ފްލައި ދުބައިގެ ކޮކްޕިޓް ހަމަލާއާ ގުޅިގެން ޔޫއޭއީގައި ހިފެހެއްޓި ދެ ދިވެހި ޕައިލެޓުން ރާއްޖެ ފޮނުވާލައިފި!
ސެޕްޓެމްބަރު 30 ގައި ދުބައިއިން އިސްރާއީލުގެ ތެލް އަވީވަށް ދަތުރުކުރި ފްލައި ދުބައި (Flydubai) ގެ ފްލައިޓް FZ1073 ގައި ހިނގި ނުރައްކާތެރި ހާދިސާއާ ގުޅިގެން ޔޫއޭއީ ފުލުހުންގެ ބެލުމުގެ ދަށަށް ނެގި ދެ ދިވެހި ޕައިލެޓުން، ތަޙުޤީޤަށްފަހު މިނިވަންކޮށް އިއްޔެ ވަނީ ރާއްޖެ ފޮނުވާލާފައެވެ.
ހާދިސާ ހިނގި ގޮތް:
ބައިނަލްއަޤްވާމީ މީޑިއާތަކުން ރިޕޯޓްކޮށްފައިވާ ގޮތުގައި، ދުބައި-ތެލް އަވީވް ފްލައިޓްގެ ކޮކްޕިޓް ތެރޭގައި އޯމާންއަށް ނިސްބަތްވާ އުމުރުން 29 އަހަރުގެ ކޯ-ޕައިލެޓް ހައްމާމް އަލް-ހައްމާމީ ވަނީ ބޯޓުގެ ކެޕްޓަނަކަށް ހުރި އިންޑިއާގެ ސްމިތު މައްޗާރު އަށް ކޮކްޕިޓްގައި އޮތް ކޯރާޑިއަކުން ހަމަލާދީ ބޯޓު ހައިޖެކް ކުރަން އުޅެފައެވެ. ނަމަވެސް ކެޕްޓަން ސްމިތު ވަނީ ހިތްވަރާއެކު ރައްދު ހަމަލާދީ، އެ ހަމަލާ ނާކާމިޔާބުކޮށްލާފައެވެ.
މައިގަނޑު ސަބަބުތަކާއި ތަޙުޤީޤުން ހާމަވި މަޢުލޫމާތު:
އިސްރާއީލުގެ އެއާޕޯޓަށް ޙަމަލާދިނުމުގެ ރޭވުން: ޔޫއޭއީގެ އެޓާނީ ޖެނެރަލް ހަމަދު ސައިފް އަލް-ޝާމްސީއާއި ކަމާބެހޭ އިދާރާތަކުން ހާމަކުރި ގޮތުގައި، އޯމާންއަށް ނިސްބަތްވާ ކޯ-ޕައިލެޓް ހައްމާމް އަލް-ހައްމާމީ ގެ މައިގަނޑު މަޤްޞަދަކީ ކޮކްޕިޓްގެ ކޮންޓްރޯލް އަތުލައި، އިސްރާއީލުގެ ތެލް އަވީވްގައިވާ ބެން ގުރިއަން އިންޓަނޭޝަނަލް އެއާޕޯޓުގެ ޓާމިނަލްއަކަށް ބޯޓު ވައްޓާލައިގެން އަމިއްލައަށް މަރުވެގެން ދޭ ޓެރަރިސްޓް ހަމަލާއެއް ދިނުމެވެ.
ހައްދުފަހަނައެޅި ފިކުރުގެ ނުފޫޒު: ޔޫއޭއީގެ ތަޙުޤީޤީ އިދާރާތަކަށް ހައްމާމް ދީފައިވާ ބަޔާންތަކާ ހަވާލާދީ WAM އޭޖެންސީން ރިޕޯޓްކޮށްފައިވާ ގޮތުގައި، އޭނާގެ ފިކުރު ބަދަލުވެ ހައްދުފަހަނައެޅި ޓެރަރިސްޓް ފިކުރުތަކަށް ލެނބެން ފެށީ އޮސްޓްރޭލިޔާގެ މެލްބަންގައި ހުރި RMIT ޔުނިވަސިޓީގައި ކިޔަވަން އުޅުނު ދުވަސްވަރުއެވެ. އަދި އޭނާގެ ސޯޝަލް މީޑިއާ އެކައުންޓްތަކުންނާއި ފޯނުން އަލްޤާއިދާގެ ކުރީގެ ލީޑަރު އައިމަން އަލް-ޒަވާހިރީ އަދި 2001 ވަނަ އަހަރު އެމެރިކާއަށް ދިން 9/11 ގެ ހަމަލާތަކަށް ތާއީދުކޮށް ހިތްވަރުދޭ މާއްދާތައް ފެނިފައިވެއެވެ.
