އާންމުންނަށް ދޮގުހަދާ ސިޔާސީ ވެރިން މަގާމުން ވަކިކުރެވޭ ގާނޫނެއް ވޭލްސްއިން ފާސްކޮށްފި

އާންމުންނަށް ދޮގުހަދާ ސިޔާސީ ބޭފުޅުން މަގާމުން ވަކިކުރެވޭ ގޮތަށް ގާނޫނެއް ފާސްކުރި ދުނިޔޭގެ ފުރަތަމަ ގައުމަކަށް ވޭލްސް ވެއްޖެއެވެ. މި ގާނޫނު އެ ގައުމުގެ ގާނޫނު ހަދާ މަޖިލިސް (ސެނެޑް) އިން ފާސްކޮށްފައިވަނީ މިދިޔަ މާރިޗު މަހުގައެވެ.

މި ގާނޫނުގެ ދަށުން، އިންތިޚާބެއް ކާމިޔާބު ކުރުމުގެ ބޭނުމުގައި ކެންޑިޑޭޓަކު ހަގީގަތާ ޚިލާފު ނުވަތަ އޮޅުވާލުންތަކެއް އެކުލެވޭ މައުލޫމާތު ފެތުރުމަކީ ޖިނާއީ ކުށެއްގެ ގޮތުގައި ވަނީ ކަނޑައަޅާފައެވެ. އެހެންނަމަވެސް، މި ނިންމުމަށް އެންމެ އަވަހަށްވެސް އަމަލުކުރަން ފަށާނީ 2030 ވަނަ އަހަރުގައެވެ.

މީގެ އިތުރުން، ބޮޑެތި ކުށްތައް ކުރާ މަޖިލިސް މެންބަރުންގެ ދައުރު ހަމަވުމުގެ ކުރިން މަގާމުން ވަކިކުރުމުގެ ފުރުސަތު ވޯޓުލާ މީހުންނަށް ލިބިދޭ 'ރީކޯލް' ނިޒާމެއްވެސް މި ގާނޫނުން ވަނީ ތައާރަފުކޮށްފައެވެ. އަދި މެންބަރުންގެ ސުލޫކީ މިންގަނޑުތައް ހިފެހެއްޓުމުގެ ނިޒާމު އިތުރަށް ހަރުދަނާކޮށް، އަމިއްލަ އިސްނެގުމުގައި މައްސަލަތައް ތަހުގީގު ކުރުމުގެ ބާރު މިނިވަން ކޮމިޝަނަރަކަށް ވަނީ ދީފައެވެ. މިގޮތުން ބޮޑެތި ކުށްތަކާއި ސުލޫކީ މައްސަލަތަކުގައި ނެގޭ ވޯޓަކުން މެންބަރަކު މަގާމުން ވަކިކުރުމުގެ ފުރުސަތުވެސް ލިބިގެންދާނެއެވެ.

މި ގާނޫނަށް ތާއީދުކުރާ ފަރާތްތަކުން ފާހަގަކުރާ ގޮތުގައި މިއީ ސިޔާސީ ދާއިރާއަށް އާންމުންގެ އިތުބާރު އަލުން ހޯދުމަށް އެޅުނު ތާރީޚީ މުހިންމު ފިޔަވަޅެކެވެ. ނަމަވެސް، ފާޑުކިޔާ ފަރާތްތަކުން ކަންބޮޑުވުން ފާޅުކުރަނީ މީގެ ސަބަބުން ޚިޔާލު ފާޅުކުރުމުގެ މިނިވަންކަމަށާއި ދިމިގްރާތީ ބަހުސްތަކަށް ހުރަސް އެޅިދާނެ ކަމަށް ބުނެއެވެ. މި ގާނޫނު ސެނެޑުން ފާސްކުރިއިރު، މިއާ ދެކޮޅަށް ވޯޓު ދެއްވީ މަޖިލީހުގެ އެންމެ މެންބަރެކެވެ.

ވޭލްސްގެ މި ގާނޫނަކީ ހުރިހާ ސިޔާސީ ދޮގެއް ވަގުތުން މަނާކުރާ ގާނޫނެއް ނޫނެވެ. އޭގެ ބަދަލުގައި، ސިޔާސީ ފަރާތަކުން ހަދާ ދޮގަކީ ސީރިއަސް އަދި ސާބިތުވާ ދޮގަކަށް ވާނަމަ، އެ މީހެއްގެ ސިޔާސީ މުސްތަގުބަލު ނިމުމަކަށް ގެނެވޭނެ ރަސްމީ އުސޫލެއް ގާއިމުކުރުމެވެ. މި ނިޒާމު އަމަލީ މައިދާނުގައި ހިނގާނެ ގޮތް ބެލުމަށް މުޅި ދުނިޔެ މިހާރު ދަނީ އިންތިޒާރު ކުރަމުންނެވެ.