ގދ. ތިނަދޫގައި ފުޅާދާއިރާއެއްގައި ބަނގުރާ އުފައްދައި ވިއްކަމުންދިޔަ ނެޓްވޯކެއްގެ އިސް މީހަކު ހައްޔަރުކޮށްފިއެވެ.

ފުލުހުންގެ އިންޓެލިޖެންސާއި ތިނަދޫ ޕޮލިސް ގުޅިގެން މިދިޔަ އޮކްޓޯބަރު މަހުގެ 18 ވަނަ ދުވަހު ހިންގި ޚާއްސަ އޮޕަރޭޝަނެއްގައި، ކޯޓު އަމުރެއްގެ ދަށުން ހައްޔަރުކޮށްފައިވަނީ ގދ. ތިނަދޫ، ރިހިކޮކާގެ، ޢުމުރުން 21 އަހަރުގެ މުޙައްމަދު އަފާޒު ބިން ޢަބްދުالله އެވެ.

މި އޮޕަރޭޝަންގެ ތެރެއިން އޭނާއާ ގުޅުންހުރި ކަމަށް ބެލެވޭ ތިނަދޫ ފްލެޓެއް ބަލައިފާސްކޮށްފައިވާއިރު، އެ ތަނުން ބަނގުރާ އުފެއްދުމަށް ބޭނުންވާ ސާމާނާއި، ބަނގުރާކަމަށް ބެލެވޭ އެއްޗެއްހުރި 20 ލީޓަރުގެ 3 ހަމުގެ އިތުރުން، އެފަދަ އެއްޗެއްހުރި 500 އެމްއެލްގެ ފުޅިއެއް ވަނީ ހޯދާފައެވެ.

މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، 15 ދުވަހަށް ބަންދުކުރުމަށް ކޯޓުން ވަނީ އަމަރުކޮށްފައެވެ. ފުލުހުން އަންނަނީ މި މައްސަލަ އިތުރަށް ތަހުގީގުކުރަމުންނެވެ.