- ހަމަލާ ދިން ގޮތް: ސައޫދީ-އުރުދުން އިން މަތިން ފްލައިޓް ދަތުރުކުރަމުން ދަނިކޮށް، ހައްމާމް ވަނީ ކޮކްޕިޓްގައި އޮތް އިމަޖެންސީ ކޯރާޑިއަކުން ބޯޓުގެ ކެޕްޓަން، ސްމިތު މައްޗާރު އަށް ހަމަލާދީ ވަރަށް ބޮޑަށް ޒަޚަމްކޮށްލާފައެވެ. އެއަށްފަހު އޭނާ ވަނީ ބޯޓު ތިރިއަށް މިސްރާބުކޮށް، އެއް މިނެޓު ތެރޭގައި 34,000 ފޫޓުން 17,000 ފޫޓަށް ބޯޓު ވައްޓާލާފައެވެ.
- ހަމަލާ ނާކާމިޔާބުވުން: ޒަޚަމްވި ނަމަވެސް ކެޕްޓަން ސްމިތު މައްޗާރު ވަނީ ހިތްވަރާއެކު ރައްދު ހަމަލާދީ، ކޮކްޕިޓްގެ ދޮރު ހުޅުވާލާފައެވެ. ކޮކްޕިޓް ދޮރު ހުޅުވުމާއެކު، ބޯޓުގައި ތިބި ފުރާނައިގެ ނުރައްކަލާ ކުރިމަތިވި މަންޒަރު ފެނުނު ފްލައިޓް ކްރޫއިންނާއި ބައެއް ފުރެންޖީން (ޔޫއޭއީ އަދި އިސްރާއީލުގެ ދަތުރުވެރިން) ކޮކްޕިޓަށް ވަދެ، ހައްމާމް ބިންމައްޗަށް އޮބަހައްޓައި ބަންދުކުރިއެވެ. ހައްމާމް ބަންދުކުރި ވަގުތު އޭނާ ވަނީ "އަހަރެން މަރާލާ، އަހަރެން މަރާލާ" އޭ ކިޔައި ހޭރިފައެވެ.
ދިވެހި ދެ ޕައިލެޓުންނާ އޮތް ގުޅުން:
އޮކްޓޯބަރު 3 ގައި ޔޫއޭއީގެ ސެކިއުރިޓީ ބާރުތަކުން ފްލައި ދުބައިގައި މަސައްކަތްކުރާ ދެ ދިވެހި ޕައިލެޓުން ފުލުހުންގެ ބެލުމުގެ ދަށަށް ނެގީ:
އެ ދެ ދިވެހި ޕައިލެޓުންނަކީ ހަމަލާދިން އޯމާންގެ ޕައިލެޓް ހައްމާމް އަލް-ހައްމާމީއާއެކު އެއް އިމާރާތެއްގައި ދިރިއުޅެމުންދިޔަ ދެ މީހުންނަށްވުން.
އޮފީސް މާޙައުލުގައި އަދި ވަޒީފާގެ ގޮތުން އެ މީހުންނަކީ ހައްމާމްއާ ގާތް ގުޅުމެއް އޮތް ދެ އެކުވެރިންނަށްވުން.
ތަޙުޤީޤުގެ ނަތީޖާ އަދި ރާއްޖެ ފޮނުވާލުން:
އިންޑިއާގެ ނޭޝަނަލް އިންވެސްޓިގޭޝަން އެޖެންސީ (NIA) އާއި ޔޫއޭއީގެ ކަމާބެހޭ އިދާރާތަކުން ބެލި ބެލުމުގައި، މި ހަމަލާގެ ފަހަތުގައި ބޮޑު ނެޓްވޯކެއް ނުވަތަ އެހެން ބައެއްގެ ބައިވެރިވުން އޮތްތޯ ވަނީ ފުޅާދާއިރާއެއްގައި ތަޙުޤީޤުކޮށްފައެވެ.
ނަމަވެސް، މި ދެ ދިވެހި ޕައިލެޓުންގެ މައްޗަށް މި ހަމަލާއާ ނުވަތަ ހައިޖެކް ކުރުމުގެ ރޭވުމާ އެއްވެސް ގުޅުމެއް އޮތްކަން ތަޙުޤީޤަށް ސާބިތުވެފައެއް ނުވެއެވެ. އެހެންކަމުން، ޔޫއޭއީގެ އޮތޯރިޓީތަކުން އެ ދެ މީހުން މިނިވަންކުރުމަށްފަހު އިއްޔެ ވަނީ އަނބުރާ ރާއްޖެއަށް ފޮނުވާލާފައެވެ.
ރާއްޖެ އައުމާއެކު، މައްސަލައިގެ މަޢުލޫމާތު އިތުރަށް އޮޅުންފިލުވުމުގެ ގޮތުން ދިވެހި ފުލުހުންގެ ޚިދުމަތުން ވަނީ އެ ދެ ޕައިލެޓުންނާ ސުވާލުކޮށްފައެވެ.
