައިވާ ކަމެއް ކަމަށް މިހާރު ވަނީ ޝައްކުކުރެވިފައެވެ.
މި ހާދިސާއާ ގުޅިގެން ފުލުހުންގެ ފޮރެންސިކު ޓީމުން ވަނީ އެގޭގެ ބަދިގެއާއި ބޭނުންކުރި ކައްކަން ބޭނުންކުރި އުނދުޅިއާއި ތަށިފަދަ ތަކެތިން ސައިންޓިފިކް ހެކި އެއްކޮށްފައެވެ. އަދި މަރުވި މީހުންގެ ހަށިގަނޑުތައް ޕޯސްޓްމޯޓަމް ހެދުމަށް ފޮނުވާފައިވާއިރު، މަރުވި އަސްލު ސަބަބު ކަށަވަރުވާނީ ޕޯސްޓްމޯޓަމް އަދި ލޭގެ ތަހުލީލުތަކުގެ ރިޕޯޓްތައް ލިބުމުންނެވެ. އާއިލާގެ ތެރޭގައި ބިމުގެ މައްސަލައެއްގައި އެއްބަޔަކު އަނެއްބަޔަކު ތަޅާފޮޅާ ކަމުގެ ތުހުމަތުތަކެއްވެސް ތަހުގީގަށް ވަނީ ތިލަވެފައެވެ.
