އެމެރިކާގެ އަސްކަރީ ބޭސްތަކަށް ހަމަލާދީފާނެކަމުގެ އިންޒާރު އީރާނުން ދީފި...
ހޯރްމުޒް ކަނޑުއޮޅިން ދަތުރުކުރާ ތެޔޮ އުފުލާ އުޅަންދުތަކަށް އެމެރިކާއިން ސެކިއުރިޓީދީ، އީރާނުން "ޣައިރުޤާނޫނީ" ކަމަށް ކަނޑައަޅާފައިވާ މަގުތަކުން ދަތުރުކުރުން ނުހުއްޓުވައިފިނަމަ، ސަރަހައްދުގައި ހުރި އެމެރިކާގެ އަސްކަރީ ބޭސްތަކަށް ހަމަލާދޭނެކަމުގެ ވަރުގަދަ އިންޒާރެއް އީރާނުގެ އިސްލާމިކް ރެވޮލިއުޝަނަރީ ގާޑް ކޯޕްސް (އައިއާރްޖީސީ) އިން ދީފިއެވެ.
ބައިނަލްއަޤްވާމީ ނޫސްތަކުން ރިޕޯޓްކޮށްފައިވާ ގޮތުގައި، އީރާނުގެ ސެޕާ ނިއުސް މެދުވެރިކޮށް ނެރުނު ބަޔާނެއްގައި ބުނެފައިވަނީ، އީރާނުގެ ހުއްދައެއްނެތި ނުވަތަ ކަނޑައަޅާފައިވާ އުސޫލުތަކާ ހިލާފަށް ދަތުރުކުރާ އުޅަންދުތަކަށް އެމެރިކާއިން އެހީތެރިކަން ފޯރުކޮށްދިނުމުގެ ސަބަބުން ކަނޑުމަތީގެ ނުރައްކާތެރި ހާދިސާތައް އިތުރުވަމުންދާ ކަމަށެވެ. އަދި މިކަން މިގޮތަށް ކުރިއަށްދާނަމަ، ކުރިމަތިލުންތައް އިތުރުވެ، އެމެރިކާގެ އަސްކަރީ މަރުކަޒުތަކަށް ހަމަލާތައް ފުޅާކުރާނެކަމުގެ ސީރިއަސް އިންޒާރެއް ވަނީ ދީފައެވެ.
މި އިންޒާރު އައިސްފައިވަނީ ހޯރްމުޒް ކަނޑުއޮޅިން ދަތުރުކުރި އެކި ގައުމުތަކުގެ ތެޔޮ ބޯޓުތަކެއްގައި އަލިފާންރޯވެ، އަދި ކަނޑުގައި އަރުވާފައިވާ މައިންތަކުގައި ޖެހި ބައެއް އުޅަންދުތަކަށް ބޮޑެތި ގެއްލުންތަކެއް ވެފައިވާ ދަނޑިވަޅެއްގައެވެ. މި ސަރަހައްދީ ހަމަނުޖެހުންތަކާ ގުޅިގެން މެދުއެކުވެރި އަރަބި އިމާރާތާއި، ގަތަރު، ބަހްރޭން އަދި އުރުދުންގައި ހުރި އެމެރިކާގެ އަސްކަރީ މަރުކަޒުތަކުގެ ސެކިއުރިޓީ ވަނީ އިތުރަށް ވަރުގަދަކޮށްފައެވެ.
